(ភ្នំពេញ)៖ រាជរដ្ឋាភិបាលកម្ពុជា បានបន្តចាត់ទុកវិស័យសង្គមកិច្ចជាវិស័យអាទិភាព ជាពិសេសផ្តោតលើការអភិវឌ្ឍធនធានមនុស្ស និងសុខាភិបាល ដោយគ្រោងចំណាយថវិកាប្រមាណ១០ ២៥៩ ប៊ីលានរៀល ឬប្រមាណជាង ២.៥ប៊ីលានដុល្លារ នៅឆ្នាំ២០២៧ កើនចំនួន៤,១% ។

យោងតាមសេចក្តីព្រាងច្បាប់ថវិកាជាតិ ឆ្នាំ២០២៧ បានឱ្យដឹងថា ទំហំនេះមានសមាមាត្រស្មើនឹង ៣៧,១% នៃចំណាយចរន្តថវិកាថ្នាក់ជាតិ ត្រូវជា៤,២៨% នៃផ.ស.ស. ឬកើនចំនួន៤,១% ធៀបនឹង ច្បាប់ហិរញ្ញវត្ថុឆ្នាំ២០២៦ ដែលឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលក្នុងការលើកកម្ពស់គុណភាពជីវិតប្រជាពលរដ្ឋ។

អាទិភាពសំខាន់ក្នុងវិស័យនេះត្រូវបានផ្តោតទៅលើការអភិវឌ្ឍមនុស្ស ដើម្បីលើកកម្ពស់គុណភាពអប់រំ និងពង្រីកការទទួលបានសេវាអប់រំប្រកបដោយសមធម៌ទូទាំងប្រទេស។ គោលដៅចម្បងគឺធានាថា ប្រជាពលរដ្ឋគ្រប់រូប ជាពិសេសកុមារ និងយុវជន ទទួលបានឱកាសសិក្សារៀនសូត្រប្រកបដោយគុណភាពខ្ពស់។

ក្នុងចំណោមវិធានការទាំងនោះ រាជរដ្ឋាភិបាលបានផ្តោតលើការផ្តល់អាហារូបករណ៍ដល់គរុសិស្ស និស្សិត និងការប្រែក្លាយសាលាគរុកោសល្យទៅជាវិទ្យាស្ថានគរុកោសល្យភូមិភាគ ដើម្បីលើកកម្ពស់គុណវុឌ្ឍិគ្រូបង្រៀន។ ជាមួយគ្នានេះ ការធ្វើបរិវត្តកម្មឌីជីថលសម្រាប់ការរៀន និងការបង្រៀនតាមប្រព័ន្ធអនឡាញ ក៏ត្រូវបានជំរុញយ៉ាងសកម្ម ដើម្បីបង្កើនសមត្ថភាពសិស្ស គរុសិស្ស គរុនិស្សិត និងគ្រូបង្រៀន ស្របតាមគំរូកម្មវិធីសាលារៀនជំនាន់ថ្មី។ ការកែទម្រង់កម្មវិធីសិក្សា និងការបោះពុម្ពសៀវភៅសិក្សាគោល ក៏ជាចំណុចគន្លឹះក្នុងការធានាគុណភាពអប់រំ។

បន្ថែមពីនេះ រាជរដ្ឋាភិបាលក៏បានយកចិត្តទុកដាក់លើសុខុមាលភាពសិស្ស តាមរយៈការអនុវត្តកម្មវិធីផ្តល់អាហារតាមសាលារៀន គ្របដណ្តប់លើសាលារៀនគោលដៅចំនួន ៩៦០ ក្នុងខេត្តចំនួន ១០ ដែលមានសិស្សប្រមាណ ២៧ ម៉ឺននាក់ទទួលបានអាហារ។ ការបន្តផ្តល់អាហារូបករណ៍ប្រចាំឆ្នាំដល់សិស្សមកពីគ្រួសារមានបណ្ណសមធម៌ និងសិស្សពិការ កំព្រា ជនជាតិភាគតិច និងសិស្សពូកែ ក៏ត្រូវបានអនុវត្ត ដើម្បីកាត់បន្ថយអត្រាបោះបង់ការសិក្សា និងផ្តល់ឱកាសអប់រំប្រកបដោយបរិយាបន្ន។ ការសាងសង់បង្គន់អនាម័យ និងប្រព័ន្ធទឹកស្អាតនៅតាមសាលារៀន ក៏ជាផ្នែកមួយនៃការលើកកម្ពស់បរិស្ថានសិក្សាប្រកបដោយផាសុកភាព និងអនាម័យ។

លើសពីនេះ រដ្ឋាភិបាលនឹងបន្តផ្តោតការយកចិត្តទុកដាក់លើការអភិវឌ្ឍជំនាញ ដើម្បីឆ្លើយតបនឹងតម្រូវការទីផ្សារ ពិសេសនៅក្នុងការអភិវឌ្ឍវិស័យឧស្សាហកម្ម និងការអភិវឌ្ឍវិស័យការងារ និងការរក្សាសុខដុមនីយកម្មនៃទំនាក់ទំនងវិជ្ជាជីវៈ តាមរយៈការពង្រឹងការបណ្តុះបណ្តាលបច្ចេកទេស និងវិជ្ជាជីវៈគ្រប់កម្រិត ដោយផ្តល់អាទិភាពលើកម្រិតទី១ (C1) តាមរយៈការផ្តល់អាហារូបករណ៍ដល់យុវជនក្រីក្រ និងពលករវិលត្រឡប់ពីប្រទេសថៃ ដើម្បីជួយពួកគេឱ្យឆាប់បានចូលទីផ្សារការងារក្នុងស្រុក។

ទន្ទឹមនឹងនេះ ការងារប្រព័ន្ធជាតិអប់រំបណ្តុះបណ្តាលបច្ចេកទេស និងវិជ្ជាជីវៈពីចម្ងាយ ឬតាមអនឡាញ ក៏ត្រូវបានពង្រឹងផងដែរ រួមជាមួយប្រព័ន្ធជាតិវាយតម្លៃទទួលស្គាល់ការសិក្សាពីចម្ងាយ។ រាជរដ្ឋាភិបាលក៏បន្តអភិវឌ្ឍកញ្ចប់ស្តង់ដាបណ្តុះបណ្តាល និងពង្រឹងសមត្ថភាពគ្រូបច្ចេកទេស ព្រមទាំងពង្រីកហេដ្ឋារចនាសម្ព័ន្ធរបស់គ្រឹះស្ថានបណ្តុះបណ្តាលជំនាញវិជ្ជាជីវៈ និងបច្ចេកទេស ដើម្បីធានាការផ្គត់ផ្គង់កម្លាំងពលកម្មប្រកបដោយជំនាញច្បាស់លាស់ និងផលិតភាពខ្ពស់។ ក្រៅពីនេះ ទីភ្នាក់ងារជាតិមុខរបរ និងការងារក៏ដើរតួនាទីយ៉ាងសំខាន់ក្នុងការផ្តល់សេវាស្វែងរកការងារធ្វើជូនយុវជនទាំងក្នុង និងក្រៅប្រទេស។

ដើម្បីធានានូវបរិយាកាសការងារប្រកបដោយសុខដុមរមនា រាជរដ្ឋាភិបាលក៏បានពង្រឹងការគ្រប់គ្រងពលករអន្តោប្រវេសន៍ ការអនុវត្តច្បាប់ការងារប្រកបដោយប្រសិទ្ធភាព និងបន្តគាំទ្រដល់ការអភិវឌ្ឍលក្ខខណ្ឌការងារ សុវត្ថិភាព និងសុខភាពការងារ។ ការពង្រឹងយន្តការបង្ការ ទប់ស្កាត់ និងដោះស្រាយវិវាទការងារនៅគ្រប់ដំណាក់កាល ព្រមទាំងយុទ្ធនាការលើកកម្ពស់សិទ្ធិការងារ និងកិច្ចសន្ទនាសង្គម ក៏ជាចំណុចស្នូលក្នុងការរក្សាសុខដុមនីយកម្មនៃទំនាក់ទំនងវិជ្ជាជីវៈ ឆ្ពោះទៅរក «សហគ្រាសមួយជាសហគមន៍សុខសាន្តមួយ»។

គម្រោងថវិកានេះ ក៏ត្រូវបែងចែកដើម្បីលើកកម្ពស់គុណភាពសេវាសុខាភិបាល និងពង្រីកការទទួលបានសេវាថែទាំសុខភាពឆ្ពោះទៅរកការគ្របដណ្តប់សុខភាពជាសកល ពិសេសសម្រាប់ប្រជាជនក្រីក្រ ក្រុមជនងាយរងគ្រោះ ស្ត្រី និងកុមារ។ ក្នុងនោះ រដ្ឋាភិបាលនឹងបន្តផ្តល់ថវិកាទ្រទ្រង់ប្រតិបត្តិការមន្ទីរពេទ្យបង្អែក មណ្ឌលសុខភាព និងប៉ុស្តិ៍សុខភាពទូទាំងប្រទេស ព្រមទាំងបង្កើនថវិកាសម្រាប់ការផ្គត់ផ្គង់ឱសថ វ៉ាក់សាំង ប្រតិករ និងបរិក្ខារពេទ្យ។ ការគាំទ្រមូលនិធិមន្ទីរពេទ្យគន្ធបុប្ផា និងកម្មវិធីមូលនិធិសមធម៌សុខាភិបាល ក៏នឹងបន្តត្រូវបានពង្រឹង ដើម្បីធានាការផ្តល់សេវាព្យាបាលដោយឥតគិតថ្លៃ។

បន្ថែមពីលើនេះ ថវិកាក៏នឹងត្រូវប្រើប្រាស់ដើម្បីបន្តគាំទ្រដល់ការអនុវត្តកម្មវិធីជំនួយសង្គមនានា រួមមានកម្មវិធីឧបត្ថម្ភគោលសម្រាប់គ្រួសារក្រីក្រ ជនចាស់ជរា ជនមានពិការភាព អ្នកផ្ទុកមេរោគអេដស៍ និងការផ្តល់អាហារូបករណ៍ដល់សិស្សក្នុងគ្រួសារក្រីក្រ។

ជាមួយគ្នានេះ រាជរដ្ឋាភិបាលក៏បន្តផ្តល់ការគាំទ្រដល់អាទិភាពផ្សេងទៀតក្នុងវិស័យសង្គមកិច្ច ដូចជារបបសន្តិសុខសង្គមសម្រាប់អតីតមន្ត្រីរាជការស៊ីវិល និងអតីតយុទ្ធជន ការឧបត្ថម្ភរបបគោលនយោបាយជូនជនរងគ្រោះដោយសារគ្រឿងញៀន និងការលើកកម្ពស់យេនឌ័រជាដើម។ ការប្តេជ្ញាចិត្តនេះបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលក្នុងការកសាងសង្គមមួយដែលមានភាពធន់ និងសមធម៌សម្រាប់ប្រជាពលរដ្ឋគ្រប់រូប៕