(ភ្នំពេញ)៖ រយៈពេលប្រមាណជា៣ម៉ោង ក្រោយលោក អ៊ុំ សំអាន ប្រកាសចាត់បញ្ជូនក្រុមការងារមកផ្ទៀងផ្ទាត់ដីព្រំដែនចន្លោះបង្គោលលេខ៥២ ដល់៥៩នោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសស្វាគមន៍។

សម្តេចមហាបវរធិបតី បានបញ្ជាក់ថា ជំហររបស់សម្តេច គឺច្បាស់លាស់ និងមិនប្រែប្រួល ដូច​បញ្ជាក់តាំងពីដំបូងរហូតមក គឺអញ្ជើញលោក អ៊ុំ សំអាន និងក្រុមជំនាញព្រំដែន​របស់​គាត់ ឱ្យនាំយកនូវឯកសារ និងភស្តុតាងទាំងឡាយដែលលោកមាន ពាក់ព័ន្ធនឹងព្រំដែន​កម្ពុជា-ថៃ នៅចន្លោះបង្គោលសីមាលេខ ៥២ និង ៥៩ ជាពិសេសកន្លែងដែលបានចោទ​ប្រកាន់រាជរដ្ឋាភិបាល និងក្រុមការងារព្រំដែនរបស់រាជរដ្ឋាភិបាលថា បានបោះបង្គោលចូល​ក្នុង​ដីខ្មែរ ធ្វើឱ្យខ្មែរបាត់បង់ទឹកដីទៅថៃ។

ដើម្បីឱ្យមានភាពច្បាស់លាស់ សម្តេចមហាបវរធិបតី ហ៊ុន ម៉ាណែត បានដាក់លក្ខ​ខណ្ឌ​ចំនួន៤ សម្រាប់ការជួបជជែក ផ្ទៀងផ្ទាត់គ្នាដែលនឹង​កើតមាននៅពេលខាងមុខ។ លក្ខខណ្ឌនោះរួមមាន៖

១៖ ត្រូវជជែកគ្នាដោយឈរលើមូលដ្ឋានបច្ចេកទេស និងឯកសារភស្តុតាងជាក់លាក់ លើ​ប្រធានបទតែមួយគត់ គឺមកជជែក និងផ្ទៀងផ្ទាត់គ្នាពាក់ព័ន្ធនឹង​ព្រំដែន​កម្ពុជា-ថៃ ចន្លោះ​បង្គោល៥២-៥៩ ដែលលោក អ៊ុំ សំអាន និងក្រុមលោក បានចោទរាជរដ្ឋាភិបាលថាបានកាត់ដីឱ្យថៃ។ ហេតុដូច្នេះ លោក អ៊ុំ សំអាន និងក្រុមរបស់លោកត្រូវរៀបចំក្រុមជំនាញព្រំដែនច្បាស់លាស់ដែលអាចយល់ដឹងពីបច្ចេកទេសព្រំដែន, ត្រៀមរាល់ឯកសារ ភស្តុតាងទាំងឡាយណាដែលមាន ដើម្បីមកផ្ទៀងផ្ទាត់​គ្នា​នៅ​ក្នុងទឹកដីកម្ពុជានៅកន្លែងនេះដោយឈរលើមូលដ្ឋានបច្ចេកទេសនិងឯកសារភស្តុតាងជាក់លាក់

២៖ មិនត្រូវធ្វើសកម្មភាពអ្វីក្រៅពីការជជែក និងផ្ទៀងផ្ទាត់គ្នាដោយឈរលើមូលដ្ឋាន​បច្ចេក​ទេស និងឯកសារភស្តុតាងជាក់លាក់ ជាមួយក្រុមការងារព្រំដែនរបស់រាជរដ្ឋាភិបាល ពាក់​ព័ន្ធ​នឹងព្រំដែនកម្ពុជា-ថៃចន្លោះបង្គោល ៥២-៥៩ នោះទេ ជាពិសេសការឆ្លៀតឱកាសធ្វើ​សកម្ម​ភាពនយោបាយគ្រប់រូបភាព (មិនថាសម្ងាត់ ឬចំហរនោះទេ) ក្នុងអំឡុងពេល​ក្រុម​ការ​ងាររបស់លោក អ៊ុំ សំអាន នៅកម្ពុជា។ និយាយឱ្យខ្លី «កុំធ្វើជាត្រីងៀត ឆ្លៀតពង»។

៣៖ កិច្ចពិភាក្សាអាចធ្វើក្រោយថ្ងៃ២៨ ខែវិច្ឆិកា ឆ្នាំ២០២៦ ពេលណាក៏បាន ដោយសារមុន​ថ្ងៃទី២៨ ខែវិច្ឆិកា រាជរដ្ឋាភិបាលជាប់រវល់រៀបចំកិច្ចប្រជុំកំពូល OIF Summit ដែល​កម្ពុជា​ត្រូវធ្វើជាម្ចាស់ផ្ទះ និងចូលរួមកិច្ចប្រជុំលើកទី៣ របស់គណៈកម្មការផ្សះផ្សាក្រោម​អនុសញ្ញា​អង្គការសហប្រជាជាតិស្តីពីនីតិសមុទ្រ (UNCLOS) ជាមួយកម្ពុជា និងថៃ។

៤៖ ត្រូវមកដល់កម្ពុជាមិនច្រើនជាង ២ថ្ងៃ មុនចាប់ផ្តើមជជែកផ្ទៀងផ្ទាត់គ្នា និងត្រូវចាកចេញ​ពីប្រទេសកម្ពុជាយ៉ាងយូរ២ថ្ងៃ ក្រោយការជជែកផ្ទៀងផ្ទាត់គ្នារួចរាល់។

សម្តេចមហាបវរធិបតី បានបញ្ជាក់ទៀតថា ការធានារបស់សម្តេច គឺពាក់ព័ន្ធការមកកម្ពុជា​ដើម្បីជជែក និងផ្ទៀងផ្ទាត់គ្នាពាក់ព័ន្ធព្រំដែនកម្ពុជា-ថៃចន្លោះបង្គោល៥២-៥៩ តែប៉ុណ្ណោះ និងក្នុងរង្វង់ពេលវេលាដែលបានកំណត់ដូចបានបញ្ជាក់ខាងលើ។

ក្នុងករណីលោក អ៊ុំ សំអាន ទទួលយកបាននូវលក្ខខណ្ឌខាងលើ សម្តេចមហាបវរធិបតី ស្នើឱ្យលោក អ៊ុំ សំអាំន បញ្ជាក់សមាសភាពដែលត្រូវចូលរួម និងពេលវេលាដែលត្រូវ​មក​ដល់កម្ពុជា និងបញ្ជាក់ពីតម្រូវការអ្វីខ្លះដែលរាជរដ្ឋាភិបាលអាចផ្ដល់ឱ្យលោក
និងក្រុមរបស់លោក ដូចជាកន្លែងស្នាក់នៅ មធ្យោបាយធ្វើដំណើរ ឬការការពារសន្តិសុខ ដើម្បីរៀបចំឱ្យបានសមរម្យ។

ទន្ទឹមនឹងការស្វាគមន៍ការបញ្ជាក់របស់លោក អ៊ុំ សំអាន ហើយនោះ សម្តេចមហាបវរធិបតី ក៏បានបង្ហាញការកត់សម្គាល់ចំពោះភាពប្រែប្រួលចិត្តគំនិងរបស់លោក អ៊ុំ សំអាន ក្នុងក្នុងរយៈពេលពីរសប្តាហ៍កន្លងមកនេះដែរ។ សម្តេចនាយករដ្ឋមន្ត្រី បានបង្ហាញការកត់សម្គាល់ថា ក្នុងរយៈពេលជិត ២សប្តាហ៍​កន្លងមកនេះ ជំហររបស់​លោក អ៊ុំ សំអាន មានការប្រែប្រួលមិនឈប់ឈរ ម្តងថា មិន​ហ៊ានមកព្រោះខ្លាចគេលួចបាញ់ឬវ៉ៃបែកក្បាល, ម្តងថាមកទាល់តែមានការ​លើកលែង​ទោស។ ឥឡូវគាត់ថាមកដោយមិនបាច់មានការលើកលែងទោស, ម្តងថាមានឯកសា និង​ភស្តុតាងគ្រប់គ្រាន់, ម្តងគាត់ថាអត់មានឯកសារអ្វីច្បាស់លាស់ទេ ឮតែគេថា ឬដឹងតាម​ញាណ​ពិសេសរបស់គាត់, ម្តងគាត់ថាទាល់តែមានជំនាញព្រំដែន​បារាំង​មក​ ទើបគាត់​ទទួលស្គាល់លទ្ធផលនៃការជជែកគ្នា, ម្តងគាត់ថាអត់និយាយរឿងព្រំដែន​ចន្លោះ​បង្គោល​៥២-៥៩ ទេ គាត់ត្រូវនិយាយអំពីព្រំដែនទាំងមូល ទាំងព្រំដែនទឹក ទាំងព្រំដែនគោក, ម្តងគាត់ថា គាត់ជាអ្នកនយោបាយគាត់ត្រូវមកនិយាយ ឬធ្វើកិច្ចការនយោបាយ។ល។

សូមបញ្ជាក់ថា ថ្ងៃទី២១ ខែតុលា ឆ្នាំ២០២៦នេះ លោក អ៊ុំ សំអាន បានយល់ព្រមបញ្ជូន​តំណាង​របស់ខ្លួនមកកម្ពុជា តាមការស្នើ​របស់សម្តេចមហាបវរធិបតី ដើម្បីផ្ទៀងផ្ទាត់ដីនៅចន្លោះ​បង្គោលព្រំដែនលេខ៥២ និង៥៩ ក្នុងខេត្តបាត់ដំបង ដែលោលចោទថា​បាត់ទៅខាងភាគីថៃនោះ។

លោក អ៊ុំ សំអាន បញ្ជាក់លើហ្វេសប៊ុករបស់លោកយ៉ាងដូច្នេះ «ខ្ញុំនឹងបញ្ជូនគណៈប្រតិភូ​ដែល​តំណាងអោយខ្ញុំទៅកាន់ប្រទេសកម្ពុជានាខែក្រោយនេះតាមការអញ្ជើញរបស់លោក ហ៊ុន ម៉ាណែត។ ខ្ញុំនឹងធ្វើលិខិតជាផ្លូវការដើម្បីជាការឆ្លើយតបចំពោះការអញ្ជើញរបស់លោក ហ៊ុន ម៉ាណែត ហើយខ្ញុំនឹងបញ្ជូនឈ្មោះគណៈប្រតិភូទៅលោក ហ៊ុន ម៉ាណែត នៅមុនចុងខែតុលា​នេះ។ សូមបងប្អូនខ្មែរដែលស្នេហាជាតិ​ចាំទទួលស្វាគមន៍គណៈប្រតិភូយើងផង»។

លោក អ៊ុំ សំអាន បានបន្ថែមថា ក្នុងនាមជាអ្នកនយោបាយជំនាន់ថ្មីដូចគ្នា លោកសង្ឃឹមថា រូបលោក និងសម្តេចមហាបវរធិបតី ហ៊ុន ម៉ាណែត អាចប្រើវប្បធម៌សន្ទនាថ្មីជំនួសវប្បធម៌​សន្ទនា​រវាងលោកសម រង្សុី និងសម្តេចតេជោ ហ៊ុន សែន ក្នុងស្មារតីផ្សះផ្សារជាតិ ឯកភាពជាតិ បង្រួបបង្រួមជាតិនិងការការពារទឹកដីពីការឈ្លានពានរបស់ថៃ។

លោក អ៊ុំ សំអាន ថែមទាំងលើកឡើងទៀតថា ជាអ្នកនយោបាយជំនាន់ថ្មីដូចគ្នា គឺមិនយករឿងគំនុំ​បុគ្គល ឬបញ្ហាផ្ទាល់ខ្លួនមកលាយឡំនឹងបញ្ហាប្រទេសជាតិនោះទេ ហើយក៏មិនចាត់ទុកខ្មែរគ្នាឯងជាសត្រូវនោះដែរ។ សត្រូវរបស់ខ្មែរពិតប្រាកដនាពេលនេះ គឺការឈ្លាន​ពានពីសំណាក់ប្រទេសជិតខាង ដែលខ្មែរត្រូវរួបរួមគ្នាដើម្បីដោះស្រាយ និងទាមទារទឹកដីខ្មែរចំនួន៨៥ទីតាំងពីថៃមកវិញ៕