រដ្ឋមន្ត្រីក្រសួងសុខាភិបាល គាំទ្រការបណ្តុះ បណ្តាលបច្ចេកទេសព្យាបាលតាមបែប Osteopathy ជូនដល់អ្នកជំនាញវិជ្ជាជីវៈសុខាភិបាល
27-10-2026 10:39
(ភ្នំពេញ)៖ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នៅថ្ងៃទី២៦ ខែតុលា ឆ្នាំ២០២៦ បានសម្ដែងការគាំទ្រយ៉ាងពេញទំហឹងចំពោះការបណ្ដុះបណ្ដាលជំនាញ បច្ចេកទេសព្យាបាលបែបអូស្តេអូប៉ាទី (Osteopathy) ជូនអ្នកវិជ្ជាជីវៈសុខាភិបាលនៃមន្ទីរពេទ្យកុមារជាតិ ដើម្បីលើកកម្ពស់សុខុមាលភាពវិស័យសុខាភិបាលនៅកម្ពុជា។
ក្នុងឱកាសដំណើរសួរសុខទុក្ខរបស់សិក្ខាកាមក្នុងមន្ទីរពេទ្យកុមារជាតិ លោកសាស្ត្រាចារ្យ ឈាង រ៉ា បានបញ្ជាក់យ៉ាងដូច្នេះថា៖ «ខ្ញុំបានប្រកាសគាំទ្រយ៉ាងពេញទំហឹង ចំពោះជំនាញបច្ចេកទេសព្យាបាលតាមបែប Osteopathy ដោយសារវិធីព្យាបាលមិនប្រើប្រាស់ថ្នាំនោះទេ ប៉ុន្ដែមានប្រសិទ្ធភាពខ្ពស់ក្នុងការព្យាបាលអ្នកជំងឺ»។
លោកសាស្ត្រាចារ្យ បានលើកទឹកដល់សិក្ខាកាមឲ្យខិតខំប្រឹងប្រែងសិក្សារៀនសូត្រ ខណៈដែលមានអ្នកជំនាញជនជាតិបារាំងរបស់អង្គការហត្ថាវេជ្ជសាស្រ្ត បានលះបង់កម្លាំងកាយចិត្ត និងចែករំលែកជំនាញ និងចំណេះដឹងបច្ចេកទេសជូនអ្នកជំនាញវិជ្ជាជីវៈក្នុងវិស័យសុខាភិបាលកម្ពុជា។
អង្គការហត្ថាវេជ្ជសាស្ត្រ បានសហការជាមួយមន្ទីរពេទ្យកុមារជាតិ បានរៀបចំវគ្គបណ្ដុះបណ្ដាលបច្ចេកទេសជំនាញលំនឹងសរីរាង្គ (Osteopathy) ថ្នាក់មូលដ្ឋានជូនដល់អ្នកជំនាញវិជ្ជាជីវៈសុខាភិបាលនៃមន្ទីរពេទ្យកុមារជាតិ ដើម្បីពង្រីកបន្ថែមចំណេះដឹង និងជំនាញព្យាបាលចលនាដោយប្រើប្រាស់ដៃ សំដៅពង្រឹងសមត្ថភាពវិជ្ជាជីវៈ និងលើកកម្ពស់ការថែទាំអ្នកជំងឺ។
លោក សៀម ដានិត អ្នកសម្របសម្រួលរបស់អង្គការហត្ថាវេជ្ជសាស្រ្ដបានមានប្រសាសន៍ថា កម្មវិធីបណ្ដុះបណ្ដាលនេះដឹកនាំដោយស្ថាបនិកអង្គការហត្ថាវេជ្ជសាស្ត្រ គឺលោកវេជ្ជបណ្ឌិត Patrick Jouhaud ជាសាស្រ្ដាចារ្យបណ្ដុះបណ្ដាលនៃជំនាញលំនឹងសរីរាង្គ(Osteopathy) ជនជាតិបារាំង ដែលមានគោលបំណងផ្ដល់ចំណេះដឹង និងបច្ចេកទេសថ្មីៗបន្ថែមដល់គ្រូពេទ្យដែលមានជំនាញវិជ្ជាជីវៈស្រាប់ ដើម្បីពង្រីកសមត្ថភាពក្នុងការពិនិត្យ និងថែទាំអ្នកជំងឺ។
លោកបានបញ្ជាក់ថា៖ «គ្រូពេទ្យភាគច្រើនមានជំនាញព្យាបាលរៀងៗខ្លួនរួចហើយ ប៉ុន្តែវគ្គបណ្ដុះបណ្ដាលនេះផ្ដល់ជាមូលដ្ឋានថ្មីនូវចំណេះដឹងបន្ថែមអំពីបច្ចេកទេស Osteopathy ដែលផ្ដោតលើការប្រើប្រាស់ដៃក្នុងការពិនិត្យ និងថែទាំអ្នកជំងឺ ដើម្បីស្វែងយល់ពីប្រភពនៃការឈឺចាប់ និងបញ្ហារាងកាយផ្សេងៗ»។
លោកបានបន្ថែមថា ការបណ្ដុះបណ្ដាលនេះចាប់ផ្ដើមតាំងពីឆ្នាំ២០២២ ដោយមានអ្នកជំនាញជនជាតិបារាំងធ្វើជាគ្រូបង្គោល ហើយរៀបចំវគ្គបណ្ដុះបណ្ដាលចំនួន ៣ដងក្នុងមួយឆ្នាំ។ កម្មវិធីនេះមានគោលបំណងជួយឱ្យអ្នកជំនាញវិជ្ជាជីវៈសុខាភិបាលទទួលបានចំណេះដឹងជំនាញបន្ថែមសម្រាប់ការអនុវត្តវិជ្ជាជីវៈ និងការថែទាំអ្នកជំងឺ តាមវិធីសាស្រ្ដព្យាបាលបច្ចេកទេសបែប Osteopathy។
កន្លងមក អង្គការហត្ថាវេជ្ជសាស្ត្រ បានសហការជាមួយក្រសួងសុខាភិបាល និងមន្ទីរពេទ្យរដ្ឋមួយចំនួន រួមទាំងមន្ទីរពេទ្យកាល់ម៉ែត្រ និងស្ថាប័នសុខាភិបាលនៅតាមបណ្ដាខេត្តដូចជា មន្ទីរពេទ្យបង្អែកខេត្តកំពង់ចាម សៀមរាប និងបាត់ដំបង ដើម្បីចែករំលែកចំណេះដឹង និងបណ្ដុះបណ្ដាលបច្ចេកទេស Osteopathy ដល់អ្នកជំនាញសុខាភិបាលកម្ពុជា។
តាមការលើកឡើងរបស់លោក ជំនាញបច្ចេកទេសនេះក៏ត្រូវបានណែនាំសម្រាប់ការថែទាំស្ត្រីមានផ្ទៃពោះ និងស្ត្រីដែលជួបការលំបាកពាក់ព័ន្ធនឹងការសម្រាលកូន រួមទាំងទារកផងដែរ។ ទោះជាយ៉ាងណា ការអនុវត្តបច្ចេកទេសនីមួយៗត្រូវផ្អែកលើការវាយតម្លៃរបស់អ្នកជំនាញ និងភាពសមស្របតាមស្ថានភាពសុខភាពរបស់អ្នកជំងឺម្នាក់ៗ។
ក្រៅពីសកម្មភាពបណ្ដុះបណ្ដាល អង្គការហត្ថាវេជ្ជសាស្ត្រក៏បានរៀបចំបេសកកម្មផ្ដល់សេវាថែទាំសុខភាពដល់កុមារកំព្រា និងកុមារងាយរងគ្រោះនៅតាមបណ្ដាអង្គការជាដៃគូរនានា មជ្ឈមណ្ឌលកុមារកំព្រារដ្ឋ និងសហគមន៍នានាក្នុងប្រទេសកម្ពុជា ដោយសហការប្រតិបត្តិការជាមួយអង្គការជាដៃគូ និងស្ថាប័នពាក់ព័ន្ធ។
បេសកកម្មទាំងនេះ មានការចូលរួមពីក្រុមវេជ្ជបណ្ឌិតមកពីប្រទេសបារាំង និងរ៉ូម៉ានី ហើយត្រូវបានរៀបចំប្រមាណ ២ទៅ ៣ដងក្នុងមួយឆ្នាំ ជាទូទៅនៅអំឡុងខែមីនា ខែកក្កដា និងខែវិច្ឆិកា ដើម្បីរួមចំណែកលើកកម្ពស់ការថែទាំសុខភាពសម្រាប់កុមារ និង ប្រជាជនដែលងាយរងគ្រោះនៅកម្ពុជា៕
