(អាស្តាណា, កាហ្សាក់ស្ថាន)៖ កាហ្សាក់ស្ថាន និងកម្ពុជា មានឱកាសដើម្បីពង្រឹងកិច្ចសហប្រតិបត្តិការក្នុងវិស័យថាមពល​ឱ្យកាន់តែស៊ី​ជម្រៅ។ នេះបើយោងតាមសេចក្តីថ្លែងការណ៍របស់ការិយាល័យសារព័ត៌មានប្រធានាធិបតីកាហ្សាក់ស្ថាន ដែលបានដកស្រង់ប្រសាសន៍​របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ថ្លែងក្នុងជំនួបជាមួយប្រធានាធិបតីកាហ្សាក់ស្ថាន លោក Kassym-Jomart Tokayev ក្នុងទីក្រុងអាស្តាណា។

សម្តេចមហាបវរធិបតី បានមានប្រសាសន៍ថា៖ «ខ្ញុំជឿថាឥឡូវនេះយើងមានឱកាសពង្រឹងកិច្ចសហប្រតិបត្តិការ​ក្នុងវិស័យថាមពលឱ្យ​កាន់តែស៊ីជម្រៅ។ យើងអាចណែនាំស្ថាប័នរបស់យើងរួមគ្នាកំណត់ពីវិស័យដែលផ្ដល់ផលប្រយោជន៍ឱ្យគ្នាទៅវិញទៅមក»។

សម្តេចមហាបវរធិបតី ក៏បានមានប្រសាសន៍ដែរថា ក្រសួងនានារបស់កម្ពុជា ចាប់អារម្មណ៍ក្នុងការផ្លាស់ប្តូរបទពិសោធន៍​ជាមួយកាហ្សាក់​ស្ថាន លើរដ្ឋាភិបាល​អេឡិចត្រូនិក​ដែល​ហៅ​តាម​ភាសា​អង់គ្លេស​ថា E-government ជាមួយការកត់សម្គាល់ពីជំនាញដ៏ទូលំទូលាយ និងការអភិវឌ្ឍន៍ជឿនលឿនរបស់កម្ពុជាក្នុងវិស័យនេះ។

សម្តេចធិបតី ហ៊ុន ម៉ាណែត បានអរគុណលោកប្រធានាកាហ្សាក់ស្ថាន សម្រាប់ការអញ្ជើញសម្ដេចបំពេញទស្សនកិច្ចនៅកាហ្សាក់ស្ថាន ដោយកត់សម្គាល់ថាប្រទេសទាំងពីរបានរក្សាទំនាក់ទំនងការទូតអស់រយៈពេលជាង ៣០ឆ្នាំមកហើយ។ លោកប្រធានាធិបតី មាន​ប្រសាសន៍ថា ដំណើរទស្សនកិច្ចផ្លូវការរបស់សម្តេចនាយករដ្ឋមន្ត្រី នឹងផ្តល់ថាមពលបន្ថែមដល់ទំនាក់ទំនងទ្វេភាគី និងបើកទូលាយ​នូវទស្សនវិស័យថ្មីៗសម្រាប់កិច្ចសហប្រតិបត្តិការផ្ដល់ផលប្រយោជន៍ឱ្យគ្នាទៅវិញទៅមក។ លោកប្រធានាធិបតី បានចាត់ទុក​ដំណើរ​ទស្សនកិច្ចនេះថា ជាព្រឹត្តិការណ៍ប្រវត្តិសាស្ត្រ ដោយសង្កត់ធ្ងន់ថា មិនធ្លាប់មាននាយករដ្ឋមន្ត្រីកម្ពុជាណាម្នាក់ធ្លាប់​ទៅបំពេញទស្សន​កិច្ច​នៅកាហ្សាក់ស្ថានពីមុនមកនោះទេ។

ប្រធានាធិបតីកាហ្សាក់ស្ថានក៏បានគូសបញ្ជាក់ផងដែរ ពីទំនាក់ទំនងផ្ទាល់រវាងក្រុមគ្រួសាររបស់សម្តេច និងកាហ្សាក់ស្ថាន ដោយរំឮក​ថាឪពុករបស់សម្ដេច គឺសម្ដេចតេជោ ហ៊ុន សែន បានបំពេញទស្សនកិច្ចទៅកាន់កាហ្សាក់ស្ថានកាលពីឆ្នាំ១៩៨២ ក្នុងនាមជារដ្ឋមន្ត្រី​ការ​បរទេសកម្ពុជានៅពេលនោះ។

លោក Tokayev បានបន្ថែមថា ភាគីទាំងពីរនឹងពិភាក្សាអំពីបញ្ហាទ្វេភាគីជាច្រើន។ លោកបានកត់សម្គាល់ថា កាហ្សាក់​ស្ថានមាន​អាកប្ប​កិរិយាអំណោយផលចំពោះកម្ពុជា ហើយថាពលរដ្ឋកាហ្សាក់ស្ថានជាច្រើនចង់ទៅទស្សនាប្រទេសកម្ពុជា និងមើលឃើញ​ភាព​ទាក់ទាញរបស់កម្ពុជា។ លោកក៏បានអំពាវនាវឱ្យមានការពិភាក្សាអំពីការបង្កើតជើងហោះហើរត្រង់ រវាងប្រទេសទាំងពីរ និងការពង្រីក​ការផ្លាស់ប្តូរផ្នែកកិច្ចការមនុស្សធម៌។

តាមលោក Tokayev បានបញ្ជាក់ថា ធនធានធម្មជាតិដ៏សំខាន់របស់កាហ្សាក់ស្ថាន និងកម្ពុជា ជាវិស័យដែល​មានសក្តា​នុពល​សម្រាប់​កិច្ចសហប្រតិបត្តិការកាន់តែទូលំទូលាយ។ លោកបានបន្តថា កិច្ចពិភាក្សាក៏នឹងដោះស្រាយមធ្យោបាយ ដើម្បីពង្រឹងចំណងពាណិជ្ជកម្ម និងសេដ្ឋកិច្ចផងដែរ។ ភាគីទាំងពីរបានពិភាក្សាអំពីការពង្រីកបន្ថែមទៀតនូវកិច្ចសន្ទនាផ្នែកនយោបាយ កិច្ចសហប្រតិបត្តិការ​ពាណិជ្ជ​កម្ម និងសេដ្ឋកិច្ច ព្រមទាំងការចូលរួមក្នុងវេទិកាពហុភាគី៕