(កាហ្សាក់ស្ថាន)៖ លោកស្រីកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នៅថ្ងៃទី១៥-១៦ ខែតុលា ឆ្នាំ២០២៦ បានដឹកនាំប្រតិភូក្រសួងកិច្ចការនារី ចូលរួមក្នុងវេទិកា BE WOMAN Asia លើកទី៤ ក្រោមប្រធានបទ
«អំណាចប្រកបដោយសីលធម៌៖ ភាពជាអ្នកដឹកនាំ និងការធ្វើសេចក្តីសម្រេចចិត្តដោយការទទួលខុសត្រូវ ក្នុងយុគសម័យនៃការផ្លាស់ប្តូរបច្ចេកវិទ្យានិងសង្គមយ៉ាងឆាប់រហ័ស» ដែលប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៦ ខែតុលា ឆ្នាំ២០២៦ នៅទីក្រុង Almaty ប្រទេសកាហ្សាក់ស្ថាន ដោយមានអ្នកចូលរួមប្រមាណ ៣,០០០នាក់ និងវាគ្មិនកិត្តិយសចំនួន ១០០នាក់ មកពី២៣ប្រទេស។

វេទិកានេះរៀបចំឡើងក្នុងគោលបំណងពិភាក្សា និងផ្លាស់ប្ដូរបទពិសោធន៍អំពីឥទ្ធិពលនៃបញ្ញាសិប្បនិម្មិត (Artificial Intelligence) និងបច្ចេកវិទ្យាថ្មីៗ ក្នុងស្ថានភាពនៃការវិវត្តរបស់សង្គមនីមួយៗ និងដើម្បីធានាអនាគតដែលមានបរិយាបន្ន និងចីរភាពក្រោមភាពជាអ្នកដឹកនាំស្ត្រីដ៏មានទំនួលខុសត្រូវ។

លោកស្រីកិត្តិបណ្ឌិតរដ្ឋមន្ត្រី បានចូលរួមថ្លែងសុន្ទរកថាគន្លឹះក្នុងពិធីបើកនៃវេទិកានេះ និងបានអំពាវនាវឱ្យគ្រប់ភាគីពាក់ព័ន្ធគិតគូរអំពីការកសាងអនាគតនៃសង្គមនីមួយៗដែលមនុស្សគ្រប់គ្នាប្រាថ្នាចង់បាន តាមរយៈការប្រែក្លាយបច្ចេកវិទ្យាថ្មីៗឱ្យបម្រើដល់មនុស្សជាតិ។

លោកស្រីបានគូសបញ្ជាក់ថា អនាគតមិនមែនផ្ដោតលើតែបញ្ញាសិប្បនិម្មិតមួយមុខនោះទេ ប៉ុន្តែតម្រូវឱ្យមានប្រាជ្ញាញាណ ការយល់ចិត្ត ទំនុកចិត្ត និងភាពធន់របស់មនុស្សជាតិផងដែរ។

ទន្ទឹមនឹងនេះ លោកស្រីកិត្តិបណ្ឌិត បានចូលរួមជាវាគ្មិនកិត្តិយសក្នុងវគ្គពិភាក្សាស្ដីពី «The Power of Decisions: How One Choice Changes Nations» ជាមួយវាគ្មិនកិត្តិយសចំនួន ៣រូបផ្សេងទៀត រួមមាន សមាជិកាព្រឹទ្ធសភានៃប្រទេសអ៊ុយបេគីស្ថាន, អ្នកតំណាងប្រទេសបារាំងសម្រាប់វិស័យឯកជន នៃក្រុមការងារថ្នាក់ដឹកនាំស្ត្រីធុរកិច្ចG20 និងទីប្រឹក្សាឧបនាយករដ្ឋមន្ត្រីនៃក្រសួងបញ្ញាសិប្បនិម្មិត និងការអភិវឌ្ឍឌីជីថលប្រទេសកាហ្សាក់ស្ថាន។

លោកស្រីកិត្តិបណ្ឌិត បានចែករំលែកអំពីបទពិសោធន៍របស់ខ្លួនក្នុងនាមជាថ្នាក់ដឹកនាំស្រ្តីមួយរូប ដែលបានប្រើប្រាស់ភាពជាអ្នកដឹកនាំត្រួសត្រាយផ្លូវសម្រាប់ស្រ្តី និងក្មេងស្រីជំនាន់ក្រោយ ជាពិសេសការបើកឱកាសឱ្យបានទូលំទូលាយ និងសមភាព ក៏ដូចជាអំពាវនាវឱ្យមានភាពជាដៃគូរវាងស្ត្រីនិងបុរស ដើម្បីឈានទៅសម្រេចបានសមភាពយេនឌ័រ។

លោកស្រីកិត្តិបណ្ឌិត បានសង្កត់ធ្ងន់ថា ស្ត្រី និងក្មេងស្រីមិនមែនជាជនរងគ្រោះនោះទេ តែជាចលករដ៏សំខាន់ក្នុងការជំរុញការអភិវឌ្ឍសង្គម និងសេដ្ឋកិច្ចជាតិ៕