(កំពង់ធំ)៖ វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការ​​គណៈ​រដ្ឋមន្រ្តី បានសហការជាមួយរដ្ឋបាលខេត្តកំពង់ធំ រៀបចំ​វេទិកាសន្ទនាក្រោមប្រធានបទស្ដីពី​ «ការពង្រឹងសមត្ថភាពអង្គការសង្គមស៊ីវិលក្នុងយុគសម័យ​​​​ឌីជីថល» ដែល​បានប្រព្រឹត្តទៅនៅព្រឹកថ្ងៃទី១៤ ខែកញ្ញា ឆ្នាំ២០២៦ នៅក្រុងស្ទឹងសែន ក្រោមអធិបតីភាពលោក ប៉ៃ សំបូរ​ អគ្គលេខាធិការ​នៃអគ្គលេខាធិការដ្ឋាន​​ វ.ស.ស. តំណាងដ៏ខ្ពង់ខ្ពស់លោក កឹមរ័ត្ន វិសិដ្ឋ នាយករង​ខុទ្ទកាល័យ​សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី​នៃព្រះរាជាណាចក្រកម្ពុជា រដ្ឋលេខាធិការទីស្តីការគណៈរដ្ឋមន្រ្តី និងជាប្រធានក្រុមប្រឹក្សា​ភិបាល វ.ស.ស. និងលោក អ៊ុង វុទ្ធី អភិបាលរង​នៃគណៈអភិបាលខេត្តកំពង់ធំ តំណាងដ៏ខ្ពង់ខ្ពស់លោក នួន ផារ័ត្ន អភិបាលនៃគណៈអភិបាលខេត្តកំពង់ធំ ដោយ​មានការអញ្ជើញចូលរួម​ពី​អង្គការសង្គមស៊ីវិលក្នុងខេត្តកំពង់ធំ និងអាជ្ញាធរមូលដ្ឋានជាច្រើននាក់។

ថ្លែងក្នុងពិធីបើកអង្គវេទិកាសន្ទនានាព្រឹកនេះ លោក ប៉ៃ សំបូរ​ បានថ្លែងនូវការ​កោតសរសើរនិងវាយតម្លៃខ្ពស់​ចំពោះកិច្ចសហការជិតស្និទ្ធ​រវាង​អាជ្ញាធរមូលដ្ឋានគ្រប់លំដាប់ថ្នាក់​និងអង្គការសង្គមស៊ីវិលក្នុងខេត្តកំពង់ធំ ដែលបាន​រួមគ្នាជំរុញ​ការអភិវឌ្ឍសេដ្ឋកិច្ច សង្គមនៅថ្នាក់មូលដ្ឋានឱ្យមានការរីកចម្រើនជាបន្តបន្ទាប់។ លោកបានគូសប​ញ្ជាក់អំពីការយកចិត្តទុកដាក់ខ្ពស់របស់​​រាជរដ្ឋាភិបាល ចំពោះ​អង្គការសង្គមស៊ីវិលដែលជាដៃគូមិនអាច​ខ្វះបានក្នុងការអភិវឌ្ឍប្រទេសជាតិលើគ្រប់វិស័យ ស្រប​តាមគោលនយោបាយនិងយុទ្ធសាស្រ្តអភិវឌ្ឍន៍ជាតិនានា ព្រមទាំង​បានលើកទឹកចិត្ត​ឱ្យអង្គការសង្គមស៊ីវិល​ក្នុងខេត្តកំពង់ធំ បន្តចូលរួមជាមួយរាជរដ្ឋាភិបាល​ក្នុងការកសាង​សង្គមស៊ីវិល​​​ឌីជីថល​ និងទប់ស្កាត់ព័ត៌មានក្លែងក្លាយក្នុងសហគមន៍​​​ក្នុងយុគសម័យឌីជីថល។ ឆ្លៀតក្នុងឱកាសនេះ លោក​បានលើកទឹកចិត្ត​ដល់អង្គការសង្គមស៊ីវិល​​​ជំរុញឱ្យយុវជនតាមសហគមន៍​ចុះឈ្មោះចូលរួម​វគ្គបណ្តុះបណ្តាលជំនាញ​​បច្ចេកទេសនិងជំនាញវិជ្ជាជីវៈចាំបាច់​នានានៅវិទ្យាស្ថានពហុបច្ចេកទេសខេត្តកំពង់ធំ ដើម្បីទទួលបានឱកាសការងារ​នៅតាមក្រុមហ៊ុន-សហគ្រាសក្នុងមូលដ្ឋាន ដែលអាចជួយលើកកម្ពស់​ជីវភាព​រស់នៅកាន់តែល្អប្រសើរថែមទៀត។ លោកក៏បាន​បញ្ជាក់បន្ថែមជូនអង្គប្រជុំថា វ.ស.ស. ​នឹងបន្តថែរក្សាវប្បធម៌​សន្ទនាជាមួយអង្គការសង្គមស៊ីវិល​និង​​ចូលរួមលើក​កម្ពស់សុខដុមនីយកម្មសង្គមស៊ីវិល​នៅកម្ពុជា ក្រោមការ​ដឹកនាំ​ប្រកបដោយគតិបណ្ឌិតនិង​ថាមវន្ដ​របស់​សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រ​កម្ពុជា។

ជាមួយគ្នានេះដែរ លោក អ៊ុង វុទ្ធី អភិបាលរងនៃគណៈអភិបាលខេត្តកំពង់ធំ បានវាយតម្លៃខ្ពស់ចំពោះវេទិកាសន្ទនានាព្រឹកនេះ ដែលជាថ្នាលមួយដ៏សំខាន់សម្រាប់គ្រប់ភាគីពាក់ព័ន្ធជួបប្រាស័យទាក់ទងគ្នានិងផ្លាស់ប្តូរទស្សនៈយោបល់​ទៅវិញទៅមកលើកិច្ចការសំខាន់ៗ សំដៅជំរុញ​និងលើកកម្ពស់លម្ហសិទ្ធិសេរីភាពនៃអង្គការសង្គមស៊ីវិល​ដែលមានក្នុងមូលដ្ឋានខេត្តកំពង់ធំ ជាពិសេសលើកកម្ពស់នីតិរដ្ឋនិងប្រជាធិបតេយ្យនៅកម្ពុជា។ លោកក៏បានលើកទឹកចិត្តឱ្យអង្គការសង្គមស៊ីវិលទាំងអស់​បន្តពង្រឹងភាពជាដៃគូល្អ​ជាមួយរាជរដ្ឋាភិបាល និងបន្តចូលរួមកាន់តែសកម្មថែមទៀត ​ក្នុងការអភិវឌ្ឍវិស័យសង្គមកិច្ច ការអភិវឌ្ឍមូលដ្ឋាន ​និងការលើកកម្ពស់ជីវភាពនិងសុខុមាលភាពប្រជាពលរដ្ឋ។

ក្នុងអង្គវេទិកានេះ ក៏មានការធ្វើបទបង្ហាញស្តីពី «ការយល់ដឹងអំពីអក្ខរកម្ម​ឌីជីថលនិងសុវត្ថិភាព​តាម​ប្រព័ន្ធ​បច្ចេកវិទ្យាសម្រាប់អង្គការ​​សង្គម​ស៊ីវិល» ដោយលោក ឡេង ប៊ុន្នី វាគ្មិនមកពីបណ្ឌិត្យសភា​​​បច្ចេកវិទ្យា​ឌីជីថលកម្ពុជា ដែលជាការចូលរួមចំណែករបស់ វ.ស.ស. ក្នុងការចូលរួម​ផ្សព្វផ្សាយនិងលើកកម្ពស់បរិវត្តកម្ម​​ឌីជីថលនិងការយល់ដឹងអំពី​គោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥។

ក្នុងឱកាសនេះដែរ តំណាងអង្គការសង្គមស៊ីវិល​ដែលបានចូលរួមក្នុងអង្គវេទិកាសន្ទនានេះ ក៏បានចូលរួម​លើកយកនូវបញ្ហាប្រឈមនិង​​សំណូមពរនានា មកជជែក​ពិភាក្សាដោយត្រង់ទៅត្រង់មក ដើម្បីរួមគ្នាស្វែងរកដំណោះស្រាយសមស្រប និងពង្រឹងកិច្ចសហប្រតិបត្តិការអភិវឌ្ឍន៍មូលដ្ឋានឱ្យកាន់តែល្អប្រសើរថែមទៀត៕