(ស្វាយរៀង)៖ នៅព្រឹកថ្ងៃទី១២ ខែវិច្ឆិកា ឆ្នាំ២០២៦ លោក ប៉េង ពោធិ៍សា អភិបាលខេត្តស្វាយរៀង បានអញ្ជើញជួបសំណេះសំណាល និងផ្តល់រង្វាន់លើកទឹកចិត្តដល់សិស្សានុសិស្សចំនួន ៣៤នាក់ដែលបានប្រឡងជាប់សញ្ញាបត្រ មធ្យមសិក្សាទុតិយភូមិ និងសញ្ញាបត្របច្ចេកទេស និងវិជ្ជាជីវៈកម្រិត៣ ទទួលបាននិទ្ទេស A ក្នុងឆ្នាំសិក្សា ២០២៥-២០២៦។ ពិធីនេះបានប្រព្រឹត្តទៅនៅសាលប្រជុំអគារ «ឃ» សាលាខេត្តស្វាយរៀង។

យោងតាមរបាយការណ៍ លទ្ធផលប្រឡងសញ្ញាបត្រមធ្យមសិក្សាទុតិយភូមិ មានសិស្សជាប់និទ្ទេស A ចំនួន ៣៣នាក់ (ស្រី ១៤នាក់) និងសិស្សជាប់និទ្ទេស A ផ្នែកបច្ចេកទេស និងវិជ្ជាជីវៈកម្រិត៣ ចំនួន ១នាក់ (ស្រី)។

លោកអភិបាលខេត្តបានថ្លែងអំណរគុណមាតាបិតា អាណាព្យាបាល លោកគ្រូ អ្នកគ្រូ ដែលបានខិតខំយកចិត្តទុកដាក់បង្រៀន និងជំរុញការសិក្សារបស់សិស្សានុសិស្ស រហូតទទួលបានលទ្ធផលល្អប្រសើរនេះ។

លោកបានផ្តាំផ្ញើសិស្សានុសិស្សទាំងអស់ ត្រូវបន្តខិតខំរៀនសូត្រ តស៊ូព្យាយាម ធ្វើជាកូនល្អ សិស្សល្អ មិត្តល្អ និងចៀសឲ្យឆ្ងាយពីគ្រឿងញៀន គ្រឿងស្រវឹង និងអបាយមុខផ្សេងៗ ព្រមទាំងចូលរួមគោរពច្បាប់ចរាចរណ៍ ឲ្យបានខ្ជាប់ខ្ជួន។

សូមបញ្ជាក់ថានៅក្នុងឱកាសនោះ លោកអភិបាលខេត្ត​ បានចែករង្វាន់ជូនដល់ប្អូនៗដែលប្រឡងជាប់និទ្ទេសA ទាំង៣៤នាក់ ក្នុងម្នាក់ៗទទួលបាន៖ ម៉ូតូម៉ាក HONDA WAVE ស៊េរី២០២៥ ចំនួន១គ្រឿង មួកសុវត្ថិភាពចំនួន០១។ ទន្ទឹមនោះលោក លោកស្រីប្រធានការិយាល័យអប់រំ យុវជន និងកីឡា នៃរដ្ឋបាលក្រុង-ស្រុកទាំង៨​ ក្នុងម្នាក់ៗទទួលបានថវិកា២០០.០០០រៀល និងនាយកវិទ្យាល័យទាំង១៥​ ក្នុងម្នាក់ៗទទួលបានថវិកា ៣០០,០០០ រៀល ផងដែរ៕