(បាគូ, អាស៊ែបៃហ្សង់)៖ នាយករដ្ឋមន្ត្រីអាស៊ែបៃហ្សង់ លោក Ali Asadov បានចាត់ទុកដំណើរទស្សនកិច្ច​ជាផ្លូវការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា គឺជាការបើកផ្លូវបន្ថែមទៀត ជំរុញទំនាក់ទំនងឱ្យកាន់តែស៊ីជម្រៅរវាងកម្ពុជា និងអាស៊ែបៃហ្សង់។

លោកនាយករដ្ឋមន្ត្រីអាស៊ែបៃហ្សង់ បានលើកឡើងបែបនេះ នៅក្នុងជំនួបជាមួយសម្តេចមហាបវរធិបតី ហ៊ុន ម៉ាណែត នារសៀលថ្ងៃទី១៤​ ខែតុលា ឆ្នាំ២០២៦។ ក្នុងជំនួបនេះ នាយករដ្ឋមន្ត្រីអាស៊ែបៃហ្សង់ បានសម្តែង​ការ​ស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាលជ្រៅចំពោះសម្តេចមហាបវរធិបតី ដែលបានអញ្ជើញ​បំពេញ​​ទស្សន​កិច្ចផ្លូវការ និងចូលរួមកិច្ចប្រជុំកំពូល CICA លើកទី៧ នាឱកាសនេះ។

លោកនាយករដ្ឋមន្ត្រី បន្តថា ដំណើរទស្សនកិច្ច និងវត្តមានរបស់សម្តេចនាយករដ្ឋមន្ត្រី គឺជាការបើកផ្លូវបន្ថែម​ទៀត ជំរុញការពង្រឹង និងពង្រីកទំនាក់ទំនងកិច្ចសហប្រតិបត្តិការទ្វេភាគី ឱ្យកាន់តែស៊ីជម្រៅថែមទៀត។ លោក ក៏បានថ្លែងអំណរគុណចំពោះការគាំទ្ររបស់កម្ពុជាដល់ប្រទេសអាស៊ែបៃហ្សង់ លើវេទិកាតំបន់ និង​អន្តរជាតិ ជាពិសេសការបន្តគាំទ្រគ្នាទៅវិញទៅមកក្នុងក្របខ័ណ្ឌអង្គការសហប្រជាជាតិ។

សម្តេចមហាបវរធិបតី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនអាស៊ែបៃហ្សង់ ដែលបានផ្ដល់បដិសណ្ឋារកិច្ចយ៉ាងកក់ក្តៅជូនគណៈប្រតិភូកម្ពុជា ក្នុងអំឡុងពេលនៃដំណើរទស្សនកិច្ចនា​ពេល​នេះ។ សម្ដេចមហាបវរធិបតី បានវាយតម្លៃខ្ពស់លើកិច្ចសហប្រតិបត្តិការទ្វេភាគីកន្លងមក ព្រមទាំង​ប្ដេជ្ញា​បន្តពង្រឹងទំនាក់ទំនងនេះ ឱ្យកាន់តែរីកចម្រើន ដើម្បីផលប្រយោជន៍នៃប្រជាជាតិទាំងពីរ។

សម្តេចមហាបវរធិបតី​ និង​នាយករដ្ឋមន្ត្រី​អាស៊ែបៃហ្សង់ ក៏បានបន្តពិភាក្សា និងផ្លាស់ប្ដូរយោបល់គ្នា ដើម្បី​ពង្រឹង​ ​និងពង្រីក​កិច្ចសហប្រតិបត្តិការទ្វេភាគី លើវិស័យសេដ្ឋកិច្ច ពាណិជ្ជកម្ម និងការវិនិយោគ, ការផ្លាស់​ប្តូរ​បទពិសោធន៍ និងពង្រឹងការបណ្តុះបណ្តាល​លើសកម្មភាពបោសសម្អាតមីន និងយុទ្ធភ័ណ្ឌមិនទាន់ផ្ទុះ, ការ​ធានា​ឱ្យបាននូវសន្តិសុខថាមពល, ការពង្រឹងការតភ្ជាប់ក្នុងវិស័យដឹកជញ្ជូន និងភស្តុភារកម្ម, និងកិច្ចសហ​ប្រតិ​បត្តិការក្នុងវិស័យសន្តិសុខ និងការពារជាតិ​ ព្រមទាំងការបន្តប្រពៃណីនៃការផ្លាស់ប្ដូរអាហារូបករណ៍​ក្នុង​គោលដៅលើកកម្ពស់វិស័យអប់រំ និងទំនាក់ទំនងរវាងប្រជាជននិងប្រជាជន ដែលជាគ្រឹះយ៉ាងសំខាន់​ក្នុង​ការ​បង្កើនការយល់ដឹងពីគ្នា និងរឹតចំណងមិត្តភាពរវាងប្រទេសទាំងពីរឱ្យកាន់តែស៊ីជម្រៅបន្ថែមទៀត។

ក្នុងវិស័យរដ្ឋាភិបាលឌីជីថល, សម្តេច​មហាបវរធិបតី​ និង​​នាយករដ្ឋមន្ត្រី​ បានឯកភាពគ្នាក្នុងការ​លើក​កម្ពស់​កិច្ច​សហប្រតិបត្តិការក្នុង​វិស័យសេវាសាធារណៈជូនប្រជាពលរដ្ឋ​ តាមរយៈ​ការចែករំលែកចំណេះដឹង និងការ​ចូល​រួមអភិវឌ្ឍប្រព័ន្ធឌីជីថលនៅកម្ពុជា ដើម្បីធានាថាការផ្តល់សេវាជូនប្រជាពលរដ្ឋកាន់តែ​មានភាព​ពេញ​លេញ និងទាន់ពេល៕