(កំពង់ឆ្នាំង)៖ ពលរដ្ឋចំនួន ៦គ្រួសារ រស់នៅក្នុងភូមិបាញ់ឆ្គោល ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ដែលរងគ្រោះដោយទឹកជំនន់ជន់លិចលំនៅឋាន បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ ក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ដែលបានយកចិត្តទុកដាក់ និងផ្តល់ជំនួយជាស្បៀងអាហារ និងទីជម្រកបណ្តោះអាសន្នបានទាន់ពេលវេលា កាលពីព្រឹកថ្ងៃទី១៦ ខែតុលា ឆ្នាំ២០២៦។

ក្នុងចំណោមគ្រួសាររងគ្រោះទាំង៦នេះ មាន ៤គ្រួសារជាជនភៀសសឹកមកពីខេត្តបន្ទាយមានជ័យ ដែលកំពុងជួបការលំបាកខ្លាំង ដោយសារលំនៅឋានរបស់ពួកគាត់ត្រូវបានទឹកជំនន់បំផ្លាញ។ បច្ចុប្បន្ន ពួកគាត់សរុបចំនួន ២០ នាក់ កំពុងស្នាក់នៅរួមគ្នាក្នុងសាលាដំណាក់តូចមួយបណ្ដោះអាសន្ន។

លោក សំ សំណាង មេភូមិបាញ់ឆ្គោល បានបញ្ជាក់ថា អាជ្ញាធរមូលដ្ឋានតែងតែជួយទំនុកបម្រុងតាមលទ្ធភាព ហើយបានបរិច្ចាគដីរួមរបស់ភូមិមួយកន្លែងសម្រាប់សាងសង់ទីជម្រកជូនពួកគាត់ផងដែរ។

លោក កែវ វណ្ណដេត មេបញ្ជាការកងទ័ពជើងអាកាស និងជាក្រុមការងាររាជរដ្ឋាភិបាលចុះមូលដ្ឋានឃុំជ្រៃបាក់ បាននាំយកអំណោយជាស្បៀងអាហាររបស់លោកបណ្ឌិត សឹង សំណាង អគ្គមេបញ្ជាការរងកងយុទ្ធពលខេមរភូមិន្ទ និងជាប្រធានក្រុមការងារ ទៅចែកជូនពលរដ្ឋរងគ្រោះ ដើម្បីជួយសម្រាលជីវភាព។

លោកបានផ្តាំផ្ញើសួរសុខទុក្ខពីថ្នាក់ដឹកនាំ និងណែនាំឲ្យប្រជាពលរដ្ឋមានការប្រុងប្រយ័ត្នខ្ពស់ចំពោះគ្រោះធម្មជាតិ។ រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត តែងតែយកចិត្តទុកដាក់ខ្ពស់ចំពោះសុខមាលភាពប្រជាពលរដ្ឋ ជាពិសេសអ្នករងគ្រោះដោយគ្រោះធម្មជាតិ។ លោកក៏បានកោតសរសើរអាជ្ញាធរមូលដ្ឋានចំពោះការឆ្លើយតបយ៉ាងឆាប់រហ័សក្នុងការជួយសង្គ្រោះប្រជាពលរដ្ឋ៕