សហជីពអរគុណរាជរដ្ឋាភិបាល ដែលបានដំឡើងប្រាក់ឈ្នួលជូនកម្មករនិយោជិតជារៀងរាល់ឆ្នាំ ដែលបង្ហាញពីការយកចិត្តទុកដាក់ខ្លាំងចំពោះកម្មករនិយោជិត
02-10-2026 16:32
(ភ្នំពេញ)៖ សហជីពធំៗនៅកម្ពុជា បានថ្លែងអំណរគុណចំពោះរាជរដ្ឋាភិបាល ដែលបានយកចិត្តទុកដាក់លើជីវភាពរបស់កម្មករនិយោជិតតាមរយៈការបន្តដំឡើងប្រាក់ឈ្នួលអប្បបរមាជារៀងរាល់ឆ្នាំ ខណៈដែលប្រទេសផ្សេងៗមិនអាចដំឡើងប្រាក់ឈ្នួលជូនកម្មកររបស់ខ្លួន ដោយសារបញ្ហាប្រឈមជាច្រើនរួមមាន វិបត្តិកូវីដ-១៩ និងសង្គ្រាមនៅក្នុងតំបន់មួយចំនួន។
លោក សំ សឿន ប្រធានសហភាពពលកម្មជាតិកម្ពុជា បានថ្លែងអំណរគុណចំពោះរាជរដ្ឋាភិបាល ដែលតែងតែយកចិត្តទុកដាក់លើបញ្ហាជីវភាព និងផលប្រយោជន៍របស់កម្មករនិយោជិត ព្រមទាំងផ្តួចផ្តើមឱ្យមានការដំឡើងប្រាក់ឈ្នួលជារៀងរាល់ឆ្នាំ ទោះបីការកើនឡើងមានកម្រិតតិចតួចក៏ដោយ។
លោកបានបញ្ជាក់ថា៖ «ក្នុងនាមសហជីព យើងខ្ញុំសូមគោរពអរគុណដល់រាជរដ្ឋាភិបាល ដែលតែងតែយកចិត្តទុកដាក់ទៅលើបញ្ហាជីវភាពរស់នៅរបស់បងប្អូនកម្មករនិយោជិត ហើយផ្តួចផ្តើមឱ្យមានការដំឡើងប្រាក់ឈ្នួលជារៀងរាល់ឆ្នាំ បើទោះបីជានៅមានកម្រិតតិចតួចក៏ដោយ»។
លើសពីនេះ លោកថា ទោះបីកម្ពុជាបានជួបប្រទះនូវបញ្ហាប្រឈមជាច្រើនដូចជា វិបត្តិកូវីដ-១៩ សង្គ្រាមនៅតាមបណ្តាប្រទេសមួយចំនួន និងបញ្ហាព្រំដែនរវាងកម្ពុជា និងថៃ ក៏កម្ពុជានៅតែអាចបន្តដំឡើងប្រាក់ឈ្នួលជូនកម្មករនិយោជិតបាន។
លោក សំ សឿន បានបង្ហាញក្តីសង្ឃឹមថា ការដំឡើងប្រាក់ឈ្នួលនាពេលនេះ នឹងចូលរួមចំណែកដល់ការលើកកម្ពស់ជីវភាពរបស់កម្មករនិយោជិត។ ជាមួយគ្នានេះ លោកក៏បានអំពាវនាវដល់ម្ចាស់ផ្ទះជួល អ្នកដឹកជញ្ជូន និងអ្នកប្រកបអាជីវកម្មលក់ដូរនានា កុំដំឡើងតម្លៃជួល ទំនិញ ឬសេវាកម្មខ្ពស់ពេក ដែលអាចប៉ះពាល់ដល់ផលប្រយោជន៍ដែលកម្មករទទួលបានពីការដំឡើងប្រាក់ឈ្នួល។
ជាមួយគ្នានេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានសម្តែងការអរគុណចំពោះរាជរដ្ឋាភិបាល ដែលបានដំឡើងប្រាក់ឈ្នួលសម្រាប់ឆ្នាំ២០២៧ ដោយចាត់ទុកថា ការកើនឡើងនេះជាកិច្ចខិតខំប្រឹងប្រែងមួយក្នុងការលើកកម្ពស់ជីវភាពរបស់កម្មករនិយោជិត។
លោកបានបញ្ជាក់ថា៖ «ក្នុងនាមតំណាងបងប្អូនកម្មករនិយោជិត ខ្ញុំសូមអរគុណដល់រាជរដ្ឋាភិបាល ដែលបានដំឡើងប្រាក់ឈ្នួលសម្រាប់ឆ្នាំ២០២៧ខាងមុខនេះ។ បើទោះបីជាមានការកើនឡើងបន្តិចបន្តួចក៏ដោយ ប៉ុន្តែកិច្ចខិតខំប្រឹងប្រែងរបស់រាជរដ្ឋាភិបាល ពិតជាបានចូលរួមលើកកម្ពស់ជីវភាពរបស់បងប្អូនកម្មករ»។
បើតាមលោក ស៊ីណា បានបន្ថែមថា ការដំឡើងប្រាក់ឈ្នួលនេះកើតឡើងនៅក្នុងបរិបទដែលកម្ពុជា និងប្រទេសជាច្រើនបានប្រឈមនឹងបញ្ហាប្រឈមសេដ្ឋកិច្ច និងសង្គមជាបន្តបន្ទាប់ រួមមានវិបត្តិកូវីដ-១៩ សង្គ្រាមនៅតំបន់មួយចំនួន និងបញ្ហាព្រំដែនកម្ពុជា-ថៃ ប៉ុន្តែកម្ពុជានៅតែអាចបន្តដំឡើងប្រាក់ឈ្នួលសម្រាប់កម្មករនិយោជិតបាន។
ថ្នាក់ដឹកនាំសហជីពរូបនេះបានចាត់ទុកថា ការបន្តដំឡើងប្រាក់ឈ្នួលជារៀងរាល់ឆ្នាំ គឺជាការបង្ហាញពីការយកចិត្តទុកដាក់ចំពោះជីវភាព និងសុខុមាលភាពរបស់កម្មករនិយោជិត ព្រមទាំងជាកត្តាមួយដែលអាចជួយឱ្យកម្មករទទួលបានប្រាក់ចំណូលកាន់តែប្រសើរឡើងសម្រាប់ការចំណាយប្រចាំថ្ងៃ៕
