(ព្រៃវែង)៖ លោកបណ្ឌិត ឃួន សុវណ្ណ ទីប្រឹក្សាសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាអនុប្រធានក្រុមការងារចលនាកសាងសមាជិកគណបក្សនៅមូលដ្ឋានខេត្តព្រៃវែង នៅថ្ងៃទី៨ ខែវិច្ឆិកា ឆ្នាំ២០២៦ បានអញ្ជើញចូលរួមចម្រើនព្រះបរិត្តពិធីបុណ្យកឋិនទាន នៅវត្តពោធិរង្សី ហៅវត្តត្រពាំងទឹម ស្ថិតនៅភូមិត្រពាំងទឹម ឃុំព្រាល ស្រុកកញ្ជ្រៀច ខេត្តព្រៃវែង។ ការអញ្ជើញចូលរួមនេះ គឺតំណាងលោក ស្បោង សារ៉ាត ប្រធានក្រុមប្រឹក្សាខេត្ត និងជាប្រធានគណៈកម្មាធិការគណបក្សខេត្តព្រៃវែង។

ពិធីបុណ្យកឋិនទាននេះ រៀបចំឡើងក្នុងគោលបំណងប្រមូលបច្ច័យកសាងសមិទ្ធិផលនានា ក្នុងវត្តពោធិរង្សី ដើម្បីរួមចំណែកអភិវឌ្ឍន៍វិស័យព្រះពុទ្ធសាសនា និងលើកកម្ពស់សោភ័ណភាពវត្តអារាម។ វត្តពោធិរង្សី គឺជាទីសក្ការបូជាដ៏សំខាន់មួយសម្រាប់ប្រជាពលរដ្ឋពុទ្ធបរិស័ទចំណុះជើងវត្ត និងអ្នកភូមិជិតខាង។

ការចូលរួមរបស់លោកបណ្ឌិត ឃួន សុវណ្ណ ក្នុងពិធីបុណ្យដ៏ឧត្តុង្គឧត្តមនេះ បានបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំចំពោះវិស័យសាសនា និងការចូលរួមចំណែកក្នុងការលើកស្ទួយតម្លៃវប្បធម៌ ប្រពៃណីជាតិខ្មែរ។ ពិធីនេះបានប្រព្រឹត្តទៅដោយភាពរីករាយ និងទទួលបានការចូលរួមយ៉ាងច្រើនកុះករពីសំណាក់ពុទ្ធបរិស័ទ ដែលឆ្លុះបញ្ចាំងពីសាមគ្គីភាព និងជំនឿដ៏មុតមាំចំពោះព្រះពុទ្ធសាសនា៕