(ស្ទឹងត្រែង)៖ បន្ទាប់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញ​បើកវគ្គហ្វឹកហ្វឺនយោធិនកាតព្វកិច្ចនៅបញ្ជាការដ្ឋានការពារកោះឆ្នេរនៅខេត្តកំពង់ស្ពឺហើយនោះ នៅតាមសាលាហ្វឹកហ្វឺនចំនួន៧ផ្សេងទៀត ចាប់ផ្តើមរៀបចំពិធីបើកវគ្គហ្វឹកហ្វឺនដល់យោធិន​កាតព្វ​កិច្ចជាបន្តបន្ទាប់។

នៅសាលាពលទាហាន នៃយោធភូមិភាគទី១ ក្នុងខេត្តស្ទឹងត្រែង នាព្រឹកថ្ងៃទី១០ ខែវិច្ឆិកា ឆ្នាំ២០២៦នេះ ក៏បានប្រារព្ធ​ពិធី​បើកវគ្គហ្វឹកហ្វឺនយោធិនកាតព្វកិច្ចជំនាន់ទី១ ឆ្នាំ២០២៦ដែរ។ ពិធីប្រព្រឹត្តទៅ​ក្រោម​អធិបតី​ភាពនាយឧត្តមសេនីយ៍ សឹង សំណាង អគ្គមេបញ្ជាការរងកងយោធ​ពលខេមរភូមិន្ទ និងជាមេ​បញ្ជា​ការកងទ័ពជើងអាកាស។

ថ្លែងក្នុងពិធីបើកវគ្គនោះ នាយឧត្តមសេនីយ៍ សឹង សំណាង បានសម្តែងការស្វាគមន៍ និងកោត​សរសើរយុវជនទាំងអស់ ដែលបានស្ម័គ្រចិត្តចូលបម្រើកាតព្វកិច្ចយោធាយ៉ាងច្រើនកុះករ ប្រកប​ដោយស្មារតីមោះមុត ក្នុងស្មារតីការពារជាតិមាតុភូមិ និងបានថ្លែងអំណរគុណយ៉ាងជ្រាលជ្រៅ​ចំពោះមាតាបិតា អាណាព្យាលបាល និងក្រុមគ្រួសារនៃយោធិនកាតព្វកិច្ចទាំងអស់ ដែល​បាន​គាំទ្រឱ្យបងប្អូន កូនចៅ ចូលបំពេញកាតព្វកិច្ចការពារជាតិ មាតុភូមិ ប្រកបដោយស្មារតី​ស្នេហា​ជាតិខ្ពស់បំផុត។

នាយឧត្តមសេនីយ៍ ​សឹង សំណាង បានគូសបញ្ជាក់ថា វគ្គហ្វឹកហ្វឺនយោធិនកាតព្វកិច្ចជា​ប្រវត្តិ​សាស្ត្រនេះ មានគោលបំណងសំខាន់ក្នុងការផ្តល់ចំណេះដឹង ជំនាញ បទពិសោធន៍ និងការអប់រំ​វិន័យកងទ័ពដល់យុវជនដែលជាប្រជាជនស៊ីវិល ឱ្យមានសមត្ថភាពគ្រប់គ្រាន់ក្នុងការបំពេញ​ភារកិច្ចការពារជាតិ និងប្រជាជន នៅពេលប្រទេសជាតិត្រូវការ។ ការហ្វឹកហ្វឺនមិនត្រឹមតែជា​ការ​ផ្ទេរ​ចំណេះដឹងផ្នែកយោធាប៉ុណ្ណោះទេ ប៉ុន្តែថែមទាំងជាដំណើរការនៃការកសាងស្មារតី​ស្នេហា​ជាតិ ស្មារតីទទួលខុសត្រូវ សាមគ្គីភាព ភាពអត់ធ្មត់ និងការគោរពវិន័យ។ ​

លោកមេបញ្ជាការកងទ័ពអាកាស បានសង្កត់ធ្ងន់ថា ការចូលបំពេញកាតព្វកិច្ចយោធា គឺជាការ បង្ហាញស្មារតីទទួលខុសត្រូវក្នុងនាមជាពលរដ្ឋខ្មែរ និងជាការបន្តវេនពីយុទ្ធជនជំនាន់មុន ដើម្បី​ថែរក្សាឯករាជ្យ អធិបតេយ្យភាព បូរណភាពទឹកដី និងសុខសន្តិភាពរបស់ប្រជាជន។ តាមរយៈវគ្គ​នេះ យោធិនកាតព្វកិច្ចទាំងអស់ មានការយល់ច្បាស់អំពីតួនាទី ភារកិច្ច សិទ្ធិ និងកាតព្វកិច្ច​របស់​ខ្លួន ព្រមទាំងគោរពរដ្ឋធម្មនុញ្ញ ច្បាប់ វិន័យ និងបទបញ្ជារបស់កងយោធពលខេមរភូមិន្ទ។

នាយឧត្តមសេនីយ៍ សឹង សំណាង ផ្តាំផ្ញើដល់សិក្ខាកាមយោធិនកាតព្វកិច្ចយោធាទាំងអស់ ត្រូវ​ប្រកាន់ខ្ជាប់ស្មារតីស្នេហាជាតិ និងស្មោះត្រង់ដាច់ ខាតចំពោះជាតិ សាសនា ព្រះមហាក្សត្រ និង​រាជ​រដ្ឋាភិបាល។ ការពារឱ្យបានដាច់ខាតនូវសន្តិភាព បូរណភាពទឹកដី គោរពច្បាប់ស្តីពី​លក្ខន្តិកៈ​ទូទៅ​ចំពោះយោធិននៃកងយោធពលខេមរភូមិន្ទ បទដ្ឋានគតិយុត្តិនានា និងគោរពឱ្យបាន​ម៉ឺង​ម៉ាត់​នូវបទបញ្ជារបស់រាជរដ្ឋាភិបាល ក្រសួងការពារ ជាតិ និងអគ្គមេបញ្ជាការ។ សិក្ខាកាមកាតព្វ​កិច្ច​យោធា​គ្រប់រូប ត្រូវគោរពវិន័យ បទបញ្ជា និងក្រមសីលធម៌ឱ្យបានម៉ឺងម៉ាត់ ដោយយល់ថា ការគោរពលក្ខខណ្ឌទាំងនេះ គឺជាជោគជ័យនៃការគ្រប់គ្រងខ្លួនឯង និងជាមូលដ្ឋានគ្រឹះសម្រាប់​សម្រេចគោលដៅជីវិត។

បន្ថែមពីលើនេះ ត្រូវថែរក្សាសាមគ្គីភាព មិត្តភាព ចេះជួយគ្នា លើកទឹកចិត្តគ្នា និងរួមគ្នាដោះ​ស្រាយ​បញ្ហា​ដោយការយោគយល់ ព្រម ទាំងខិតខំរៀនសូត្រ និងហ្វឹកហាត់ ដើម្បីយកចំណេះ​ដឹង និងបទពិសោធទៅបម្រើសហគមន៍ និងសង្គមជាតិ។

សូមបញ្ជាក់ថា រាជរដ្ឋាភិបាលបានអនុញ្ញាតឱ្យក្រសួងការពារជាតិជ្រើសរើសយុវជនចំនួន ១ម៉ឺន​នាក់ ឱ្យចូលបំពេញកាតព្វកិច្ចយោធាសម្រាប់ឆ្នាំ២០២៦ ដោយបែងចែកជាពីរវគ្គ។ សម្រាប់វគ្គ​ដំបូងយុវជនចំនួន ៥ពាន់នាក់ ត្រូវបានជ្រើសរើស និងហ្វឹកហ្វឺននៅតាមសាលាហ្វឹកហ្វឺនចំនួន ៨ ​រយៈពេល ៣ខែ មុននឹងបញ្ជូនទៅបំពេញការងារជាក់ស្តែងនៅតាមកងឯកភាពនានា ដែលការ​បំពេញកាតព្វកិច្ចយោធានេះរយៈមានពេល ២៤ខែ។

ការហ្វឹកហ្វឺនធ្វើឡើងមួយថ្ងៃចំនួន៧ម៉ោង ហើយមួយសប្តាហ៍៦ថ្ងៃ។ វគ្គទី២ គ្រោងនឹងចាប់ផ្តើមនៅចុងខែកុម្ភៈ ឬដើមខែមីនា ឆ្នាំ២០២៧៕