(ភ្នំពេញ)៖ បន្ទាប់ពីបញ្ចប់ដំណើរទស្សនកិច្ចផ្លូវរដ្ឋរយៈពេលពីរថ្ងៃនៅកម្ពុជា លោក មីន អោង ឡាំង ប្រធានាធិបតីមីយ៉ាន់ម៉ា បានបង្ហាញក្តីសោមនស្សរីករាយ ព្រមទាំងថ្លែងថ្លែង​អំណរគុណស្មោះសរចំពោះសម្តេចតេជោ ហ៊ុន សែន ប្រមុខរដ្ឋស្តីទី រដ្ឋាភិបាល និងប្រជាជនកម្ពុជា ចំពោះបដិសណ្ឋារកិច្ច និងការគួរសមដ៏កក់ក្តៅ និងរួសរា​យ​រាក់​ទាក់។

ក្រៅពីថ្លែងអំណរគុណចំពោះការបដិសណ្ឋារកិច្ចប្រកបដោយភាពកក់ក្តៅ និងស្និទ្ធស្នាល លោកប្រធានាធិបតីមីយ៉ាន់ម៉ា បានបង្ហាញការជឿជាក់ថា ការពិភាក្សាដ៏ស្និទ្ធស្នាល និង​ប្រកប​ដោយផ្លែផ្ការបស់យើង នឹងរួមចំណែកដល់ការពង្រឹង​បន្ថែម​​ទៀតនូវទំនាក់ទំនង​ទ្វេ​ភាគី​​ដ៏យូរអង្វែងរវាងប្រទេសទាំងពីរ និងបើកផ្លូវថ្មីៗសម្រាប់ជំរុញ​កិច្ច​សហប្រតិបត្តិការ​ដែល​ផ្ដល់​ផលប្រយោជន៍ទៅវិញទៅមកលើវិស័យផ្សេងៗរវាងប្រទេស និងប្រជាជន​ទាំង​ពីរ។

លោកប្រធានាធិបតី បានគូសរំលេចទៀតថា លទ្ធផលវិជ្ជមាននៃដំណើរទស្សនកិច្ចនេះ ក៏​នឹងពង្រឹងចំណងមិត្តភាពយូរអង្វែង និងជំរុញ ចំណងមិត្តភាពរវាងប្រជាជន និងប្រជាជន​ឱ្យកាន់តែជិតស្និទ្ធផងដែរ។

លោក មីន អោង ឡាំង ក៏បានបង្ហាញចំណាប់អារម្មណ៍ចំពោះដំណើរទស្សនកិច្ច​នៅ​ប្រាង្គ​ប្រាសាទកម្ពុជា ក្នុងខេត្តសៀមរាប។ លោកបានគូសរំលេចថា ដំណើរទស្សនកិច្ច​ទៅកាន់​ខេត្តសៀមរាប ដែលជាទីក្រុងមេត្រីភាពនឹងទីក្រុងបាហ្កាន នៃប្រទេសមីយ៉ាន់ម៉ា បាន​អនុញ្ញាតឱ្យលោកឈ្វេងយល់ពីបេតិកភណ្ឌ​ដ៏សម្បូរបែបរបស់កម្ពុជា។

ក្នុងលិខិតនេះ ប្រធានាធិបតីមីយ៉ាន់ម៉ា បានបង្ហាញការទន្ទឹងរង់ចាំស្វាគមន៍សម្ដេចតេជោ ទៅកាន់ប្រទេសមីយ៉ាន់ម៉ា នៅពេលវេលាសម​ស្រប​ណាមួយ ដើម្បី​តបស្នងចំពោះ​បដិសណ្ឋារកិច្ចដ៏កក់ក្ដៅ​ដែលបាន​ផ្តល់ជូនរូបលោក។

សូមបញ្ជាក់ថា លោក មីន អោង ឡាំង បានដឹកនាំគណៈប្រតិភូជាន់ខ្ពស់របស់មីយ៉ាន់ម៉ា មកបំពេញទស្សនកិច្ចផ្លូវរដ្ឋនៅកម្ពុជារយៈពេលពីរថ្ងៃកាលពីថ្ងៃទី១១ និង១២ ខែកញ្ញា កន្លងទៅនេះ។ ដំណើរទស្សនកិច្ចនេះ លោកបានជួបប្រជុំកំពូលជាមួយសម្តេចតេជោ ប្រជុំទ្វេភាគីជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ហើយក៏បានជួបសម្តែងការគួរសមជាមួយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា។

ចុងបញ្ចប់នៃដំណើរទស្សនកិច្ចនេះ លោកប្រធានាធិបតី បានអញ្ជើញទស្សនាប្រាង្គ​ប្រាសាទដ៏មហស្ចារ្យរបស់ខ្មែរនៅខេត្តសៀមរាប៕