(កំពត)៖ លោកបណ្ឌិត ប៉ែន ស៊ីម៉ន អ្នកតំណាងរាស្ត្រមណ្ឌលកំពត សមាជិកអចិន្ត្រៃយ៍ និងជាប្រធានគណៈកម្មការទី១០ នៃរដ្ឋសភា បានជំរុញយ៉ាងទទូចដល់សិស្សានុសិស្សទាំងអស់ ឱ្យបន្តខិតខំសិក្សារៀនសូត្រ អភិវឌ្ឍសមត្ថភាពខ្លួន ដើម្បីយកចំណេះដឹងទៅបម្រើសង្គមជាតិ និងចូលរួមចំណែកក្នុងការអភិវឌ្ឍប្រទេសកម្ពុជាឱ្យកាន់តែរីកចម្រើន។

ការលើកឡើងនេះ ធ្វើឡើងក្នុងពិធីសំណេះសំណាល និងប្រគល់រង្វាន់លើកទឹកចិត្តដល់សិស្សជ័យលាភីប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៥-២០២៦ ទូទាំងខេត្តកំពត កាលពីថ្ងៃទី២៧ ខែកញ្ញា ឆ្នាំ២០២៦ នៅបរិវេណពហុកីឡដ្ឋានខេត្តកំពត។

ពិធីនេះមានការចូលរួមជាគណៈអធិបតីពីឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ រួមជាមួយថ្នាក់ដឹកនាំខេត្ត និងសិស្សានុសិស្សជាង ៥,០០០នាក់។

លោកបណ្ឌិត ប៉ែន ស៊ីម៉ន បានសង្កត់ធ្ងន់ថា ចំណេះដឹងគឺជាទ្រព្យសម្បត្តិដ៏មានតម្លៃបំផុតសម្រាប់មនុស្សក្នុងសម័យបច្ចុប្បន្ន ហើយការប្រឡងជាប់នាពេលនេះ គ្រាន់តែជាជំហានដំបូងសម្រាប់បន្តការសិក្សានៅកម្រិតខ្ពស់ និងអភិវឌ្ឍខ្លួន មិនមែនជាទីបញ្ចប់នៃការរៀនសូត្រនោះទេ។ លោកបានបន្ថែមថា ការអភិវឌ្ឍធនធានមនុស្ស គឺជាអាទិភាពសំខាន់មួយក្នុងយុទ្ធសាស្ត្របញ្ចកោណ ដំណាក់កាលទី១ ដែលការអប់រំមានតួនាទីស្នូលក្នុងការបង្កើតធនធានមនុស្សប្រកបដោយចំណេះដឹង ជំនាញ និងសីលធម៌។

ដើម្បីជាការលើកទឹកចិត្តដល់ការខិតខំប្រឹងប្រែងរបស់សិស្ស និងលោកគ្រូ-អ្នកគ្រូ លោកបណ្ឌិតបានផ្តល់រង្វាន់ និងថវិកាដល់សិស្សជ័យលាភីសរុប ៤,៦៩៤នាក់ តាមនិទ្ទេស រួមទាំងម៉ូតូ Honda Beat ស៊េរីឆ្នាំ២០២៦ ចំនួន ៦២គ្រឿង សម្រាប់សិស្សនិទ្ទេស A។

ក្រៅពីនេះ លោកក៏បានប្រកាសផ្តល់អាហារូបករណ៍ថ្នាក់ឧត្តមសិក្សាចំនួន ១៥០កន្លែង សម្រាប់សិស្សក្នុងខេត្តកំពត ដើម្បីផ្តល់ឱកាសឱ្យពួកគេបន្តការសិក្សា និងពង្រឹងសមត្ថភាពរបស់ខ្លួន។ ការវិនិយោគលើវិស័យអប់រំនេះ នឹងរួមចំណែកយ៉ាងសំខាន់ក្នុងការកសាងមូលដ្ឋានគ្រឹះដ៏រឹងមាំសម្រាប់អនាគតយុវជន និងការអភិវឌ្ឍប្រទេសជាតិប្រកបដោយចីរភាព៕