(ភ្នំពេញ)៖ កម្លាំងមន្ត្រីគយនិងរដ្ឋាករ សហការជាមួយមន្ត្រីនគរបាលអន្តោប្រវេសន៍ នៅថ្ងៃទី៩ ខែកញ្ញា ឆ្នាំ២០២៦ បានបើកប្រតិបត្តិការបង្ក្រាបករណីជួញដូរគ្រឿងញៀនឆ្លងដែនទ្រង់ទ្រាយធំមួយ នៅស្ថានីយអ្នកដំណើរចេញនៃអាកាសយានដ្ឋានអន្តរជាតិតេជោ។

ក្នុងប្រតិបត្តិការនេះ ជនបរទេសចំនួន ៣ នាក់ ដែលត្រៀមធ្វើដំណើរចាកចេញពីព្រះរាជាណាចក្រកម្ពុជា ត្រូវបានឃាត់ខ្លួន និងរកឃើញវត្ថុតាងជាសារធាតុញៀនយ៉ាងច្រើនសន្ធឹកសន្ធាប់។

ជាលទ្ធផលនៃការត្រួតពិនិត្យយ៉ាងល្អិតល្អន់ ក្រុមការងារចម្រុះបានរកឃើញរុក្ខជាតិក្រៀមសង្ស័យជាសារធាតុញៀនប្រភេទកញ្ឆា ចំនួន ១៤៦ ដុំ ដែលមានទម្ងន់សុទ្ធសរុប ៧៣,០១៧ គីឡូក្រាម។ មិនតែប៉ុណ្ណោះ ម្សៅក្រាមពណ៌សសង្ស័យជាសារធាតុញៀនប្រភេទហេរ៉ូអ៊ីន ក៏ត្រូវបានរឹបអូសផងដែរ ដែលមានទម្ងន់សុទ្ធសរុប ៦,២១៩ ក្រាម។

បន្ទាប់ពីបានបំពេញនីតិវិធីបឋម និងរៀបចំកំណត់ហេតុល្មើសច្បាប់គយរួចរាល់ ជនសង្ស័យទាំង ៣ នាក់ រួមជាមួយវត្ថុតាង និងសម្ភារៈពាក់ព័ន្ធទាំងអស់ ត្រូវបានប្រគល់ជូនមន្ទីរប្រឆាំងគ្រឿងញៀន ដើម្បីបន្តនីតិវិធីច្បាប់ជាធរមាន៕