(ស្វាយរៀង)៖ លោកបណ្ឌិត សម តារា តំណាងរាស្ត្រមណ្ឌលស្វាយរៀង រួមជាមួយក្រុមការងារខេត្ត បានអញ្ជើញចូលរួមពិធីបុណ្យរំលែកទុក្ខសព លោកអគ្គមហាឧបាសកពុទ្ធសាសនូបត្ថម្ភក៍ កែវ ឆាន់ ដែលបានទទួលមរណភាព កាលពីថ្ងៃសៅរ៍ ១៣កើត ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៤ ខែតុលា ឆ្នាំ២០២៦ វេលាម៉ោង៦:៣៩ នាទីព្រឹក ក្នុងជន្មាយុ ៨៣ឆ្នាំ។ ពិធីបុណ្យនេះត្រូវបានប្រារព្ធឡើងនៅវត្តទួលតាព្រហ្ម ភូមិស្វាយតាភ្ល ឃុំបាសាក់ ស្រុកស្វាយជ្រុំ ខេត្តស្វាយរៀង កាលពីល្ងាចថ្ងៃទី២៧ ខែតុលា ឆ្នាំ២០២៦។

វត្តមានរបស់លោកបណ្ឌិត សម តារា ក្នុងពិធីបុណ្យនេះ គឺដើម្បីចូលរួមសម្តែងនូវក្តីសោកស្តាយ និងរំលែកទុក្ខដ៏ក្រៀមក្រំជាមួយក្រុមគ្រួសារសព ដែលបានបាត់បង់នូវឪពុក ជីតា និងជាពុទ្ធសាសនូបត្ថម្ភក៍ដ៏ឆ្នើមមួយរូប។ ការបាត់បង់លោក កែវ ឆាន់ គឺជាការបាត់បង់នូវធនធានមនុស្សដ៏មានតម្លៃ ដែលបានលះបង់កម្លាំងកាយចិត្តក្នុងការទ្រទ្រង់ព្រះពុទ្ធសាសនា និងចូលរួមចំណែកយ៉ាងសកម្មក្នុងការអភិវឌ្ឍសង្គមជាតិ។

ក្នុងឱកាសដ៏សែនក្រៀមក្រំនេះ លោកបណ្ឌិត សម តារា បានបួងសួងដល់ដួងវិញ្ញាណក្ខន្ធ លោកអគ្គមហាឧបាសកពុទ្ធសាសនូបត្ថម្ភក៍ កែវ ឆាន់ សូមបានចាប់បដិសន្ធិក្នុងសុគតិភពកុំបីឃ្លៀងឃ្លាតឡើយ។ នេះជាកាយវិការដ៏ថ្លៃថ្លាដែលបង្ហាញពីការគោរព និងការយកចិត្តទុកដាក់ចំពោះព្រឹទ្ធាចារ្យ និងពុទ្ធសាសនូបត្ថម្ភក៍ដ៏សំខាន់រូបនេះ៕