(បន្ទាយមានជ័យ)៖ កងរាជអាវុធហត្ថខេត្តបន្ទាយមានជ័យ បានបញ្ជូនជនសង្ស័យចំនួន ៣នាក់ ទៅកាន់សាលាដំបូងខេត្ត នៅរសៀលថ្ងៃអាទិត្យ ទី៤ ខែតុលា ឆ្នាំ២០២៦ ដើម្បីអនុវត្តតាមនីតិវិធីច្បាប់ ពាក់ព័ន្ធនឹងករណីរត់ពន្ធទំនិញដោយខុសច្បាប់ និងប្រើប្រាស់សារធាតុញៀន។

ជនសង្ស័យទាំងនេះ គឺជាកម្មករស៊ីឈ្នួលដឹកជញ្ជូនទំនិញពីប្រទេសថៃចូលមកកម្ពុជា តាមបណ្ដោយព្រំដែនក្នុងស្រុកម៉ាឡៃ ខេត្តបន្ទាយមានជ័យ។

ប្រតិបត្តិការនេះបានធ្វើឡើងនៅវេលាម៉ោង ១៩:៤៥នាទី ថ្ងៃទី០២ ខែតុលា ឆ្នាំ២០២៦ នៅចំណុចភូមិអភិវឌ្ឍន៍ ឃុំទួលពង្រ ស្រុកម៉ាឡៃ ដោយកម្លាំងជំនាញមូលដ្ឋានកងរាជអាវុធហត្ថស្រុកម៉ាឡៃ សហការជាមួយកម្លាំងយោធាវរសេនាតូច៥១១។

ជនសង្ស័យពីរនាក់ដំបូង ឈ្មោះ នួម ផានុន ភេទប្រុស អាយុ២០ឆ្នាំ និងឈ្មោះ រិត ចាន់រ៉េត ភេទប្រុស អាយុ១៩ឆ្នាំ ត្រូវបានឃាត់ខ្លួន រួមជាមួយវត្ថុតាងជាសម្ភារប្រើប្រាស់ចម្រុះរបស់ប្រទេសថៃ។

ក្រោយការសួរនាំ ជនសង្ស័យបានសារភាពថា ពួកគេស៊ីឈ្នួលដឹកជញ្ជូនទំនិញទាំងនេះ តាមការណែនាំពីស្ត្រីម្នាក់ឈ្មោះ ចែ បូ (Je Bo) ជនជាតិខ្មែររស់នៅប្រទេសថៃ ដោយទទួលបានកម្រៃឈ្នួល ៣០,០០០រៀល ក្នុងម្នាក់។ លើសពីនេះ ឈ្មោះ នួម ផានុន ក៏ត្រូវបានរកឃើញមានសារធាតុញៀនវិជ្ជមាន (+) នៅក្នុងទឹកនោមផងដែរ។

ផ្អែកលើចម្លើយសារភាព និងតម្រុយបទល្មើស កម្លាំងជំនាញបានបន្តឃាត់ខ្លួនបក្ខពួកម្នាក់ទៀត ឈ្មោះ ឈិន សាវី ភេទប្រុស អាយុ៤៤ឆ្នាំ នៅវេលាម៉ោង ១៤:០០ នាទី ថ្ងៃទី០៣ ខែតុលា ឆ្នាំ២០២៦ នៅចំណុចភូមិបន្ទាយទី១ ឃុំទួលពង្រ ស្រុកម៉ាឡៃ។

ជនសង្ស័យទាំង៣នាក់ បានឆ្លើយសារភាពថា ពួកគេពិតជាបានឆ្លងអូរព្រំដែនចូលទៅក្នុងប្រទេសថៃ ដើម្បីយកទំនិញចូលមកក្នុងភូមិសាស្ត្រស្រុកម៉ាឡៃពិតប្រាកដមែន។

លោកវរសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថស្រុកម៉ាឡៃ បានបញ្ជាក់ថា ករណីនេះត្រូវបានកសាងសំណុំរឿងបញ្ជូនបន្តទៅបញ្ជាការដ្ឋានកងរាជអាវុធហត្ថខេត្ត ដើម្បីចាត់ការតាមនីតិវិធី។

លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មើសបានឱ្យដឹងថា ការបង្ក្រាបករណីខាងលើនេះ ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ៕