(ភ្នំពេញ)៖ លោកស្រី លី ពិសី ប្រធានសម្របសម្រួលអង្គការសហគមន៍ឥន្ទនូកម្ពុជា (RoCK) បានគូសបញ្ជាក់ពីសារៈសំខាន់ នៃសមភាពច្បាប់អាពាហ៍ពិពាហ៍សម្រាប់ប្រទេសកម្ពុជា ដោយលើកឡើងពីអត្ថប្រយោជន៍សេដ្ឋកិច្ចដ៏ធំធេងដែលនឹងកើតមានឡើង។

ការអនុម័តច្បាប់អាពាហ៍ពិពាហ៍សម្រាប់គូស្វាមីភរិយាភេទដូចគ្នា មិនត្រឹមតែជាការទទួលស្គាល់សិទ្ធិជាមូលដ្ឋានរបស់ពលរដ្ឋប៉ុណ្ណោះទេ ប៉ុន្តែថែមទាំងអាចជំរុញកំណើនសេដ្ឋកិច្ចជាតិផងដែរ។

លោកស្រីបានបន្ថែមថា ការទទួលស្គាល់ជាផ្លូវការនូវអាពាហ៍ពិពាហ៍ភេទដូចគ្នា នឹងរួមចំណែកយ៉ាងសំខាន់ក្នុងការផ្សព្វផ្សាយពីការគោរពសិទ្ធិមនុស្សរបស់រដ្ឋាភិបាលកម្ពុជា។

តាមរយៈការផ្ដល់សិទ្ធិសេរីភាពដល់ក្រុមអ្នកស្រឡាញ់ភេទដូចគ្នានៅកម្ពុជាដោយគ្មានការរើសអើង រដ្ឋាភិបាលនឹងបង្ហាញពីការប្ដេជ្ញាចិត្តរបស់ខ្លួនចំពោះគោលការណ៍សមភាព និងយុត្តិធម៌សង្គម។ នេះនឹងជួយលើកកម្ពស់កិត្តិនាមរបស់កម្ពុជាលើឆាកអន្តរជាតិ និងទាក់ទាញការវិនិយោគបរទេសដែលផ្អែកលើតម្លៃមនុស្សធម៌៕