(កំពង់ធំ)៖ ថ្ងៃទី៣០ ខែតុលា ឆ្នាំ២០២៦ លោក នួន ផារ័ត្ន អភិបាលខេត្តកំពង់ធំ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ និងលោកស្រី បានដឹកនាំចែកអំណោយមនុស្សធម៌របស់សាខាកាកបាទក្រហមកម្ពុជាខេត្តកំពង់ធំ ជូនដល់ប្រជាពលរដ្ឋដែលមានជីវភាពខ្វះខាតចំនួន ៨២គ្រួសារ អញ្ជើញមកពី៥ឃុំ នៅក្នុងស្រុកសណ្ដាន់ ខេត្តកំពង់ធំ ដើម្បីចូលរួមសម្រាលការលំបាកក្នុងជីវភាពរស់នៅប្រចាំថ្ងៃ និងបង្ហាញពីការយកចិត្តទុកដាក់ចំពោះប្រជាពលរដ្ឋដែលកំពុងជួបការខ្វះខាត។

ក្នុងឱកាសចែកអំណោយមនុស្សធម៌នេះ លោក នួន ផារ័ត្ន បានគូសបញ្ជាក់ពីសារៈសំខាន់ នៃសកម្មភាពមនុស្សធម៌ ដែលជាការចូលរួមជួយគ្នាក្នុងសង្គម ជាពិសេសការយកចិត្តទុកដាក់ចំពោះគ្រួសារដែលមានជីវភាពលំបាក និងត្រូវការជំនួយជាចាំបាច់។ ការចុះជួបសួរសុខទុក្ខ និងនាំយកអំណោយទៅដល់ប្រជាពលរដ្ឋដោយផ្ទាល់នេះ គឺជាការបង្ហាញពីស្មារតីសាមគ្គីភាព ការចែករំលែក និងការមិនបោះបង់ចោលប្រជាពលរដ្ឋដែលកំពុងជួបការលំបាក។

លោកបានបន្ដថា ដោយមានការយកចិត្តទុកដាក់ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា មិនទុកឱ្យបងប្អូនប្រជាពលរដ្ឋអត់ស្បៀងនោះឡើយ។ ទីណាមានទុក្ខលំបាក ទីនោះមានកាកបាទក្រហមកម្ពុជាចុះដល់លំនៅឋាន ដើម្បីស្វែងយល់ពីស្ថានភាពជាក់ស្ដែង និងផ្ដល់ជំនួយមនុស្សធម៌ទៅតាមលទ្ធភាព និងតម្រូវការចាំបាច់របស់ប្រជាពលរដ្ឋ។ការផ្ដល់ជំនួយនេះ មិនត្រឹមតែជាការចែករំលែកសម្ភារៈជួយដល់ជីវភាពរស់នៅប៉ុណ្ណោះទេ ប៉ុន្តែថែមទាំងជាការផ្ដល់កម្លាំងចិត្ត និងភាពកក់ក្ដៅដល់គ្រួសារដែលកំពុងប្រឈមនឹងការលំបាកផងដែរ។ ជាពិសេស ការយកចិត្តទុកដាក់ចំពោះប្រជាពលរដ្ឋនៅតាមមូលដ្ឋាន គឺជាកិច្ចការមនុស្សធម៌ដែលត្រូវការការចូលរួមពីគ្រប់ភាគី ដើម្បីធានាថា អ្នកដែលមានតម្រូវការជំនួយពិតប្រាកដ អាចទទួលបានការគាំទ្រសមស្រប។

លោក នួន ផារ័ត្ន បានបង្ហាញថាសកម្មភាពចែកអំណោយដល់ប្រជាពលរដ្ឋចំនួន ៨២គ្រួសារ នៅស្រុកសណ្ដាន់ បានបង្ហាញពីការបន្តអនុវត្តបេសកកម្មមនុស្សធម៌របស់សាខាកាកបាទក្រហមកម្ពុជាខេត្តកំពង់ធំ ក្នុងការចូលរួមជួយសម្រាលទុក្ខលំបាករបស់ប្រជាពលរដ្ឋនៅក្នុងមូលដ្ឋាន។

សកម្មភាពនេះក៏ជាសាររំលឹកឱ្យមានការចែករំលែក និងជួយយកអាសាគ្នាទៅវិញទៅមកក្នុងសង្គម ដោយមិនប្រកាន់វណ្ណៈ ឬឋានៈឡើយ។ ស្មារតីមនុស្សធម៌ និងការរួបរួមគ្នាជួយអ្នកដែលកំពុងជួបការលំបាក គឺជាកត្តាសំខាន់ក្នុងការកសាងសហគមន៍មួយដែលមានភាពកក់ក្ដៅ និងការយកចិត្តទុកដាក់ចំពោះគ្នាទៅវិញទៅមក។ តាមរយៈសកម្មភាពនេះ សាខាកាកបាទក្រហមកម្ពុជាខេត្តកំពង់ធំ បានបន្តបង្ហាញពីការចូលរួមក្នុងបេសកកម្មមនុស្សធម៌ ដោយយកចិត្តទុកដាក់ដល់សុខទុក្ខរបស់ប្រជាពលរដ្ឋ និងខិតខំជួយសម្រាលការលំបាកជូនគ្រួសារដែលមានជីវភាពខ្វះខាតនៅតាមមូលដ្ឋាន។

សូមបញ្ជាក់ថា សម្រាប់ប្រជាពលរដ្ឋដែលមានជីវភាពខ្វះខាតចំនួន៨២គ្រួសារក្នុងមួយគ្រួសារទទួលបាននូវ អង្ករ៣០គីឡូក្រាម មី១កេស ទឹកត្រី១យួរ ទឹកស៊ីអ៉ីប១យួរ ត្រីខ១យួរ និងថវិកា៥ម៉ឺនរៀលផងដែរ៕