(ភ្នំពេញ)៖ នាថ្ងៃទី២៧ ខែតុលា ឆ្នាំ២០២៦ ក្នុងឱកាសរៀបចំ វេទិកាថ្នាក់ជាតិស្តីពី «ហិរញ្ញប្បទានសម្រាប់សហគ្រាសធុនមីក្រូ តូច និងមធ្យម (MSMEs)» លើកទី១ ឆ្នាំ២០២៦ ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs», ធនាគារអភិវឌ្ឍន៍ជនបទ និងកសិកម្ម (ARDB) និងសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានចុះហត្ថលេខាលើអនុស្សរណៈនៃការយោគយល់គ្នា ដើម្បីពង្រឹងកិច្ចសហប្រតិបត្តិការក្នុងការគាំទ្រ និងអភិវឌ្ឍ MSMEs នៅកម្ពុជា។

អនុស្សរណៈនេះចុះហត្ថលេខាដោយ លោកបណ្ឌិត កៅ ថាច ប្រតិភូរាជរដ្ឋាភិបាល​ទទួលបន្ទុក​ជាអគ្គនាយកធនាគារ ARDB និង ឧកញ៉ា តែ តាំងប៉ ប្រធានក្រុមប្រឹក្សាភិបាល FASMEC។

កិច្ចសហប្រតិបត្តិការនេះ មានគោលបំណងសំខាន់ៗរួមមាន៖ (១) ពង្រីកលទ្ធភាពទទួលបាន​ហិរញ្ញប្បទានសម្រាប់ MSMEs ជាពិសេសក្នុងវិស័យកសិឧស្សាហកម្ម និងកសិអេកូទេសចរណ៍, (២) លើកកម្ពស់សមត្ថភាព MSMEs ក្នុងការរៀបចំផែនការអាជីវកម្ម និងការគ្រប់គ្រងហិរញ្ញវត្ថុ និង (៣) ពង្រឹងកិច្ចសហប្រតិបត្តិការ ការបណ្តុះបណ្តាល និងការផ្លាស់ប្តូរចំណេះដឹងរវាងភាគីទាំងពីរ។

កិច្ចសហប្រតិបត្តិការនេះ គឺជាជំហានដ៏សំខាន់ក្នុងការពង្រីកលទ្ធភាពទទួលបានហិរញ្ញប្បទាន និងគាំទ្រដល់ការរីកចម្រើនប្រកបដោយចីរភាពរបស់ MSMEs នៅកម្ពុជា។

វេទិកាថ្នាក់ជាតិស្តីពី «ហិរញ្ញប្បទានសម្រាប់សហគ្រាសធុនមីក្រូ តូច និងមធ្យម (MSMEs)» លើកទី១ ឆ្នាំ២០២៦នេះមានរយៈពេល២ថ្ងៃចាប់ពីថ្ងៃទី២៧ និងទី២៨ ខែតុលា ឆ្នាំ២០២៦នៅមជ្ឈមណ្ឌលសន្និបាត និងពិព័រណ៍កោះពេជ្រ (អគារ A, B និង C) រាជធានីភ្នំពេញ៕