FN KH App Logo
Fresh News
FN MEDIA CO., LTD.
GET -- on the App Store
INSTALL

ហេតុការណ៍គ្រោះថ្នាក់ចរាចរណ៍រថយន្ត Mazda EZ6 បុកម៉ូតូនៅស្រុកសង្កែ បណ្តាលឲ្យស្លាប់ម្នាក់ និងរបួសម្នាក់ កម្លាំងនគរបាលខេត្តបាត់ដំបង កំពុងតាមស្រាវជ្រាវ និងចាប់ខ្លួនស្រ្តីអ្នកបើក ដែលគេចចេញពីមូលដ្ឋាន

21-11-2026 14:30

(បាត់ដំបង)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង បានឲ្យដឹងថា គ្រោះថ្នាក់ចរាចរណ៍មួយ បានកើតឡើងកាលពីថ្ងៃទី២១ ខែតុលា ឆ្នាំ២០២៦ វេលាម៉ោង២១:០០នាទីនៅលើផ្លូវជាតិ លេខ៥ ស្ថិតនៅក្រុមទី១ ភូមិពុកឆ្មា ឃុំអន្លង់វិល ស្រុកសង្កែ ខេត្តបាត់ដំបង រវាងរថយន្ត និងម៉ូតូ ដែលបណ្តាលឲ្យបើកអ្នកម៉ូតូស្លាប់ និងអ្ន​ករួមដំណើររងរបួសស្រាល។

ចំពោះអ្នកបើករថយន្តដែលជាស្រ្តីឈ្មោះ សឺន សារ៉េត បានរត់គេចខ្លួនចេញពីមូលដ្ឋានរហូត ក្រោយកើតហេតុ ដែលកម្លាំងនគរបាលជំនាញចរាចរណ៍​ និងនគរបាលមូលដ្ឋាន សហការគ្នាតាមស្រាវជ្រាវ និងតាមចាប់ខ្លួន។

ស្នងការដ្ឋាននគរបាលខេត្តបាត់ដំបង បានបញ្ជាក់ថា គ្រោះថ្នាក់ចរាចរណ៍នេះ បានកើតឡើងរវាងម៉ូតូ០១គ្រឿង ម៉ាក Honda Dr​ea​mពណ៌ខ្មៅពាក់ផ្លាក លេខបាត់ដំបង 1Y- 5629 អ្នកបើក​បរ​ឈ្មោះ ស្រេង គឹមទៀង ភេទប្រុស អាយុ២០​ឆ្នាំ (រងរបួសធ្ងន់ និងបានស្លាប់ ក្រោយ​ពេល​បញ្ជូន​ទៅកាន់​មន្ទីរ​ពេទ្យ) និងមានអ្នករួមដំណើរឈ្មោះ ថន ប៊ុនធឿន ភេទប្រុស អាយុ១៨ឆ្នាំ (រងរបួសស្រាល)។

ជនរងគ្រោះទាំងពីរនាក់ រស់នៅភូមិបញ្ញា ឃុំកំពង់​ព្រះ ​ស្រុក​សង្កែ ខេត្តបាត់ដំបង។ ម៉ូតូបានបុកជាមួយរថយន្តចំនួន០១គ្រឿងម៉ាក Mazda EZ6 ពណ៌ខ្មៅ គ្មានផ្លាកលេខ ដែលមានអ្នកបើកបរភេទស្រី បានគេចខ្លួនពីកន្លែងកើត ហេតុ។

ក្រោយកើតហេតុមន្រ្តី នៃការិយាល័យនគរបាលចរាចរណ៍ផ្លូវគោក សហការជាមួយកម្លាំង នៃអធិការដ្ឋាននគរបាលស្រុកសង្កែ បានធ្វើការពិនិត្យកន្លែងកើតហេតុ វាស់វែង និងប្រមូលវត្ថុតាងម៉ូតូចំនួន ០១គ្រឿង និងរថយន្ត​ចំនួន​ ០១​គ្រឿង យកមករក្សាទុកនៅការិយាល័យនគរបាលចរាចរណ៍ផ្លូវគោក។

តាមការពិនិត្យកន្លែងកើតហេតុ ម៉ូតូ Honda Dream បានបើកបរពីទិស ខាងជើងទៅទិសខាងត្បូង ពេលមកដល់ចំណុចកើតហេតុក៏បានបុករថយន្ត Mazda ដែលកំពុងបើកបរបញ្ច្រាសទិសចរាចរណ៍ឆ្លងផ្លូវ​ក្នុងទិសដៅពី​ទិសខាងលិចទៅទិសខាងកើតចំហៀងខាងស្ដាំផ្នែកខាងក្រោយតែម្តង។

ដោយសារអ្នកបើកបររថយន្តខាងលើ បានគេចខ្លួនចេញពីកន្លែងកើតហេតុមុនពេលសមត្ថកិច្ចនគរបាលទៅដល់ ហើ​យ​តាមរយៈការស្រាវជ្រាវរបស់សមត្ថកិច្ចកំណត់នូវអត្តសញ្ញាណរបស់អ្នកបើកបររថយន្តនេះបានហើយ គឺឈ្មោះ សឺន សារ៉េត ភេទស្រី អាយុ២៦ឆ្នាំ រស់នៅភូមិជ្រៃ ឃុំជ្រៃ ស្រុកថ្មគោល ខេត្តបាត់ដំបង ប៉ុន្តែ​ស្រី្ត​រូប​នេះបានគេចខ្លួនពីមូលដ្ឋានរហូតមក។

នៅថ្ងៃទី៣០ ខែតុលា ឆ្នាំ២០២៦ សមត្ថកិច្ចនគរបាលបានរៀបចំសំណុំរឿងបញ្ជូន​ទៅកាន់អយ្យ​ការ​អម​សាលា​ដំបូងខេត្តបាត់ដំបង ដើម្បីចាត់វិធានការតាមផ្លូវច្បាប់ចំពោះករណីខាងលើ ហើយរហូតមកដល់​ពេល​នេះសមត្ថកិច្ចនៅតែបន្តស្វែងរកវត្តមានរបស់អ្នកបើកបររថយន្ត និងរង់ចាំអនុវត្តនូវរាល់អធិ​បញ្ជារ​​បស់​អយ្យ​ការ​អម​សា​លា​ដំបូងខេត្តបាត់ដំបង៕