លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង អញ្ជើញកាន់បិណ្ឌទី១០ នៅវត្តបទុមវតី ឧទ្ទិសកុសលដល់វិញ្ញាណក្ខន្ធបុព្វការីជន និងវីរៈកងទ័ពខ្មែរ (Video inside)
06-10-2026 16:24
(ភ្នំពេញ)៖ លោកអ្នកឧកញ៉ា ទ្រី ភាព បេសកជនពិសេស ទីប្រឹក្សាផ្ទាល់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាអគ្គនាយកក្រុមហ៊ុន ទ្រី ភាព គ្រុប និងអ្នកឧកញ៉ា គៀន ស្រីនាង ជាឧត្តមភរិយា ព្រមទាំងថ្នាក់ដឹកនាំ និងបុគ្គលិកក្រុមហ៊ុនទាំងអស់ បានមូលមតិប្រកបដោយក្តីជ្រះថ្លា អញ្ជើញកាន់បិណ្ឌទី១០ នៅវត្តបទុមវតីរាជវរារាម ក្នុងសង្កាត់ចតុមុខ រាជធានីភ្នំពេញ។
ពិធីបុណ្យកាន់បិណ្ឌ និងភ្ជុំបិណ្ឌ ជាពិធីបុណ្យព្រះពុទ្ធសាសនាដ៏ធំមួយក្នុងប្រទេសកម្ពុជា តែងប្រារព្ធធ្វើឡើងចាប់ពីថ្ងៃ១រោច ដល់ថ្ងៃ១៥រោច ខែភទ្របទ។ ពិធីបុណ្យកាន់បិណ្ឌ និងភ្ជុំបិណ្ឌប្រារព្ធធ្វើឡើង ដើម្បីទ្រទ្រង់ព្រះសង្ឃគង់ចាំព្រះវស្សាតាមទីអារាមក្នុងរដូវវស្សា ដែលជួបការលំបាកក្នុងការនិមន្តបិណ្ឌបាត្រ។ មួយវិញទៀត ការប្រារព្ធពិធីបុណ្យកាន់បិណ្ឌ និងភ្ជុំបិណ្ឌ ជាការបង្ហាញកតញ្ញូគុណចំពោះអ្នកមានឧបការគុណរួមមានឪពុកម្តាយ ជីដូនជីតា ចាស់ព្រឹទ្ធាចារ្យ គ្រូបាចារ្យជាដើម។ បន្ថែមពីលើនោះ ពិធីបុណ្យកាន់បិណ្ឌ និងភ្ជុំបិណ្ឌ ក៏ជាពេលវេលាដែលកូនចៅជួបជុំធ្វើបុណ្យនៅតាមទីអារាម ដើម្បីឧទ្ទិសកុសលផលបុណ្យដល់ជីដូនជីតា និងបុព្វការីជន ដែលបានធ្វើមរណកាល។
ក្នុងពិធីបុណ្យកាន់បិណ្ឌវេនទី១០ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងបុគ្គលិកក្រុមហ៊ុនទាំងអស់ បានរៀបចំធ្វើឡើងជាលំដាប់លំដោយតាមលំអានប្រពៃណីរបស់ខ្មែរ។ នៅរសៀលថ្ងៃចន្ទ ៩រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែតុលា ឆ្នាំ២០២៦ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងបុគ្គលិកទាំងអស់ បានជួបជុំគ្នាសូត្រមន្ត។ ក្នុងពិធីសូត្រមន្តនាពេលរសៀលនោះ ក៏ទទួលបានកិត្តិយសពីសំណាក់សម្តេចកិត្តិសង្គហបណ្ឌិត ម៉ែន សំអន អញ្ជើញចូលរួមជាមួយដែរ។
ក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង បានបូជាទៀនធូប និងផ្កាផ្ញីថ្វាយដល់ព្រះរតនត្រ័យ។ បន្ទាប់មកលោកតាអាចារ្យបានដឹកនាំនមស្សការសមាទានសីល និងនិមន្តព្រះសង្ឃសូត្រមន្តបន្សុកូលឧទ្ទិសកុសលដល់វិញ្ញាណក្ខន្ធបុព្វការីជនដែលបានចែកឋាន ព្រមទាំងវិញ្ញាណក្ខន្ធវីរៈកងទ័ពខ្មែរ ដែលបានពលីក្នុងបុព្វហេតុជាតិ និងទឹកដី។
ក្រៅពីសូត្រមន្តបង្សុកូលហើយនោះ ព្រះសង្ឃ ដឹកនាំដោយសម្តេចព្រះពុទ្ធជ័យមុនី បណ្ឌិត ឃឹម សន សម្តេចព្រះសង្ឃនាយករងទី៣ គណៈមហានិកាយ នៃព្រះរាជាណាចក្រកម្ពុជា និងជាព្រះគ្រូសូត្រស្តាំវត្តបទុមវតី បានសូត្រពុទ្ធជ័យប្រោសព្រំប្រសិទ្ធពរជ័យសិរីមហាប្រសើរកើតមានដល់សម្តេចកិត្តិសង្គហបណ្ឌិត ម៉ែន សំអន លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមបុគ្គលិកប្រុសស្រីគ្រប់រូបដែលមានក្តីជ្រះថ្លា ចូលរួមកាន់បិណ្ឌទី១០ នៅវត្តបទុមវតី។ នៅក្នុងឱកាសសម្តេចសង្គហបណ្ឌិត ម៉ែន សំអន លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ក៏បានក្តីជ្រះថ្លាចំពោះព្រះធម៌ ហើយបាននិមន្តសម្ដេចព្រះមង្គលមុនីរង្សី ហ៊ូ ឈីវនាថ សម្តែងព្រះធម៌ទេសនា ដើម្បីបានយល់ដឹងបន្ថែមពីការធ្វើបុណ្យកាន់បិណ្ឌ និងភ្ជុំបិណ្ឌ។
ក្នុងឱកាសនៃការកាន់បិណ្ឌនោះ សម្តេចព្រះពុទ្ធជ័យមុនី បណ្ឌិត ឃឹម សន ក៏មានថេរដីកាកោតសរសើរចំពោះលោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ជាព្រះពុទ្ធសាសនិកជន ដែលមានសទ្ធាយ៉ាងមុតមាំចំពោះព្រះពុទ្ធសាសនា ហើយតែងបានលះបង់ទ្រព្យធនរបស់ខ្លួនជួយទ្រទ្រង់ដល់ព្រះពុទ្ធសាសនានៅកម្ពុជា។
លុះដល់ព្រឹកថ្ងៃ ១០រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៦ ខែតុលា ឆ្នាំ២០២៦ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងបុគ្គលិកទាំងអស់ បានជួបជុំគ្នារៀបចំពិធីប្រគេនទេយ្យទានមានចង្ហាន់ ស្លាដក់ បច្ច័យ និងគ្រឿងឧបភោគបរិភោគនានា ប្រគេនដល់ព្រះសង្ឃ។
បន្ទាប់ពីនោះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ព្រមទាំងបុគ្គលិកទាំងអស់ បានរួមគ្នាធ្វើពិធីរាប់បាត្រ។ បន្ទាប់ពីពិធីរាប់បាត្រហើយនោះ លោកតាអាចារ្យ ក៏បានដឹកនាំពិធីវេរចង្ហាន់ និងទេយ្យទានទាំងឡាយប្រគេនដល់ព្រះសង្ឃ ព្រមទាំងបានឧទ្ទិសមហាកុសលទាំងឡាយជូនដល់បុព្វការីជន ដែលបានធ្វើមរណកាល និងវីរៈកងទ័ព ដែលបានពលីជីវិតក្នុងបុព្វហេតុការពារជាតិ និងទឹកដី។
ក្នុងពិធីកាន់បិណ្ឌទី១០នេះ ក្រៅតែបំពេញទានតាមលំអានប្រពៃណីព្រះពុទ្ធសាសនាហើយនោះ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ក៏បានបំពេញទានជាមួយលោកតាលោកយាយ ក៏ដូចជាសិស្សានុសិស្សដែលកំពុងស្នាក់នៅក្នុងវត្ត។ ពិធីបុណ្យកាន់បិណ្ឌទី១០ ត្រូវបានបញ្ចប់ទៅដោយបរិយាកាសសប្បាយរីករាយ និងពោរពេញដោយទឹកចិត្តជ្រះថ្លាជាទីបំផុត។
សូមបញ្ជាក់ថា ពិធីបុណ្យកាន់បិណ្ឌវេនទី១០ នៅវត្តបទុមវតីរាជវរារាមនេះ លោកអ្នកឧកញ៉ា បណ្ឌិត មហាករុណាធម្មសិរីវិសុទ្ធិមុនី អគ្គមហាឧបាសកពុទ្ធសាសនូបត្ថម្ភក៍ ទ្រី ភាព និងលោកជំទាវ អ្នកឧកញ៉ា មហាធម្មរតនវិសុទ្ធិ អគ្គមហាឧបាសិកា ពុទ្ធសាសនូបត្ថម្ភក៍ គៀន ស្រីនាង បាននាំយកទេយ្យទានប្រគេនវត្តរួមមាន៖ អង្ករ ២តោន មីជាតិ ១៨កេស ស្ករសបាវ ទឹកដោះគោ ៥កេស ទឹកសុទ្ធ ៥០កេស ទឹកសណ្តែក ៥០កេស ទឹកក្រូច ២០កេស ទឹកផ្លែឈើ ២០កេស ទឹកត្រី ១០យួរ ទឹកស៊ីអ៊ីវ ១០យួរ អំបិល ២០គីឡូក្រាម បច្ច័យសម្រាប់តម្កល់ជើងបិណ្ឌការកសាង ៦០.០០០.០០០រៀល។
ក្រៅពីនោះលោកទាំងពីរ ក៏បានប្រគេនបច្ច័យដល់បានប្រគេនបច្ច័យដល់សម្ដេចព្រះមហាសង្ឃរាជ នន្ទ ង៉ែត ៤.០០០.០០០រៀល សម្តេចព្រះពុទ្ធជ័យមុនី ឃឹម សន ៤.០០០.០០០រៀល សម្ដេចព្រះមង្គលមុនីរង្សី ហ៊ូ ឈីវនាថ ២.០០០.០០០រៀល ព្រមទាំងបច្ច័យប្រគេនព្រះសង្ឃ ជូនអាចារ្យ តាជី-យាយជី និងសិស្ស-និស្សិត ៥៣១អង្គ/នាក់។ ក្នុងពិធីបុណ្យកាន់បិណ្ឌវេនទី១០នេះ ចំណាយថវិកាសរុប ២៥០.០០០.០០០រៀល។
ក្រៅពីពិធីបុណ្យកាន់បិណ្ឌខាងលើនេះ ក្រុមហ៊ុនជាបុត្រសម្ព័ន្ធ និងសាខានៃក្រុមហ៊ុន ទ្រី ភាព គ្រុប ក្រោមការដឹកនាំរបស់លោកអ្នកឧកញ៉ា ទ្រី ភាព ក៏បានប្រតិបត្តិពិធីកាន់បិណ្ឌតាមវេននៅទីវត្តអារាមក្នុងតំបន់ក្រុមហ៊ុននីមួយៗផងដែរ។ មិនត្រឹមតែប៉ុណ្ណោះ ក្នុងនាមក្រុមការងារគណបក្សចុះមូលដ្ឋានឃុំត្បែង ស្រុកកណ្ដាលស្ទឹង ខេត្តកណ្ដាល ក៏ដូចជាស្រុកប្រាសាទបល័ង្ក ខេត្តកំពង់ធំ លោកអ្នកឧកញ៉ា ទ្រី ភាព ក៏បានចូលរួមកាន់បិណ្ឌនៅវត្តអារាម តាមបណ្ដាឃុំមូលដ្ឋាន៕
