(ព្រៃវែង)៖ លោកបណ្ឌិត ឃួន សុវណ្ណ ទីប្រឹក្សាសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាអនុប្រធានក្រុមការងារចលនាកសាងសមាជិកគណបក្សនៅមូលដ្ឋានខេត្តព្រៃវែង រួមជាមួយលោកអែល ម៉ៃ សមាជិកក្រុមប្រឹក្សាស្រុកស្វាយអន្ទរ បានអញ្ជើញចូលរួមយ៉ាងខ្ជាប់ខ្ជួនក្នុងពិធីបុណ្យកឋិនទាន។ ពិធីដ៏ឧត្តុង្គឧត្តមនេះត្រូវបានប្រារព្ធឡើងនៅវត្តសាមគ្គីខេមរារាម (វត្តតាគត) ស្ថិតនៅភូមិតាគត ឃុំសំរោង ស្រុកស្វាយអន្ទរ ខេត្តព្រៃវែងនៅថ្ងៃទី១៤ ខែវិច្ឆិកា ឆ្នាំ២០២៦។

លោកបណ្ឌិត ឃួន សុវណ្ណ បានថ្លែងថា ពិធីបុណ្យកឋិនទាននេះ គឺដើម្បីរួមចំណែកជាមួយបងប្អូនប្រជាពលរដ្ឋពុទ្ធបរិស័ទចំណុះជើងវត្ត ក្នុងការប្រមូលបច្ច័យកសាងសមិទ្ធិផលនានាសម្រាប់អភិវឌ្ឍន៍វត្តអារាម។ ពិធីបុណ្យកឋិនទាននេះមិនត្រឹមតែជាការរួមចំណែកថែរក្សា និងលើកស្ទួយព្រះពុទ្ធសាសនាប៉ុណ្ណោះទេ ប៉ុន្តែក៏ជាការបង្ហាញពីសាមគ្គីភាព និងការរួបរួមគ្នារបស់ប្រជាពលរដ្ឋក្នុងមូលដ្ឋាន ដើម្បីបុព្វហេតុសាសនា និងសង្គមជាតិផងដែរ។

ការប្រមូលបច្ច័យនេះនឹងជួយឲ្យវត្តមានលទ្ធភាពកសាងហេដ្ឋារចនាសម្ព័ន្ធចាំបាច់នានា សម្រាប់បម្រើដល់ការបដិបត្តិធម៌ និងតម្រូវការរបស់ពុទ្ធបរិស័ទ៕