(ភ្នំពេញ)៖ លោកសាស្ត្រាចារ្យ ម៉ុក ធាវី អនុរដ្ឋលេខាធិការក្រសួងសុខាភិបាល បានថ្លែងថាស្រ្តីខ្មែរភាគច្រើនអៀនខ្មាស មិនហ៊ានប្រាប់សុខចិត្ដអត់ធ្មត់ទ្រាំទ្រនឹងការឈឺចាប់ និងផលវិបាកនៅតំបន់អាងត្រគាកស្ត្រីដោយស្ងៀមស្ងាត់ ដោយសារតែកង្វះការយល់ដឹង ការលំបាកក្នុងការទទួលបានការពិនិត្យពីគ្រូពេទ្យឯកទេស និងការទទួលបានវិធីសាស្ត្រព្យាបាលសមស្របតាមកម្រិត ។

«វិបត្តិទាំងនេះធ្វើឱ្យប៉ះពាល់ដល់សុខភាពរាងកាយ សុខុមាលភាពផ្លូវចិត្ត សកម្មភាពប្រចាំថ្ងៃ និងគុណភាពជីវិតរបស់ស្តី ដូចនេះវាទាមទារនូវអ្នកជំនាញ ក្នុងការរកឃើញឱ្យបានទាន់ពេលវេលា ផ្តល់ការព្យាបាលសមស្រប និងការ
តាមដានអ្នកជំងឺប្រកបដោយគុណភាព និងសុវត្ថិភាព គឺជាកិច្ចការដែលត្រូវបន្តយកចិត្តទុកដាក់រួមគ្នាដើម្បីស្ដារមុខងាររាងកាយរបស់ស្ត្រីឱ្យបានប្រសើរឡើង។ ក្នុងឱកាសនេះលោកសាស្ដ្រាចារ្យ អំពាវនាវដលើកទឹកចិត្ដដល់ស្ដ្រីគ្រប់រូប ពិសេសស្ដ្រីដែលមានសុខភាព និងសញ្ញាមិនប្រក្រតីណាមួយនៅតំបន់អាងត្រគាក សូមរួសរាន់មកពិនិត្យជាមួយគ្រូពេទ្យជំនាញ»។

លើសពីនោះលោកសាស្ដ្រាចារ្យ បានណែនាំដល់គ្រូពេទ្យ ត្រូវយកចិត្ដទុកដាក់ខ្ពស់ និងធ្វើការផ្សព្វផ្សាយពីបញ្ហាសុខភាពនៅតំបន់អាងត្រគាកស្ដ្រី ជូនដល់ប្រជាជនឱ្យបានគ្រប់ៗគ្នា និងដល់សហគមន៍។ ការថ្លែងយ៉ាងដូច្នេះរបស់លោកសាស្ដ្រាចារ្យ ក្នុងឱកាសអញ្ជើញជាអធិបតីក្នុងពិធីបើកវគ្គបណ្តុះបណ្តាល Masterclass in Femal Urology and Pelviperineology នៅមន្ទីរពេទ្យមិត្តភាពកម្ពុជា-ចិន ព្រះកុសុមៈ ក្រោមកិច្ចសហការរវាងមន្ទីរពេទ្យ សាកលវិទ្យាល័យវិទ្យាសាស្ត្រសុខាភិបាល ,AIRE-LOTUS ក្រោម Fundation Pierre Fable នាថ្ងៃទី១៩ ខែតុលា ឆ្នាំ២០២៦ ដែលមានការចូលរួមពីវាគ្មិន គ្រូពេទ្យជំនាញៗ មកពីមន្ទីរពេទ្យជាតិមួយចំនួនក្នុងរាជធានីភ្នំពេញ និងខេត្តមួយចំនួនសរុបប្រហែល​ ១៣០នាក់។

លោកសាស្ដ្រាចារ្យ ម៉ុក ធាវី បានថ្លែងបន្ដថា ការថែទាំសុខភាពស្ត្រី ពិសេសជំងឺប្រព័ន្ធផ្លូវទឹកនោមស្ត្រី និងជំងឺពាក់ព័ន្ធនឹងអាងត្រគាកនិងសាច់ដុំទ្រទ្រង់អាងត្រគាក ឬ Female Urology and Pelviperineology រួមមានរាប់ចាប់ពី
បញ្ហា Urinary Incontinence រហូតដល់ Pelvic Organ Prolapse គឺជាផ្នែកមួយដែលត្រូវការការយកចិត្តទុកដាក់ខ្ពស់ ព្រោះសុខភាពស្រ្តីមានទំនាក់ទំនងយ៉ាងជិតស្និទ្ធជាមួយសុខុមាលភាពគ្រួសារ សហគមន៍ និង
ការអភិវឌ្ឍសង្គមជាតិទាំងមូល។ ក្នុងនោះ LOTUS ដោយមានកិច្ចសហការយ៉ាងជិតស្និទ្ធជាមួយដៃគូរមន្ទីរពេទ្យក្នុងស្រុក ក្រសួងសុខាភិបាល និង សាកលវិទ្យាល័យវិទ្យាសាស្ត្រសុខាភិបាល (ស.វ.ស) កំពុងរួមគ្នាដោះស្រាយបញ្ហាប្រឈមទាំងនេះ
ដោយផ្ទាល់។

ដូច្នេះគោលបំណងនៃវគ្គបណ្តុះបណ្តាលនេះ គឺដើម្បីបំពេញគម្លាតនៃចំណេះដឹង កសាងសមត្ថភាពគ្រូពេទ្យ ក្នុងការធ្វើរោគវិនិច្ឆ័យ និងវិធីសាស្ត្រព្យាបាល មានស្តង់ដាតែមួយក្នុងការថែទាំ អន្តរាគមន៌សមស្រមតាមកម្រិត ការគ្រប់គ្រងសុខភាពស្ត្រី ពិសេសជំងឺប្រព័ន្ធទឹកនោមស្ត្រី និងជំងឺពាក់ព័ន្ធអាងត្រគាក និងសាច់ដុំទ្រទ្រង់អាងត្រគាកស្ត្រី ។

លោកសាស្ដ្រាចារ្យបានលើកឡើងទៀតថា វេទិកានេះជាការរៀនសូត្ររួមគ្នា ការចែករំលែកបទពិសោធន៍ព្យាបាល និងការពង្រឹងកិច្ចសហប្រតិបត្តិការរវាងអ្នកជំនាញក្នុងវិស័យសុខាភិបាលជាតិ និងអន្តរជាតិ ដើម្បីឆ្លើយតបនឹងតម្រូវការសុខភាពស្ត្រីឱ្យកាន់តែប្រសើរឡើង។ ទន្ទឹមនឹងនេះលោកសាស្ត្រាចារ្យ ក៏បានផ្តល់អាទិភាពបីចំណុចផងដែរដល់ថ្នាក់ដឹកនាំ ក្រុមគ្រូពេទ្យឯកទេសនៃមន្ទីរពេទ្យទាំងអស់ រួមមាន៖
១៖ ត្រូវតម្កល់សេចក្តីថ្លៃថ្នូរ និងសុវត្ថិភាពរបស់អ្នកជំងឺជាចម្បង
២៖ ប្រែក្លាយចំណេះដឹងទៅជាការកែលម្អការអនុវត្ដជាក់ស្តែង
៣៖ ពង្រឹងកិច្ចសហប្រតិបត្តិការយូរអង្វែង និងសមត្ថភាពក្រុមការងារកម្ពុជា៕