(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានថ្លែងណែនាំឲ្យមានការបញ្ជូនសិស្សនិស្សិត ទៅរៀនសូត្រនៅក្រៅប្រទេស លើជំនាញគ្រប់គ្រងបណ្ណសារដ្ឋាន ព្រោះផ្នែកបណ្ណសារដ្ឋាននេះ ជាផ្នែកមួយដែលត្រូវមានសំខាន់ និងចាំបាច់ ពិសេសក្នុងដំណាក់កាល AI ជំនាញនេះត្រូវតែមានចាំបាច់។

ការថ្លែងណែនាំរបស់សម្តេចមហាបវរធិបតី ហ៊ុន ម៉ាណែត ធ្វើឡើងក្នុងឱកាសសម្តេចមហាបវរធិបតី អញ្ជើញបើកកម្មវិធីពិព័រណ៍ខួប១០០ឆ្នាំ នៃបណ្ណសារដ្ឋានជាតិនៃកម្ពុជា នាព្រឹកថ្ងៃទី០៤ ខែវិច្ឆិកា ឆ្នាំ២០២៦។

សម្តេចមហាបវរធិបតី ហ៊ុន ម៉ាណែត បានថ្លែងឲ្យដឹងថា សម្រាប់ជំនាញបណ្ណសារដ្ឋា ជំនាញបណ្ណល័យនេះ គឺមានជំនាញ តាំងពីបរិញ្ញាបត្រ បញ្ញាបត្រជាន់ខ្ពស់ រហូតដល់ថ្នាក់បណ្ឌិត (PHD) ដោយនៅក្រៅប្រទេសមានបង្រៀន។ សម្រាប់បណ្ណល័យជាតិ មានបរិញ្ញាបត្រ, បរិញ្ញាបត្រជាន់ខ្ពស់ និង PHD លើការគ្រប់គ្រងព័តមាន និងឯកសារ [......]។

សម្តេចមហាបវរធិបតីបានបញ្ជាក់ថា ដូច្នេះយើងខិតខំធ្វើយ៉ាងណាទាំងលើការបណ្ដុះបណ្ដាលរយៈពេលខ្លី និងរកវិធី ក្នុងការបណ្ដុះបណ្ដាលរយៈពេលវែង ហើយសម្រាប់ថ្នាក់គ្រប់គ្រងបណ្ណសារដ្ឋាន បើបើកនៅប្រទេសកម្ពុជា ក៏បើមិនកើតនោះដែរ ដោយសារតែមានសិស្សរៀនតិច ទោះមានគ្រូបង្រៀនក៏នៅតែលំបាក។

សម្តេចមហាបវរធិបតី ហ៊ុន ម៉ាណែត បានបញ្ជាក់ថា «ខ្ញុំបាននិយាយជាមួយឯកឧត្តម វង្សី វិស្សុតថា ប្រសិនបើត្រូវបញ្ជូនសិស្សផ្នែកបណ្ណសារដ្ឋាន នេះទៅរៀនក្រៅប្រទេសគឺបញ្ជូនចុះ ព្រោះថ្ងៃក្រោយយើងត្រូវតែមានអ្នកជំនាញ លើការគ្រប់គ្រងបណ្ណសារដ្ឋាន ទោះបីជាមិនបាន PHD ក៏ត្រូវបរិញ្ញាបត្រក៏បាន [.....] ព្រោះក្នុងដំណាក់កាល AI ជំនាញនេះត្រូវតែមាន និងចាំបាច់ផងដែរ»។

សម្តេចមហាបវរធិបតីបានបញ្ជាក់ថា «ដូច្នេះឯកឧត្តម វង្សី វិស្សុត ត្រូវរៀបចំកិច្ចការងារនេះជាមួយដៃគូរ ឬត្រូវគិតគូរក្នុងការផ្ដល់អាហាររូបករណ៍រដ្ឋ ទៅបន្ដការសិក្សា។ ចំពោះការសិក្សាផ្នែកបណ្ណសារដ្ឋាននេះត្រូវសិក្សារយៈពេល៤-៦ឆ្នាំ ដែលទាមទារឲ្យមានជំនាញច្បាស់លាស់ ដូច្នេះការសិក្សាផ្នែកបណ្ណសារដ្ឋាននេះ គឺសំខាន់ណាស់»៕