(កំពត)៖ លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអញ្ជើញចូលរួមជាអធិបតី ក្នុងពិធីប្រកាសបើកយុទ្ធនាការចុះធ្វើជំរឿនមន្ត្រីជាក់ស្តែងនៅតាមរចនាសម្ព័ន្ធរបស់អង្គភាពសុខាភិបាលមូលដ្ឋាន ស្ថិតនៅក្នុងខេត្តភូមិភាគនិរតី។

ពិធីនេះបានប្រព្រឹត្តធ្វើឡើង នាថ្ងៃទី២១ ខែតុលា ឆ្នាំ២០២៦ នៅសាលសន្និសីទបូកគោ នៃសាលាខេត្តកំពត។

លោក ម៉ៅ ធនិន អភិបាលខេត្តកំពត បានមានប្រសាសន៍ថា ការធ្វើជំរឿន ជាយន្តការចាំបាច់របស់រាជរដ្ឋាភិបាល ដើម្បីជួយឲ្យរដ្ឋបាលថ្នាក់ក្រោមជាតិ អាចគ្រប់គ្រងចំនួនមន្ត្រីរាជការ ពិសេសក្នុងវិស័យសុខាភិបាលបានច្បាស់លាស់ លុបបំបាត់ភាពអសកម្ម និងធានាបាននូវការបម្រើសេវាជូនប្រជាពលរដ្ឋបានទាន់ពេលវេលា។ ដូច្នេះ គ្រប់ការិយាល័យស្រុកប្រតិបត្តិនៅទូទាំងខេត្ត ត្រូវផ្តល់កិច្ចសហការឲ្យបានសកម្ម និងជិតស្និទ្ធ ជាមួយគណៈកម្មការជំរឿនដើម្បីជំរុញដល់យុទ្ធនាការជារួមនេះ សម្រេចបានជោគជ័យ។

ថ្លែងក្នុងពិធីបើកយុទ្ធនាការនេះ លោកឧបនាយករដ្ឋមន្ត្រី ហ៊ុន ម៉ានី បានមានប្រសាសន៍ថា ការជំរឿន មិនមែនជាការស្វែងរកកំហុស ជាការរើសអើង ឬជាការសើរើឯកសារចាស់ៗ ដើម្បីមានចំណាត់ការដាក់ពិន័យជាទណ្ឌកម្មណាមួយឡើយ តែជាការធ្វើបច្ចុប្បន្នភាពទិន្នន័យមន្ត្រីដោយពិនិត្យផ្ទៀងផ្ទាត់វត្តមាននៅតាមអង្គភាពនីមួយៗ ដើម្បីរៀបចំផែនការ និងសមាសភាពក្នុងការពង្រាយមន្ត្រីបម្រើការងារឲ្យចំគោលដៅ តាមរយៈការត្រួតពិនិត្យជាក់ស្តែង។

លោកឧបនាយករដ្ឋមន្ត្រី ហ៊ុន ម៉ានី បន្តថា ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីពិតជាមានសារៈសំខាន់ក្នុងការកំណត់ឲ្យបានជាក់លាក់ អំពីចំនួនមន្ត្រីនៅតាមមន្ទីរអង្គភាព ពិសេសមន្ត្រីបំពេញការងារជាក់ស្តែង ដើម្បីទទួលបានទិន្នន័យច្បាស់លាស់ ឯកភាពគ្នា និងអាចប្រើប្រាស់រួម។ ការធ្វើជំរឿនជាមូលដ្ឋានគ្រឹះ ដើម្បីអភិវឌ្ឍមុខងារសាធារណៈ និងជាធាតុផ្សំសំខាន់ក្នុងការកែទម្រង់រដ្ឋបាលសាធារណៈ។

លោកបន្តថា«ទិន្នន័យជំរឿន នឹងជួយដល់រាជរដ្ឋាភិបាលក្នុងការវាយតម្លៃរួមនៅតាមក្រសួង-ស្ថាប័ន ជួយដល់ការរៀបចំរចនាសម្ព័ន្ធ ក៏ដូចជាការពង្រាយមន្ត្រី ដើម្បីដោះស្រាយបញ្ហាខ្វះគន្លឹះ ទាំងបរិមាណ សមត្ថភាព និងគុណវុឌ្ឍ គាំទ្រដល់ការជ្រើសរើសមន្ត្រីផ្អែកលើតម្រូវការជាក់ស្តែង ព្រមទាំងការរៀបចំយុទ្ធសាស្ត្រគ្រប់គ្រង និងអភិវឌ្ឍមូលធនសម្រាប់វិស័យសាធារណៈ ជាវឌ្ឍនភាពការងារ ស្របតាមការណែនាំ ពីសម្តេចធិបតីនាយករដ្ឋមន្ត្រី ក្រសួងមុខងារសាធារណៈបានសហការយ៉ាងជិតស្និទ្ធជាមួយក្រសួងស្ថាប័ន និងរដ្ឋបាលរាជធានី-ខេត្ត ដោយរហូតមកដល់ពេលនេះ គណៈកម្មការ បានចុះជួប និងធ្វើជំរឿនជាក់ស្តែងនៅតាមរចនាសម្ព័ន្ធនៃអង្គភាពសុខាភិបាលមូលដ្ឋាន របស់រាជធានីភ្នំពេញ និងខេត្តព្រៃវែងរួចហើយ»។

លោកឧបនាយករដ្ឋមន្ត្រី ហ៊ុន ម៉ានី បន្តទៀតថា ការធ្វើជំរឿនមន្ត្រី មិនមែនជាការងារដាច់ដោយឡែករបស់ក្រសួងមុខងារសាធារណៈ ក្រសួងសុខភិបាល ឬរដ្ឋបាលរាជធានី-ខេត្តទេ តែជាកិច្ចការដែលត្រូវចូលរួមសហការធ្វើទាំងអស់គ្នា។ ហើយកិច្ចការងារនេះ ក៏មិនមែនជារឿងថ្មីដែរ ពោលគឺរាជរដ្ឋាភិបាលបានអនុវត្ត ៣លើករួចមកហើយ៕