(ភ្នំពេញ)៖ ដោយទទួលបានបទបញ្ជាដឹកនាំរបស់លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងការចង្អុលដឹកនាំរបស់លោកឧត្តមសេនីយ៍ទោ ប៊ុន សុសិក្ខា ស្នងការរងទទួលផែនការងារសន្តិសុខ និងលោកឧត្តមសេនីយ៍ទោ កៅ សុវណ្ណារ៉ា ស្នងការរងទទួលជំនួយការដឹកនាំការងារការិយាល័យប្រឆាំងបទល្មើសបច្ចេកវិទ្យា កាលពីពេលថ្មីៗនេះ សមត្ថកិច្ចជំនាញបានបើកការស្រាវជ្រាវ និងបង្រ្កាបលើករណីប្រើប្រាស់អត្តសញ្ញាណអ្នកដទៃ ដើម្បីឆបោកយកប្រាក់តាមប្រព័ន្ធបច្ចេកវិទ្យា។

ដោយមានការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ ការិយាល័យប្រឆាំងបទល្មើសបច្ចេកវិទ្យាបានឃាត់ខ្លួនជនសង្ស័យចំនួន ០២រូបមានដូចជា៖ ទី១ ឈ្មោះ វ.ខ.រ ភេទប្រុស ជនជាតិខ្មែរ និង ២. ឈ្មោះ ស.ស.វ ភេទប្រុស ជនជាតិខ្មែរ ។

តាមរយៈការស្រាវជ្រាវ សមត្ថកិច្ចកំណត់បានថា ជនសង្ស័យបានប្រើប្រាស់លេខទូរស័ព្ទបង្កើតគណនីតេឡេក្រាម ក្លែងបន្លំប្រើប្រាស់ឈ្មោះរបស់សមត្ថកិច្ច ដើម្បីឆបោកយកប្រាក់ពីជនរងគ្រោះ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចកសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។

សូមបញ្ជាក់ដែរ ជនល្មេីសទាំង ២នាក់​ បានយករូបថត​ និងប្រេីឈ្មោះអធិការនគរបាលខណ្ឌចំនួន ៦រូប​ បង្កេីតគណនី​ Telegram ទៅឆាតបោកលុយគេ​រួមមាន៖ លោក ស៊ឹម ពិសិដ្ឋ អធិការនគរបាលខណ្ឌទួលគោក, លោក សុខ ហេង អធិការនគរបាលខណ្ឌព្រែកព្នៅ, លោក លៀក ចាន់រាបសារ អធិការនគរបាលខណ្ឌជ្រោយចង្វារ, លោក ម៉ៅ សឿត អធិការនគរបាលខណ្ឌច្បារអំពៅ, លោក ហុង ពិសិដ្ឋ អធិការនគរបាលខណ្ឌកំបូល, លោក ម៉ន វិធី អធិការនគរបាលខណ្ឌពោធិសែនជ័យ និងលោក អ៊ូ ណារិទ្ធ នាយប៉ុស្តិ៍នគរបាលរដ្ឋបាលផ្សារដើមគរ៕