(កំពង់ស្ពឺ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅរសៀលថ្ងៃទី៩ ខែវិច្ឆិកា ឆ្នាំ២០២៦នេះ បានណែនាំ និងបង្ហាញក្ដីរំពឹងយ៉ាងមុតមាំថា យុវជនដែលចូលបំពេញកាតព្វកិច្ចយោធា នៅឆ្នាំដំបូងនាឆ្នាំ២០២៦នេះ ត្រូវខិតខំប្រឹងប្រែងធ្វើការហ្វឹកហាត់លុតដំរហូតដល់រយៈពេលកំណត់២៤ខែ ដើម្បីធ្វើជាគំរូដល់យោធិនកាតព្វកិច្ចជំនាន់ក្រោយៗទៀត។

ក្នុងឱកាសអញ្ជើញជាអធិបតី ពិធីបើកវគ្គហ្វឹកហ្វឺនយោធិនកាតព្វកិច្ច ជំនាន់ទី១ ឆ្នាំ២០២៦ រៀបចំនៅបញ្ជាការដ្ឋានការពារកោះឆ្នេរ​ ក្នុង​ខេត្តកំពង់ស្ពឺ សម្ដេចមហាបវរធិបតី ហ៊ុន ម៉ាណែត បានអះអាងថា ការបើកវគ្គហ្វឹកហ្វឺនយោធិនកាតព្វកិច្ច ជំនាន់ទី១ ឆ្នាំ២០២៦នេះ គឺចំថ្ងៃពិសេសនៃការអបអរសាទរខួបលើកទី៧៣ ទិវាបុណ្យឯកភាពជាតិ និងថ្ងៃកំណើតនៃកងយោធពលខេមរភូមិន្ទ។

បើតាមប្រសាសន៍របស់សម្ដេចមហាបវរធិបតី នាយករដ្ឋមន្ដ្រីនៃកម្ពុជា, សម្រាប់អ្នកដែលដាក់ពាក្យមិនទាន់បំពេញកាតព្វកិច្ចយោធា សូមរង់ចាំវគ្គបន្ទាប់ដែលនឹងជូនដំណឹងដោយ គណៈកម្មការរបស់ក្រសួងការពារជាតិ ដែលនឹងបញ្ជាក់លម្អិតជាបន្ដបន្ទាប់ ដើម្បីឲ្យយុវជនចូលមកបំពេញកាតព្វកិច្ចយោធា។

សម្ដេចមហាបវរធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «សូមយុវជនស្ម័គ្រចិត្តឆ្នាំនេះមិនទាន់ដាក់ពាក្យបាន សូមបន្ដចុះឈ្មោះតទៀត ហើយគណៈកម្មការក្រសួងការពារជាតិ នឹងបញ្ជាក់លម្អិតបន្ថែមទៀត។ សង្ឃឹមថា ៥,០០០នាក់ ដែលចូលនៅឆ្នាំទី១នេះ នឹងខិតខំតស៊ូរហូតដល់បញ្ចប់កាតព្វកិច្ចរបស់ខ្លួនរយៈពេល២៤ខែ ដែលជាគំរូដល់យោធិនកាតព្វកិច្ចជំនាន់ក្រោយៗទៀត»។

សម្ដេចមហាបវរធិបតីប្រមុខនៃរាជរដ្ឋាភិបាលកម្ពុជា បានគូសបញ្ជាក់ថា ការអនុវត្តកាតព្វកិច្ចយោធាជាការលត់ដំមិនត្រឹមរូបរាងកាយ តែជាការលត់ដំផ្នែកស្មារតី ហើយក្រោយហ្វឹកហ្វឺនរយៈពេល៣ខែ យោធិនកាតព្វកិច្ច នឹងទៅរស់នៅតាមអង្គភាពនីមួយៗ ហើយជាពេលអនុវត្តការរស់នៅបែបជាយោធា ខណៈយោធិនកាតព្វកិច្ចក្រៅពីការហ្វឹកហាត់ហើយនោះ នឹងត្រូវហ្វឹកហ្វឺនយុទ្ធវិធី វិន័យ អត្តចរិត វិន័យ និងរបៀបរស់នៅជាកងទ័ព។

ជាមួយគ្នានោះ សម្ដេចមហាបវរធិបតី ហ៊ុន ម៉ាណែត ក៏បានកោតសរសើរយ៉ាងក្រៃលែង ចំពោះយុវជន​ស្ម័គ្រចិត្តចូលបំពេញកាតព្វកិច្ចយោធាទាំងអស់ និងក្រុមគ្រួសារ ដែលមានភាពក្លាហាន, ឆន្ទៈ​មោះមុត ជាពិសេស គឺស្មារតីភ្ញាក់រលឹក និងការទទួលខុសត្រូវខ្ពស់ក្នុងការបំពេញតួនាទី​ជា​ពល​រដ្ឋដែលស្រឡាញ់ និងស្ម័គ្រចិត្តបម្រើជាតិមាតុភូមិនៅគ្រប់កាលៈទេសៈ។ សម្ដេចបន្ដថា ការចាប់ផ្តើមការហ្វឹកហ្វឺនយោធិនកាតព្វកិច្ចនៅថ្ងៃនេះ គឺជាព្រឹត្តិការណ៍ប្រវត្តិសាស្ត្រសម្រាប់កម្ពុជា។

សម្ដេចមហាបវរធិបតី ហ៊ុន ម៉ាណែត បានបន្ថែមថា ការបំពេញកាតព្វកិច្ចយោធា ជាការទទួលបានឱកាសបប្រើជាតិមាតុភូមិ, ឱកាសហ្វឹកហ្វឺនជំនាញ និងបច្ចេកទេសផ្សេងៗរបស់កងទ័ព, ឱកាសអភិវឌ្ឍន៍ខ្លួន មានដូចជាវិន័យ និងភាពជាអ្នកដឹកនាំ។ បន្ថែមពីលើក្រោយបញ្ចប់កាតព្វកិច្ច នឹងក្លាយជាយោធិនបម្រុង ហើយក៏អាចដាក់ពាក្យប្រលងចូលជាយោធិនអាជីព។

សូមរំលឹកថា ច្បាប់ស្ដីពីកាតព្វកិច្ចយោធា ត្រូវបានអនុម័តដោយរដ្ឋសភាកម្ពុជា នៅថ្ងៃទី១២ ខែឧសភា ឆ្នាំ២០២៦ និងប្រកាសដាក់ឱ្យប្រើប្រាស់ជាផ្លូវការនៅថ្ងៃទី២៣ ខែឧសភា ឆ្នាំ​២០២៦។ ច្បាប់នេះមាន ៨ ជំពូក និង ២០ មាត្រា។ យោធិនកាតព្វកិច្ចជាការអនុវត្តន៍ផែនការពង្រឹងកិច្ចការពារបូរណភាពទឹកដី និងអធិបតេយ្យជាតិ ដ៏មានសារៈសំខាន់មួយ ដែលត្រូវបានគិតគូរចាត់ចែងឱ្យអនុវត្តន៍ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានីតិកាលទី៧នេះ ខណៈច្បាប់នេះមានតាំងពីឆ្នាំ​២០០៦​មកម្ល៉េះ៕