(កំពង់ឆ្នាំង)៖ នាយឧត្តមសេនីយ៍ សឹង សំណាង អគ្គមេបញ្ជាការរងនៃកងយោធពល​ខេមរ​ភូមិន្ទ និងជាមេបញ្ជាការកងទ័ពជើងអាកាស និងលោកស្រី អ៊ូ សិទ្ធិរី រួមជាមួយលោក លោក​ស្រី ជាមេបញ្ជាការរង នាយទាហាននៃបញ្ជាការដ្ឋានកងទ័ពជើងអាកាស និងពុទ្ធបរិស័ទជា​ច្រើន​នាក់ នៅវេលាព្រឹកថ្ងៃអាទិត្យ ទី១ ខែតុលា ឆ្នាំ២០២៦នេះ បានដង្ហែអង្គកឋិន​ទាន​សាមគ្គីទៅវេរប្រគេនព្រះសង្ឃគង់ចាំព្រះវស្សា នៅវត្តវាលុកថុល្លារាម ហៅវត្តទួលខ្សាច់ ក្នុងឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។

វត្តវាលុកថុល្លារាម ជាវត្តមួយកំពុងមានតម្រូវការចាំបាច់នូវបច្ច័យសម្រាប់​សាងសង់សមិទ្ធ​ផល​នានាក្នុងវត្ត បម្រើដល់ការគោរពប្រណិប័តន៍របស់ ព្រះសង្ឃ និងប្រជាពុទ្ធបរិស័ទចំណុះ​ជើង​វត្ត។ បច្ច័យបានកើតចេញពីសទ្ធាដ៏ជ្រះថ្លានៃអង្គ​ក​ឋិនផ្តួចផ្តើមដោយនាយឧត្តម​សេ​នី​យ៍ សឹង សំណាង និងលោកស្រី អ៊ូ សិទ្ធិរី ប្រមូលបច្ច័យសរុបប្រមាណជា ៣៣លាន​រៀល​សម្រាប់ចូលរួមកសាងសមិទ្ធផលនានានៅក្នុងវត្ត។

ក្នុងឱកាសនោះ នាយឧត្តមសេនីយ៍ សឹង សំណាង បានបង្ហាញទឹកចិត្តសប្បាយរីករាយ​ជា​ខ្លាំង ចំពោះការចូលរួមពីលោកមេបញ្ជាការរង នាយទាហាន និងពលទាហានទាំងអស់​នៃ​បញ្ជាការដ្ឋានកងទ័ពអាកាស និងពុទ្ធបរិស័ទជិតឆ្ងាយ បានមូលចិត្តមូលគំនិតគ្នារៀបចំ​បុណ្យ​កឋិនទានសាមគ្គីនេះឡើង។

នាយឧត្តមសេនីយ៍ សឹង សំណាង បានថ្លែងអំណរគុណយ៉ាងជ្រាវជ្រៅបំផុត ចំពោះការចូល​រួម​បច្ច័យអង្គព្រះកឋិនទានពីអស់លោក លោកស្រី ជាមេបញ្ជាការរងនាយទាហាន នាយទា​ហានរង ពលទាហានកងទ័ពជើងអាកាស និងមេបញ្ជាការកងការពារអាកាស​អគ្គបញ្ជា​ការ និងពុទ្ធបរិស័ទបានរួបរួមគ្នា ដង្ហែមកប្រគេនព្រះសង្ឃគង់ចាំព្រះវស្សានៅ​វត្តវា​លុកថុល្លា​រាម ក្នុងស្រុករលាប្អៀរ។

សូមរំលឹកថា នាយឧត្តមសេនីយ៍ សឹង សំណាង និងភរិយា តែងបានដឹកនាំនាយទាហាន និង​ក្រុមគ្រួសារក្នុងបញ្ជាការដ្ឋានកងទ័ពជើងអាកាស ចូលរួមពិធីបុណ្យផ្កាសាមគ្គី ដង្ហែទៀន​ព្រះវស្សា ពិធីបុណ្យភ្ជុំបិណ្ឌ និងពិធីបុណ្យផ្សេងៗទៀត ដើម្បីប្រមូលបច្ច័យកសាង​ហេដ្ឋារច​នា​សម្ព័ន្ធក្នុងទីអារាម ទុកជូនប្រជាពលរដ្ឋ និងពុទ្ធបរិស័ទ្ធគោរពបូជា តាមគន្លងប្រពៃណី និង​ទំនៀមទម្លាប់ខ្មែរ។

កម្លាំងសទ្ធាជ្រះថ្លាដែលកើតមានពីអង្គ​ក​ឋិនទាន និងដើម្បីឧទ្ទិសកុស​លផលបុណ្យជូនដល់​វិញ្ញាណក្ខន្ធវិរកងទ័ព បុព្វការីជនមានមាតា បិតា ជីដូនជីតាញាតិការទាំង៧សណ្តាន និង​ឧទ្ទិស​ដល់វិញ្ញាណក្ខន្ធយុទ្ធជនយុទ្ធនារីដែលបានពលីជីវិតដើម្បីបុព្វហេតុជាតិមាតុភូមិ៕