(ពោធិ៍សាត់)៖ នាព្រឹកថ្ងៃអង្គារ ១រោជ ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៧ ខែតុលា ឆ្នាំ២០២៦នេះ ក្រុមប្រឹក្សាខេត្តពោធិ៍សាត់ បានរៀបចំវេទិកាផ្សព្វផ្សាយ និងពិគ្រោះយោបល់ ឆ្នាំទី៣ អាណត្តិទី៤ នៅសាលាស្រុកក្រគរ ក្នុងគោលបំណងប្រមូលនូវរាល់មតិយោបល់ បញ្ហាប្រឈម និងសំណូមពរនានារបស់ប្រជាពលរដ្ឋក្នុងមូលដ្ឋាន យកមកពិភាក្សា ស្រាយបំភ្លឺ និងធ្វើការដោះស្រាយឱ្យបានចំគោលដៅ ប្រកបដោយប្រសិទ្ធភាព សុក្រឹតភាព និងទាន់ពេលវេលា។

អង្គវេទិកាទាំងមូលបានប្រព្រឹត្តទៅក្រោមអធិបតីភាព លោក ម៉ៅ សាន សមាជិកក្រុមប្រឹក្សាខេត្ត តំណាងលោក ម៉ក់ រ៉ា ប្រធានក្រុមប្រឹក្សាខេត្តពោធិ៍សាត់ និងលោក ងួន ប៉ោសេង អភិបាលរងខេត្ត តំណាងលោក ខូយ រីដា អភិបាលខេត្ត ដោយបានការចូលរួមពីសំណាក់លោក លោកស្រី សមាជិក សមាជិកាក្រុមប្រឹក្សាខេត្ត ក្រុមប្រឹក្សាស្រុក គណៈអភិបាលស្រុក ក្រុមវាគ្មិនតំណាងមន្ទីរ-អង្គភាពជុំវិញខេត្ត មន្ត្រីរាជការការិយាល័យជុំវិញស្រុក មេឃុំ តំណាងវិស័យឯកជន ព្រមទាំងបងប្អូនប្រជាពលរដ្ឋក្នុងស្រុកក្រគរ ប្រមាណជាង ៣០០នាក់។

ថ្លែងនៅក្នុងឱកាសនោះ លោក ម៉ៅ សាន សមាជិកក្រុមប្រឹក្សាខេត្ត បានមានប្រសាសន៍ថា វេទិកានាថ្ងៃនេះពិតជាបានបង្ហាញយ៉ាងច្បាស់ពីការប្តេជ្ញាចិត្តយ៉ាងមុតមាំ ក្នុងការចូលរួមសហការ និងជំរុញដំណើរការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ស្របតាមក្របខ័ណ្ឌយុទ្ធសាស្ត្រ ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីទទួលបាននូវលទ្ធផលជោគជ័យថ្មីៗបន្ថែមទៀត ក្នុងការឆ្លើយតបទៅនឹងសេចក្តីត្រូវការពិតប្រាកដ របស់ប្រជាពលរដ្ឋនៅមូលដ្ឋាន។

លោកបានគូសបញ្ជាក់បន្ថែមថា វេទិកានេះផ្តល់ឱកាសដល់ប្រជាពលរដ្ឋ និងភាគីពាក់ព័ន្ធទាំងអស់មានសិទ្ធិស្មើៗគ្នា ក្នុងការទទួលបានព័ត៌មានស្តីពីសមិទ្ធផលនានា ដែលរដ្ឋបាលខេត្តសម្រេចបាននាពេលកន្លងមក។ ប្រជាពលរដ្ឋអាចលើកឡើងដោយផ្ទាល់អំពីបញ្ហាប្រឈម សុខទុក្ខ និងសំណូមពរផ្សេងៗដែលកើតមានក្នុងមូលដ្ឋាន ជូនទៅកាន់អាជ្ញាធរស្រុក ក្រុមប្រឹក្សាខេត្ត និងគណៈអភិបាលខេត្ត ដើម្បីរួមគ្នាពិនិត្យ ពិភាក្សា និងរកដំណោះស្រាយ។

លោកបន្តថា រាល់មតិយោបល់ សំណួរ និងសំណូមពរ គឺជាធាតុចូលដ៏មានតម្លៃ និងជាសក្តានុពលដ៏ធំធេងដែលជួយឱ្យអាជ្ញាធរគ្រប់ថ្នាក់អាចឆ្លុះបញ្ចាំងពីចំណុចខ្វះខាត និងកំណត់បាននូវបញ្ហាអាទិភាពពិតប្រាកដ។ ចំពោះករណីដែលមិនទាន់អាចដោះស្រាយបានភ្លាមៗក្នុងវេទិកា អាជ្ញាធរស្រុក មន្ទីរជំនាញ និងរដ្ឋបាលខេត្ត នឹងស្រង់យកទៅពិភាក្សាជម្រៅបន្ថែម ដើម្បីដោះស្រាយជូននៅពេលក្រោយ ដោយដាច់ខាត «មិនទុកបញ្ហា និងសំណូមពររបស់ប្រជាពលរដ្ឋចោល ឬគេចវេសឡើយ»។

នៅក្នុងឱកាសនោះដែរ លោក ងួន ប៉ោសេង អភិបាលរងខេត្ត បានពាំនាំនូវអនុសាសន៍ណែនាំដ៏ខ្ពង់ខ្ពស់ និងបានផ្តាំផ្ញើដល់អាជ្ញាធរដែនដី និងមន្ត្រីរាជការគ្រប់លំដាប់ថ្នាក់ ត្រូវបន្តយកចិត្តទុកដាក់អនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ទាំង៧ចំណុច ឱ្យមានប្រសិទ្ធភាពខ្ពស់បំផុត។ ត្រូវខិតខំជំរុញការផ្តល់សេវាសាធារណៈជូនប្រជាពលរដ្ឋឱ្យបានលឿន រហ័ស និងតម្លាភាព ដោយត្រូវយល់ដឹង និងលុបបំបាត់ឱ្យបានដាច់ខាតនូវអំពើពុករលួយ ដែលអាចកើតមានក្នុងការធ្វើលិខិតស្នាមផ្សេងៗ។

លោកបន្ថែមថា មន្ត្រីរាជការទាំងអស់ត្រូវផ្លាស់ប្តូរឥរិយាបថពី «អ្នកគ្រប់គ្រង ឬមន្ត្រី» ទៅជា «អ្នកបម្រើសេវា» ដោយត្រូវចាត់ទុកថា «ប្រជាពលរដ្ឋគឺជាចៅហ្វាយរបស់យើងទាំងអស់គ្នា»។

ចំពោះសំណួរ និងសំណូមពរ ព្រមទាំងក្តីកង្វល់ ទាំងផ្ទាល់មាត់ និងលិខិត ដែលប្រជាពលរដ្ឋបានលើកឡើង មានសរុបចំនួន៣១ករណី ពាក់ព័ន្ធនឹងវិស័យសុខាភិបាល, វិស័យអភិវឌ្ឍន៍ជនបទ, វិស័យផែនការ, រដ្ឋបាលស្រុកក្រគរ, វិស័យកសិកម្ម រុក្ខាប្រមាញ់ និងនេសាទ, វិស័យសង្គមកិច្ច អតីតយុទ្ធជន និងយុវនីតិសម្បទា, វិស័យសាធារណការ, វិស័យរៀបចំដែនដី នគរូបនីយកម្ម និងសំណង់, វិស័យអប់រំ, វិស័យធនធានទឹក, វិស័យស្នងការដ្ឋាននគរបាលខេត្ត។ ក្នុងនោះអាជ្ញាធរ និងមន្ទីរជំនាញ ដោះស្រាយបាន១៣ករណី និង១៨ករណីទៀត ត្រូវដាក់បញ្ចូលក្នុងគម្រោងផែនការ ដើម្បីផ្ញើជូនទៅក្រសួងមហាផ្ទៃ និងស្ថាប័នពាក់ព័ន្ធ ក្នុងពេលឆាប់ៗខាងមុខនេះ។

ក្នុងនាមក្រុមប្រឹក្សាខេត្ត លោក ម៉ៅ សាន សូមថ្លែងអំណរគុណយ៉ាងជ្រាលជ្រៅ ចំពោះ រដ្ឋបាលស្រុកក្រគរ និងអ្នកពាក់ព័ន្ធនានា ដែលបានជួយសម្របសម្រួលវេទិកាផ្សព្វ ផ្សាយ និងពិគ្រោះយោបល់នាថ្ងៃនេះ ប្រកបដោយស្មារតីទទួលខុសត្រូវខ្ពស់៕