(ភ្នំពេញ)៖ ទារក និងកុមារកំព្រា ខ្លះម្ដាយស្លាប់ចោល ហើយត្រូវឪពុកបោះបង់ចោល ខ្លះមិនស្គាល់អ្វីផងជាឪពុក ម្ដាយ ហើយត្រូវគេយកមករស់នៅក្រោមដំបូលអង្គការសង្គ្រោះជនអស់សង្ឃឹម និងមណ្ឌលមែកឈើ ដើម្បីមានជីវិតរស់នៅបន្ដ ហើយសម្រាប់ឱកាសបុណ្យភ្ជុំនេះគេមានស្រុកកំណើតទៅជួបជុំ អាសូរអីតែក្មេងៗកំព្រាទាំងនេះ គ្មានផ្ទះ គ្មានសាច់ញាតិទៅលេងនឹងគេ, ជីវិតដ៏ឯកានេះហើយ ទើបអ្នកម្តាយមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា មិនដែលឃ្លាតឆ្ងាយនូវការគិតគូរ យកចិត្តទុក្ខដាក់ទៅដល់កុមារដ៏កំសត់រស់នៅក្រោមដំបូលផ្ទះអង្គការ ទោះក្នុងឳកាសបុណ្យទានមកដល់ អ្នកម្ដាយមនុស្សធម៌ បានចាត់លោកស្រី ម៉ែន នារីសោភ័គ អគ្គលេខាធិការរងទី១កាកបាទក្រហមកម្ពុជា ចុះមកសំណេះសំណាលសួរសុខទុក្ខ និងអំណោយមនុស្សធម៌ ជូនដល់អង្គការថែទាំទារក កុមារកំព្រាខាងលើនេះ ក្នុងនោះក៏មានចាស់ជរាឥតទីពឹង និងមានផ្ទុកមេរោគអេដស៍ផងដែរ។

ក្នុងឱកាសសំណេះសំណាលសួរសុខទុក្ខ និងផ្ដល់អំណោយសម្រាលការលំបាក និងបន្ទុករបស់អង្គការ នាថ្ងៃទី៩ ខែតុលា ឆ្នាំ២០២៦ លោកស្រី ម៉ែន នារីសោភ័គ បានដឹកនាំក្រុមការងារនាំយកនំចំណី ផ្ដល់អាហារ ថវិកា និងស្បៀងមួយចំនួនធំ ដើម្បីទុកជូនដល់អង្គការបន្ដផ្គត់ផ្គង់ទៅមុខទៀត។ នេះជាការជួយសង្គ្រោះផ្នែកសុខភាពផ្លូវចិត្ដ ផ្លូវកាយដ៏ធំធេង មិនអាចកាត់ថ្លៃចំពោះទឹកចិត្ដរបស់សម្ដេចកិត្ដិព្រឹទ្ធបណ្ឌិត ។នេះក៏មិនមែនជាលើកទី១ដែរ បើសម្រាប់អង្គការសង្គ្រោះជនអស់សង្ឃឹម នេះជាលើកទី២៧ហើយ បើចំពោះសមាគមជនឥតទីពឹង ហៅមណ្ឌលមែកឈើ គឺជាលើកទី៤។ ក្នុងនោះអ្នកម្ដាយមនុស្សធម៌ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ធ្លាប់បានចុះសំណេះសំណាលដោយផ្ទាល់ដល់ទារក កុមារ កំព្រា នៅអង្គការសង្រ្គោះជនអស់សង្ឃឹមផងដែរ។

ការចុះសំណេះសំណាលនាពេលនេះ លោកស្រី ម៉ែន នារីសោភ័គ បានថ្លែងថាក្នុងនាមកាកបាទក្រហមកម្ពុជា ដែលមាន សម្តេចព្រះមហាក្សត្រី ព្រះវររាជមាតាជាតិខ្មែរ គង់ប្រថាប់ដ៏ឧត្តុង្គឧត្តម ជាព្រះប្រធានកិត្តិយស និងមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន គឺមិនដែលឃ្លាតឆ្ងាយពីប្រជានុរាស្ដ្រម្ដងណាឡើយ តែងតែខ្វាយខ្វល់គិតគូរជាប់ជានិច្ចនូវសុខទុក្ខ និងការជួយសង្គ្រោះ ។

ជាក់ស្ដែងក្នុងឱកាសចុះមកសំណេះសំណាលផ្ដល់អំណោយនេះ គឺធ្វើឡើងតាមអនុសាសន៍ណែនាំរបស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ទោះអ្នកម្ដាយមនុស្សធម៌មិនបានអញ្ជើញមកដោយផ្ទាល់ តែលោកបានចាត់តំណាងមកមិនឱ្យដាច់នោះឡើយ មួយដោយសារជាឱកាសពិធីបុណ្យកាន់បិណ្ឌ ភ្ជុំបិណ្ឌ ម្យ៉ាងជាទិវាមនុស្សចាស់ជាតិ-អន្តរជាតិផងនោះ ជាពិសេសឆ្លើយតបទៅនឹងតម្រូវការចាំបាច់របស់អង្គការផ្គត់ផ្គង់ ថែទាំ ទារក កុមារបន្ដផង។ ក្នុងនោះនៅអង្គការសង្គ្រោះជនអស់សង្ឃឹមស្ថិតនៅខណ្ឌកំបូល ដែលមានក្មេងៗនិងមនុស្សចាស់នៅក្នុងបន្ទុកប្រមាណ៣០០នាក់ ក្នុងនោះមានកុមារ សិស្ស និស្សិត ២១៥នាក់, លោកគ្រូ-អ្នកគ្រូ ៥៥នាក់ និងលោកយាយចាស់ៗ ៣០នាក់។ ដែលមានលោកស្រី ម៉ារី អិន ជាទីប្រឹក្សាអង្គការសង្គ្រោះជនអស់សង្ឃឹម។

នាឱកាសនោះលោកស្រី ម៉ារី អិន្ស សូមថ្លែងអំណរគុណយ៉ាងជ្រាលជ្រៅ ដល់កាកបាទក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូដល់សុខភាពរបស់លោកស្រីផ្ទាល់ ក៏ដូចជាសុខទុក្ខ បុគ្គលិក សមាជិកក្នុងអង្គការគ្រប់ពេលវេលា។លើសពីនោះ ថវិកា និងសម្ភារទាំងដែលបានប្រគល់មកអង្គការនៅពេលនេះ លោកស្រី នឹងកាន់តែមានលទ្ធភាពផ្គត់ផ្គង់អាហារ និងស្លៀកពាក់គ្រប់គ្រាន់ដល់ក្មេងៗ។

ជាការឆ្លើយតបលោកស្រី ម៉ែន នារីសោភ័គ ក៏បានពាំនាំការសាកសួរសុខទុក្ខនិងកោតសរសើរ ពីសំណាក់ សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះលោកស្រី ម៉ារី អិន្ស ក្នុងការបន្តដឹកនាំ និងជាម្លប់ដ៏កក់ក្តៅដល់កូនៗចៅៗ កុមារកំព្រា អ្នកផ្ទុកមេរោគអេដស៍ និងចាស់ជរាឥតទីពឹង បានយ៉ាងល្អតាំងពីចាប់ផ្ដើមមកទល់នឹងបច្ចុប្បន្ន។

ព្រមជាមួយគ្នានោះលោកស្រី ម៉ែន នារីសោភ័គ បានប្រគល់នូវថវិកា និងស្បៀងឧបភោគបរិភោគ ជូនដល់លោកស្រី ម៉ារី អិន្ស និងបន្ដសំណេះសំណាលដោយផ្ទាល់ជាមួយកុមារ សិស្ស និស្សិត និងលោកយាយចាស់ជរា ដោយភ្ជាប់ជាមួយនឹងអាហារ និងចែកថវិកាដល់ក្មេងៗ និងមនុស្សចាស់ផងដែរ មុននឹងបន្ដដំណើរទៅទីតាំងមណ្ឌលមែកឈើ។

សូមជម្រាបថាបន្ទាប់ពីចុះសំណេះសំណាសួរសុខទុក្ខនៅអង្គការសង្គ្រោះជនអស់សង្ឃឹម លោកស្រី ម៉ែន នារីសោភ័គ បានដឹកនាំក្រុមការងារ បន្ដចុះទៅសំណេះសំណាលនៅមណ្ឌលមែកឈើ ដែលមានកុមារកំព្រា ១៧៤នាក់ និងគ្រូ អ្នកថែទាំ ២៧នាក់ សរុបចំនួន ២០១នាក់។

ក្នុងឱកាសនោះលោកស្រី បានធ្វើការសំណេះសំណាលសួរសុខទុក្ខ និងណែនាំដល់កុមារត្រូវខិតខំរៀនសូត្រ ស្ដាប់ដំបូន្មានលោកគ្រូ អ្នកគ្រូ ចាស់ព្រឹទ្ធាចារ្យ ចេះស្រលាញ់ និងសាមគ្គីគ្នាដូចបងប្អូន ពិសេសផ្ដល់ការអប់រំពីការរស់នៅស្អាត បរិភោគស្អាត និងអនាម័យជាប្រចាំ។ ជាងនេះទៅទៀតជំរុញដល់អ្នកថែទាំទារក និងកុមារនៅក្នុងមណ្ឌលមែកឈើ ត្រូវប្រុងប្រយ័ត្នខ្ពស់ចំពោះជំងឺគ្រុនឈាម និងជំងឺឆ្លង មិនឆ្លងជាច្រើនទៀត ដើម្បីការពារសុខភាពទារក និងកុមារ ឱ្យមានសុខភាពល្អ។

បន្ទាប់ពីកិច្ចសំណេះសំណាល លោកស្រី និងក្រុមការងារបានប្រគល់ថវិកា និងស្បៀងអាហារ ជូនដល់មណ្ឌលមែកឈើ និងចែកថវិកាដល់ក្មេងៗ និងមនុស្សចាស់។ មុននឹងបញ្ចប់នៃការជួបជុំផ្ដល់ភាពកក់ក្ដៅដល់ក្មេងៗនៃមណ្ឌលមែកឈើ លោកស្រី រួមជាមួយក្រុមការងារ បានរៀបចំអាហារដ៏ឆ្ងាញ់ពិសាជូនដល់កុមាររស់នៅក្នុងមណ្ឌលនេះផងដែរ។

គួសបញ្ជាក់ថា ក្នុងឱកាសចុះមកសំណេះសំណាល និងផ្ដល់អំណោយមនុស្សធម៌ដល់មណ្ឌលថែទាំកុមារទាំងពីរខាងលើនេះ រួមមានអង្គការសង្គ្រោះជនអស់សង្ឃឹម និងមណ្ឌលមែកឈើ ដោយក្នុងនោះអង្គការសង្គ្រោះជនអស់សង្ឃឹម ទទួលបានអង្ករ ២តោន, មី ២០កេស, ត្រីខ ៥កេស, ទឹកស៊ីអ៊ីវ ១០យួរ, ទឹកត្រី ១០យួរ, ប្រេងឆា ២កេស, ទឹកក្រូច ១០កេស, ទឹកបរិសុទ្ធឱរ៉ាល់ ១០កេស, សាប៊ូកក់សក់ ៤កេស, សាប៊ូដុសខ្លួន ៤កេស, ឃីតចំនួន ៥០កញ្ចប់, និងថវិកាឧបត្ថម្ភមណ្ឌលចំនួន ៥លានរៀល។ បន្ថែមពីនេះគ្រូ ៥៥នាក់ និងលោកយាយចាស់ៗ ៣០នាក់ ក៏ទទួលបានថវិកាក្នុងម្នាក់ៗ ៥ម៉ឺនរៀលផងដែរ។

ដោយឡែកមណ្ឌលមែកឈើ ទទួលបានអំណោយរួមមាន៖ ទឹកបរិសុទ្ធ ៣០កេស, ទឹកផ្លែឈើ ២០កេស, ប្រេងឆា ៤កេស, សាប៊ូដុសខ្លួន ១០កេស, ផ្លែឈើ ក្រូច-ផ្លែប៉ម ៤កេសធំ, និងថវិកាឧបត្ថម្ភមណ្ឌល ១០លានរៀល។ ក្នុងនោះ កុមារា-កុមារីចំនួន ១៧៤នាក់ ម្នាក់ៗក៏ទទួលបានថវិកា ៥ពាន់រៀល, លោកគ្រូ-អ្នកមើលថែ ២៧នាក់ ម្នាក់ៗទទួលបាន ៥ម៉ឺនរៀល ព្រមទាំងលោកយាយចាស់ៗរស់នៅក្បែរមណ្ឌលចំនួន ១៥នាក់ផ្សេងទៀត ក៏ទទួលបាន៖ អង្ករ ៣០គីឡូក្រាម, មី១កេស,ត្រីខ ១យួរ,ទឹកស៊ីអ៊ីវ ១យួរ, ទឹកត្រី ១យួរ ឃីត និងថវិកា ៥ម៉ឺនរៀលក្នុងម្នាក់ៗដូចគ្នា។ ទន្ទឹមនេះក្រោមការគិតគូរពី សម្តេចកិត្តិព្រឹទ្ធបណ្ឌិត បានឧបត្ថម្ភថវិកា ៥លានសម្រាប់រៀបចំអាហារមួយថ្ងៃយ៉ាងឈ្ងុយឆ្ងាញ់ពិសាជូនដល់កុមារនៅក្នុងមណ្ឌលមែកឈើផងដែរ។

នាពេលនោះមណ្ឌលមែកឈើ ក៏មិនខុសពីអង្គការសង្គ្រោះជនអស់សង្ឃឹម គឺបានសម្ដែងនូវសប្បាយចិត្ដ និងគោរពថ្លែងអំណរគុណ ជាមួយនឹងបួងសួងដល់វត្ថស័ក្កសិទ្ធក្នុងលោក ជួយប្រសិទ្ធិពរជ័យ សិរីសួស្តី ជ័យមង្គល វិបុលសុខគ្រប់ប្រការ ជូនមានតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមមានសុខភាពល្អបរិបូរណ៌ កម្លាំងមាំមួន និងជន្មាយុយឺនយូរ ដើម្បីជាម្លប់ដល់កូនចៅជារៀងរហូតទៅ។

សូមរំលឹកជូនថា ក្នុងឱកាសនៃពិធីបុណ្យកាន់បិណ្ឌ-ភ្ជុំបិណ្ឌ និងទិវាមនុស្សចាស់ជាតិ-អន្តរជាតិ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់តំណាងនាំយកទេយ្យវត្ថុ និងបច្ច័យវេរប្រគេនព្រះសង្ឃនៅតាមវត្តអារាម ដូចជានៅវត្តប្រជុំនទី (ហៅក្រពើហា) ក្នុងខេត្តកណ្តាល និងវត្តស្នំប្រាំពីរ ក្នុងខេត្តកំពត។ ទន្ទឹមនឹងនេះ សម្តេចកិត្តិព្រឹទ្ធបណ្ឌិត ក៏បានចាត់ឱ្យតំណាងជួបសំណេះសំណាល និងផ្តល់អំណោយមនុស្សធម៌ជូនដល់និវត្តន៍ជន និងគ្រួសារមន្ត្រីកាកបាទក្រហមកម្ពុជាទទួលមរណៈភាព, និវត្តន៍ជនជាសិល្បករ-សិប្បករ និងមានវិជ្ជាជីវៈលើវិស័យវប្បធម៌ ចំនួន ២៥១នាក់ មកពីរាជធានីភ្នំពេញ និងខេត្តកណ្តាល, សមាគមស្នាមញញឹមថ្មីនៃក្តីសង្ឃឹមរបស់កុមារ ព្រមទាំងចុះសួរសុខទុក្ខវីរយុទ្ធជនដែលកំពុងសម្រាកព្យាបាលនៅតាមមន្ទីរពេទ្យផងដែរ៕