(ភ្នំពេញ)៖ លោក កឹម ស៊ីថន រដ្ឋលេខាធិការប្រចាំការក្រសួងពាណិជ្ជកម្ម បានគូសបញ្ជា​ក់ថា កម្មវិធី CambodiaTrade Product Hackathon ​មានបំណងជំរុញការបម្លែងផលិតផលរូបវន្តរបស់កម្ពុជា ទៅជាផលិតផលដែលអាចស្វែងរកបាន បង្ហាញបាន និងលក់បានតាមប្រព័ន្ធឌីជីថល​ ដោយកម្មវិធីនេះមានលក្ខណៈពិសេសខុសពី Hackathon ទូទៅ ដោយមិនផ្តោតលើការសរសេរកម្មវិធី ឬបង្កើតបច្ចេកវិទ្យាថ្មីនោះទេ ប៉ុន្តែផ្តោតលើបញ្ហាប្រឈមជាក់ស្តែង គឺការបម្លែងផលិតផលខ្មែរដែលមានស្រាប់ ឱ្យក្លាយជាផលិតផលដែលអតិថិជនអាចស្វែងរក យល់ដឹង និងបញ្ជាទិញបាននៅលើទីផ្សារឌីជីថល។

​លោក កឹម ស៊ីថន ​ថ្លែងបែបនេះ ក្នុងឱកាសដែលលោកអញ្ជើញជាអធិបតី​បើកកម្មវិធីប្រកួតប្រជែងជាក្រុម CambodiaTrade Product Hackathon​ ក្រោមប្រធានបទ «ផ្សព្វផ្សាយអំពីកម្ពុជា ទៅកាន់ពិភពលោក»​នៅទី១២ ខែកញ្ញា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ ដែលរៀបចំឡើងក្នុងក្របខណ្ឌ វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ លើកទី៣។ ។ពិធីនេះ ក៏មានការអញ្ជើញចូលរួមពី លោក កែវ សុទ្ធិ រដ្ឋលេខាធិការក្រសួងប្រៃសណីយ៍និងទូរគមនាគមន៍ តំណាង លោកបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ​រួមនឹងថ្នាក់ដឹកនាំក្រសួង ស្ថាប័ន ដៃគូសហការ គណៈកម្មការ ក្រុមការងារ CambodiaTrade.com (http://cambodiatrade.com/) និងបេក្ខជន-បេក្ខនារីជាច្រើនរូប។

លោករដ្ឋលេខាធិការបានបន្តថា បច្ចុប្បន្ន សហគ្រាសកម្ពុជាជាច្រើនមានផលិតផលដែលមានគុណភាពខ្ពស់ តម្លៃសមរម្យ និងអត្តសញ្ញាណជាផលិតផលខ្មែរពិតប្រាកដ។ ទោះជាយ៉ាងណាក៏ដោយ គុណភាពតែមួយមុខមិនទាន់គ្រប់គ្រាន់សម្រាប់ការប្រកួតប្រជែងក្នុងបរិបទសេដ្ឋកិច្ចឌីជីថលនោះទេ។ ផលិតផលទាំងនោះត្រូវការរូបភាពប្រកបដោយគុណភាព ព័ត៌មានច្បាស់លាស់ មាតិកាដែលទាក់ទាញអតិថិជន តម្លៃសមរម្យ ទិន្នន័យដែលអាចស្វែងរកបាន និងប្រព័ន្ធដែលធ្វើឱ្យដំណើរការបញ្ជាទិញមានភាពងាយស្រួល។ ក្នុងន័យនេះ CambodiaTrade.com ដែលជាថ្នាលពាណិជ្ជកម្មអេឡិចត្រូនិក B2B2C ថ្នាក់ជាតិ មានតួនាទីយ៉ាងសំខាន់ក្នុងការផ្តល់ឱកាសដល់សហគ្រាសធុនតូច និងមធ្យមកម្ពុជា ក្នុងការដាក់លក់ផលិតផល និងផ្សារភ្ជាប់ទៅកាន់ទីផ្សារក្នុងស្រុក និងអន្តរជាតិ។

លោកបានគូសបញ្ជាក់ថា គោលដៅរបស់កម្មវិធី Hackathon នេះ មិនមែនត្រឹមតែបង្កើនចំនួនផលិតផលដែលបានបញ្ចូលទៅក្នុង CambodiaTrade.com ប៉ុណ្ណោះទេ ប៉ុន្តែអ្នកចូលរួមនឹងអាចអនុវត្តទាំងការចុះបញ្ជីផលិតផល និងការស្វែងរកវិធីសាស្ត្រជំរុញការបញ្ជាទិញពីទីផ្សារផងដែរ។ បន្ទាប់ពីបញ្ចប់កម្មវិធីនេះ អ្នកចូលរួមនឹងទទួលបានចំណេះដឹង និងជំនាញជាក់ស្តែង ដើម្បីជួយសហគ្រាសកម្ពុជា ឱ្យមានសមត្ថភាពធ្វើទីផ្សារ និងលក់ផលិតផលតាមប្រព័ន្ធឌីជីថលកាន់តែប្រសើរឡើង។

លោក កឹម ស៊ីថន ​បានលើកទឹកចិត្តដល់បេក្ខជន-បេក្ខនារីទាំងអស់ ឱ្យចាត់ទុកកម្មវិធីនេះជាឱកាសដ៏ល្អសម្រាប់ការរៀនសូត្រ អនុវត្តជាក់ស្តែង និងប្រកួតប្រជែងប្រកបដោយស្មារតីមិត្តភាព និងការច្នៃប្រឌិត ដើម្បីរួមចំណែកដល់ការអភិវឌ្ឍសេដ្ឋកិច្ចឌីជីថលរបស់កម្ពុជា​៕