(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកស្រី ទុយ សិរីរតនៈ ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មាន រួមជាមួយថ្នាក់ដឹកនាំក្រសួងព័ត៌មាន និងពុទ្ធបរិស័ទចំណុះជើងវត្ត នៅព្រឹកថ្ងៃទី៩ ខែតុលា ឆ្នាំ២០២៦ បានអញ្ជើញចូលរួមកាន់បិណ្ឌវេនទី១៣ នៃពិធីបុណ្យភ្ជុំបិណ្ឌ នៅវត្តវិមានតេជៈ ហៅវត្តស្រះចក​ ស្ថិតនៅសង្កាត់ស្រះចក ខណ្ឌដូនពេញ រាជធានីភ្នំពេញ ប្រកបដោយសទ្ធាជ្រះថ្លា។

ពិធីនេះត្រូវបានរៀបចំឡើងយ៉ាងអធិកអធម ដើម្បីប្រគេនទេយ្យទានដល់ព្រះសង្ឃ និងបង្សុកូលឧទ្ទិសកុសលជូនដល់ញាតិកាទាំងប្រាំពីរសន្តាន ដែលបានចែកឋានទៅកាន់លោកខាងមុខ។

ក្នុងឱកាសដ៏មហានក្ខត្តឫក្សនេះ លោករដ្ឋមន្ត្រី នេត្រ ភក្ត្រា និងលោកស្រី ក៏បានឧទ្ទិសកុសលផលបុណ្យជូនដល់ដួងវិញ្ញាណក្ខន្ធវីរកងទ័ព ដែលបានបូជាសាច់ស្រស់ឈាមស្រស់ ការពារបូរណភាពទឹកដីមាតុភូមិ។ នេះជាការបង្ហាញនូវការដឹងគុណ និងការចងចាំជានិច្ចចំពោះវីរភាពរបស់ពួកគាត់។

ឆ្លៀតក្នុងឱកាសដ៏វិសេសវិសាលនេះផងដែរ លោកអភិបាលខេត្ត និងលោកស្រី រួមជាមួយថ្នាក់ដឹកនាំរដ្ឋបាលខេត្ត ក៏បាននាំយកនូវបច្ច័យមួយចំនួនប្រគេនដល់ព្រះសង្ឃគង់ចាំព្រះវស្សា ដើម្បីចូលរួមកសាងសមិទ្ធផលនានាក្នុងវត្តស្រះចក ឱ្យកាន់តែមានការរីកចម្រើន និងស្រស់បំព្រង។

កាយវិការដ៏សប្បុរសធម៌របស់លោករដ្ឋមន្ត្រី នេត្រ ភក្ត្រា និងលោកស្រី ព្រមទាំងមន្ត្រីរាជការនៃក្រសួងព័ត៌មាន ក៏ដូចជាពុទ្ធបរិស័ទ មិនត្រឹមតែបានរួមចំណែកលើកស្ទួយវិស័យព្រះពុទ្ធសាសនាប៉ុណ្ណោះទេ ថែមទាំងបានបង្ហាញពីការយកចិត្តទុកដាក់របស់ថ្នាក់ដឹកនាំ ចំពោះការអភិវឌ្ឍន៍សង្គមជាតិទាំងមូល៕