(កំពង់ស្ពឺ)៖ ព្រឹកថ្ងៃទី១៥ ខែកញ្ញា ឆ្នាំ២០២៦ លោក រិន វីរៈ ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី រដ្ឋលេខាធិការក្រសួងផែនការ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសំរោងទង បានអញ្ជើញជាអធិបតីក្នុងកម្មវិធីវេទិកាសាធារណៈមួយយ៉ាងសំខាន់។ វេទិកានេះត្រូវបានរៀបចំឡើងនៅមូលដ្ឋានឃុំក្រាំងអំពិល ស្រុកសំរោងទង ខេត្តកំពង់ស្ពឺ ដោយមានការចូលរួមពីសំណាក់ប្រជាពលរដ្ឋយ៉ាងច្រើនកុះករ។

គោលបំណងសំខាន់នៃវេទិកាសាធារណៈនេះ គឺដើម្បីត្រួតពិនិត្យ គាំទ្រ និងជំរុញការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត។ ក្នុងឱកាសនោះ លោក រិន វីរៈ បានគូសបញ្ជាក់អំពីសារៈសំខាន់នៃការចូលរួមរបស់ប្រជាពលរដ្ឋក្នុងការអនុវត្តគោលនយោបាយរដ្ឋាភិបាល ដើម្បីធានាបាននូវការអភិវឌ្ឍប្រកបដោយបរិយាប័ន្ន និងនិរន្តរភាព។

លោកបានលើកឡើងថា យុទ្ធសាស្ត្របញ្ចកោណដំណាក់កាលទី១ គឺជាផែនទីបង្ហាញផ្លូវដ៏ច្បាស់លាស់សម្រាប់កម្ពុជាឆ្ពោះទៅរកការរីកចម្រើនលើគ្រប់វិស័យ ទាំងសេដ្ឋកិច្ច សង្គមកិច្ច និងការកែទម្រង់ស្ថាប័ន។ វេទិកានេះបានផ្តល់ឱកាសដ៏ល្អសម្រាប់ប្រជាពលរដ្ឋក្នុងការលើកឡើងនូវសំណួរ កង្វល់ និងផ្តល់មតិយោបល់ស្ថាបនា ដើម្បីរួមចំណែកធ្វើឱ្យការអនុវត្តគោលនយោបាយកាន់តែមានប្រសិទ្ធភាព និងឆ្លើយតបទៅនឹងតម្រូវការជាក់ស្តែងរបស់មូលដ្ឋាន៕