(ភ្នំពេញ)៖ នៅព្រឹកថ្ងៃចន្ទ ទី១៩ ខែតុលា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតឱ្យលោកស្រី សិរីវឌ្ឍនា អ៊ីវ៉ា (Iwona Kmiecik) ស្ថាបនិក និងជាប្រធានក្រុមហ៊ុន IM Capital Holding ជួបសម្តែងការគួរសម និងពិភាក្សាការងារ នៅវិមានសន្តិភាព។

ក្រុមហ៊ុន IM Capital Holding ជាក្រុមហ៊ុនវិនិយោគ និងអភិវឌ្ឍអចលនទ្រព្យ ដែល​ផ្តោតលើវិស័យបដិសណ្ឋារកិច្ច និងទេសចរណ៍ប្រណីតនៅកម្ពុជា ជាពិសេសនៅតំបន់កោះ​រ៉ុង ខេត្តព្រះសីហនុ។ សកម្មភាពសំខាន់ៗរបស់ក្រុមហ៊ុនរួមមាន ការវិនិយោគ និងអភិវឌ្ឍ​អចលនទ្រព្យ ការអភិវឌ្ឍគម្រោងសណ្ឋាគារ និងរមណីយដ្ឋាន ព្រមទាំងការគ្រប់គ្រង​ប្រតិបត្តិ​ការអាជីវកម្មបដិសណ្ឋារកិច្ច។

បច្ចុប្បន្ន IM Capital Holding កំពុងអភិវឌ្ឍន៍គម្រោងធំៗចំនួនពីរនៅកោះរ៉ុង។ គម្រោង​ទីមួយ​ គឺសណ្ឋាគារ និងរីស៊ត អប្សរា (Apsara Resort) ដែលបានបើកដំណើរការថ្មីៗនេះ និងទទួលបានការគាំទ្រយ៉ាងខ្លាំងពីភ្ញៀវជាតិ និងអន្តរជាតិ។ គម្រោងដ៏ប្រណិតមួយទៀតគឺ សណ្ឋាគារ Port Yves Palace ដែលជាសណ្ឋាគារ និងអាផាតមិនលំដាប់ផ្កាយប្រាំដំបូង​គេបង្អស់នៅកោះរ៉ុង។ គម្រោង Port Yves Palace នេះត្រូវបានរំពឹងថានឹងបញ្ចប់ការ​សាង​សង់នៅឆ្នាំ ២០២៧។

Port Yves Palace គឺជាគម្រោងពហុមុខងារដែលរួមបញ្ចូលទាំងសណ្ឋាគារ អាផាតមិន ស្កាយបារ ស្ប៉ា ភោជនីយដ្ឋាន កន្លែង VIP និងមជ្ឈមណ្ឌលលក់ទំនិញផ្តាច់មុខនៅ​ជាប់មាត់​សមុទ្រ ដែលមានឆ្នេរខ្សាច់ឯកជនប្រវែង ៩០ម៉ែត្រ។ អតិថិជនដែលជាវយូនីតណា​មួយនឹង​ទទួលបានប្លង់រឹងជាកម្មសិទ្ធិផ្ទាល់ភ្លាមៗ ដែលជារឿងកម្រមួយនៅក្នុងតំបន់អាស៊ីអាគ្នេយ៍។ តម្លៃអចលនទ្រព្យនៃគម្រោងនេះ ត្រូវបានរំពឹងថានឹងកើនឡើង ១២ភាគរយប្រចាំឆ្នាំ។

ក្រៅពីវិស័យអចលនទ្រព្យ និងបដិសណ្ឋារកិច្ច IM Capital Holding ក៏ប្តេជ្ញាចិត្តជួយ​ជ្រោម​ជ្រែងដល់សង្គម ដោយលោកស្រី Iwona Kmiecik បានដឹកនាំក្រុមហ៊ុន​ផ្តួចផ្តើម​គំនិតសប្បុរសធម៌ជាច្រើន ដើម្បីលើកកម្ពស់សហគមន៍កម្ពុជា ដូចជាការបង្កើតសាលា​បង្រៀនភាសា កម្មវិធីកីឡាសម្រាប់យុវជន និងការផ្សព្វផ្សាយអប់រំសម្រាប់កុមារ​ដែលមាន​ជីវភាពខ្វះខាត។

លោកស្រីក៏ជាសមាជិកគណៈកម្មាធិការប្រតិបត្តិសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា (PATA Cambodia Chapter PATACC) ដែលបានទទួលពានរង្វាន់ Intelligent Development Leader នៅប្រទេសប៉ូឡូញ៕