(ភ្នំពេញ)៖ ឧបនាយករដ្ឋមន្ដ្រី ហ៊ុន ម៉ានី រដ្ឋមន្ដ្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង នៅព្រឹកថ្ងៃទី២៥ ខែតុលា ឆ្នាំ២០២៦នេះ បានបញ្ជាក់ថា កំណែប្រឡងគ្រូផ្អែកលើកិច្ចព្រមព្រៀងការងារកម្រិតមធ្យមសិក្សា ចូលដល់ថ្ងៃទី៦ នឹងប្រកាសលទ្ធផលក្នុងពេលឆាប់ៗ។

ក្នុងនាមប្រធានគណៈកម្មការរៀបចំការប្រឡងប្រជែង ឧបនាយករដ្ឋមន្ដ្រី ហ៊ុន ម៉ានី បានធ្វេីការកោតសរសើរចំពោះការខិតខំប្រឹងប្រែង និងលះបង់របស់អនុគណៈកម្មការកំណែវិញ្ញាសា ដែលព្រឹកនេះ ដំណើរការកែ និងស្រង់បូកសរុបពិន្ទុ ចូលដល់ ថ្ងៃទី៦ហើយ។

ក្នុងនោះទោះមានការហត់នឿយយ៉ាងណាក្តី គ្រប់គ្នាពិតជាបន្តបំពេញភារកិច្ចដោយមានការយកចិត្តទុកដាក់ ទទួលខុសត្រូវខ្ពស់ទាំងអស់គ្នា ហើយក៏ដឹងថា បេក្ខជនដែលបានឆ្លងកាត់ការប្រឡង កំពុងទន្ទឹងរង់ចាំលទ្ធផល។

ទោះយ៉ាងណា កិច្ចការទាំងអស់នេះ ត្រូវការពេលវេលា ពិនិត្យផ្ទៀងផ្ទាត់ គិតគូរដោយហ្មត់ចត់ និងគ្រប់ជ្រុងជ្រោយ ជាពិសេសការបូកស្រង់ពិន្ទុ និងការរៀបចំបែងចែកស្របទៅតាមជំនាញឯកទេស និងវិទ្យាល័យ-អនុវិទ្យាល័យគោលដៅ នៅតាមមូលដ្ឋានក្រុងស្រុកនីមួយៗ។

ក្រុមការងារ នឹងបន្តពន្លឿនបញ្ចប់កិច្ចការនេះ ដើម្បីប្រកាសជាស្ថាពរនូវលទ្ធផលសម្រាប់គ្រូបង្រៀនផ្អែកលើកិច្ចព្រមព្រៀងការងារកម្រិតមធ្យមសិក្សា ឆ្នាំសិក្សា២០២៦-២០២៧ ក្នុងពេលឆាប់ៗ ឆ្លើយតបនឹងការរំពឹងទុករបស់បេក្ខជន។ គ្រប់ដំណាក់កាល បានប្រកាន់ខ្ជាប់នូវគោលការណ៍គុណាធិបតេយ្យ យុត្តិធម៌ សុក្រឹត្យ តម្លាភាព និងឱកាសស្មើៗគ្នាសម្រាប់បេក្ខជនទាំងអស់៕