(កំពង់ចាម)៖ រដ្ឋបាលខេត្តកំពង់ចាម នៅព្រឹកថ្ងៃទី១៥ ខែតុលា ឆ្នាំ២០២៦ នេះ បានរៀបចំពិធីគោរពវិញ្ញាណក្ខន្ធ ព្រះករុណាព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប ១៤ឆ្នាំ នៃការយាងសោយទិវង្គតរបស់ព្រះអង្គ។

ពិធីដ៏ឧឡារិកនេះ បានប្រព្រឹត្តទៅនៅសាលាខេត្តកំពង់ចាម ក្រោមអធិបតីភាព លោក ខ្លូត ផន ប្រធានក្រុមប្រឹក្សាខេត្ត និង លោក អ៊ុន ចាន់ដា អភិបាលខេត្តកំពង់ចាម ព្រមទាំងមានការចូលរួមពីព្រះសង្ឃ មន្ត្រីរាជការ និងកងកម្លាំងប្រដាប់អាវុធយ៉ាងច្រើនកុះករ។

ក្នុងឱកាសនោះ លោក អ៊ុន ចាន់ដា អភិបាលខេត្ត បានថ្លែងទាំងទឹកមុខស្រពោនក្រៀមក្រំថា ការយាងចូលទិវង្គតរបស់ព្រះបរមរតនកោដ្ឋ កាលពីថ្ងៃទី១៥ ខែតុលា ឆ្នាំ២០១២ គឺជាការបាត់បង់ដ៏ធំធេងបំផុតសម្រាប់ជាតិកម្ពុជា។ ព្រះអង្គបានបូជាព្រះកាយពល និងព្រះបញ្ញាញាណ ដើម្បីបុព្វហេតុឯករាជ្យជាតិ បូរណភាពទឹកដី ផ្សះផ្សាជាតិ និងការអភិវឌ្ឍលើគ្រប់វិស័យ។

លោកអភិបាលខេត្ត ក៏បានបួងសួងឧទ្ទិសថ្វាយព្រះរាជកុសលដល់ព្រះវិញ្ញាណក្ខន្ធព្រះអង្គ សូមព្រះអង្គទ្រង់ព្រះមេត្តាទទួលមហាកុសល ដែលកូនចៅបានឧទ្ទិសថ្វាយ និងសូមព្រះវិញ្ញាណក្ខន្ធព្រះអង្គជួយរក្សា ឃុំគ្រងទឹកដី និងប្រជារាស្ត្រកម្ពុជាឱ្យបានសុខក្សេមក្សាន្តជានិច្ច។ ព្រះករុណាព្រះបរមរតនកោដ្ឋ បានប្រសូតនៅថ្ងៃទី៣១ ខែតុលា ឆ្នាំ១៩២២ និងបានយាងចូលព្រះទិវង្គតក្នុងព្រះជន្មាយុ ៩០ព្រះវស្សា៕