លោកបណ្ឌិត ឃួន សុវណ្ណ ដឹកនាំរៀបចំពិធីបុណ្យកឋិនទានសាមគ្គី ដង្ហែទៅកាន់វត្តចារ ក្នុងខេត្តស្វាយរៀង ដើម្បីកសាងសមិទ្ធផលនានា
21-11-2026 17:13
(ស្វាយរៀង)៖ លោកបណ្ឌិត ឃួន សុវណ្ណ ទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានសហការជាមួយថ្នាក់ដឹកនាំ ព្រមទាំងពុទ្ធបរិស័ទជិតឆ្ងាយ មូលមតិគ្នាជាឯកច្ឆន្ទប្រារព្ធ ពិធីបុណ្យកឋិនទានសាមគ្គី ដង្ហែទៅវេរប្រគេនព្រះសង្ឃដែលគង់ចាំព្រះវស្សាអស់ត្រីមាស នៅវត្តចារ ស្ថិតក្នុងភូមិស្វាយមីង ឃុំអង្គតាសូ ស្រុកស្វាយជ្រំ ខេត្តស្វាយរៀង។
ក្នុងឱកាសនោះ លោកបណ្ឌិត ឃួន សុវណ្ណ បានគូសបញ្ជាក់ថា ការប្រារព្ធពិធីបុណ្យទានដ៏ឧត្តុង្គឧត្តមនេះ អាចប្រព្រឹត្តទៅបានយ៉ាងរលូន គឺដោយសារប្រទេសជាតិទទួលបាននូវសុខសន្តិភាព និងការអភិវឌ្ឍលើគ្រប់វិស័យ។ លោកក៏បានអំពាវនាវដល់ពុទ្ធបរិស័ទបន្តរួមសាមគ្គីគ្នា ថែរក្សាសន្តិភាព និងចូលរួមទ្រទ្រង់វិស័យព្រះពុទ្ធសាសនាឱ្យកាន់តែរីកចម្រើនតរៀងទៅ។
សូមបញ្ជាក់ថា ពិធីបុណ្យកឋិនទាននេះ បានប្រព្រឹត្តទៅរយៈពេលពីរថ្ងៃ ចាប់ពីថ្ងៃទី២១ ដល់ថ្ងៃទី២២ ខែវិច្ឆិកា ឆ្នាំ២០២៦ ដោយមានកម្មវិធីសមាទានសីល និមន្តព្រះសង្ឃចម្រើនព្រះបរិត្ត សម្តែងធម៌ទេសនា និងដង្ហែអង្គកឋិនទានប្រទក្សិណជុំវិញព្រះវិហារ វេរប្រគេនដល់ព្រះសង្ឃតាមគន្លងព្រះធម៌វិន័យ។
ពិធីនេះរៀបចំឡើងក្នុងគោលបំណងប្រមូលបច្ច័យបូជាចំពោះព្រះរតនត្រ័យ និងចូលរួមចំណែកកសាងរបង ព្រមទាំងខ្លោងទ្វារវត្តចារឱ្យកាន់តែស្រស់ស្អាត និងមានរបៀបរៀបរយផងដែរ៕













