(ព្រៃវែង)៖ កម្លាំងនគរបាលស្រុកពារាំង បានឃាត់ខ្លួនជនសង្ស័យចំនួន២នាក់ ពាក់ព័ន្ធករណីឆក់ខ្សែកពីស្ត្រីវ័យ៦៧ឆ្នាំម្នាក់ ខណៈជនសង្ស័យកំពុងជិះម៉ូតូគេចខ្លួន។ ប្រតិបត្តិការនេះធ្វើឡើងក្រោមការដឹកនាំរបស់ លោកវរសេនីយ៍ទោ ស៊ុំ សីហា អធិការនគរបាលស្រុកពារាំង។

សមត្ថកិច្ចបានឱ្យដឹងថា កាលពីថ្ងៃទី៩ ខែកញ្ញា ឆ្នាំ២០២៦ វេលាម៉ោងប្រមាណ ៤៖៥០នាទីរសៀល ឈ្មោះ យ៉ាំ ហៃ ភេទស្រី អាយុ៦៧ឆ្នាំ រស់នៅភូមិព្រៃស្លាកើត ឃុំព្រៃព្នៅ ស្រុកពារាំង ខេត្តព្រៃវែង បានដើរទៅទិញកាតទូរស័ព្ទនៅចំណុចផ្ទះឈ្មោះ វ៉ាន់ នាង និងប្តីប្រពន្ធ ដែលស្ថិតក្នុងភូមិ-ឃុំខាងលើ។

បន្ទាប់ពីទិញរួច ជនរងគ្រោះបានដើរត្រឡប់ទៅផ្ទះវិញ។ លុះពេលដើរមកដល់មុខផ្ទះឈ្មោះ ឆូ ស្រីរ័ត្ន ភេទស្រី អាយុ៤១ឆ្នាំ ស្ថិតនៅភូមិព្រៃស្លាកើត ឃុំព្រៃព្នៅ ស្រុកពារាំង ស្រាប់តែមានជនសង្ស័យចំនួន២នាក់ ជិះម៉ូតូមួយគ្រឿង ម៉ាក Honda C125 ពណ៌ឈាមជ្រូក ឆ្នាំ២០២៦ ពាក់ផ្លាកលេខ ភ្នំពេញ 1MF-2162 ជិះមកជិត និងធ្វើសកម្មភាពឆក់ខ្សែករបស់ជនរងគ្រោះ រួចជិះម៉ូតូគេចខ្លួនទៅទិសខាងត្បូង។

ក្រោយកើតហេតុ ជនរងគ្រោះបានរាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលព្រៃព្នៅ។ បន្ទាប់ពីទទួលបានព័ត៌មាន កម្លាំងជំនាញព្រហ្មទណ្ឌស្រុកពារាំង បានសហការជាមួយកម្លាំងអន្តរាគមន៍ស្រុក និងកម្លាំងប៉ុស្តិ៍នគរបាល រដ្ឋបាលក្នុងស្រុកពារាំង ចុះប្រតិបត្តិការដេញស្ទាក់ និងឃាត់ខ្លួនជនសង្ស័យទាំង២នាក់បាននៅចំណុចឃុំកំពង់ពពិល ស្រុកពារាំង។

ជនសង្ស័យដែលត្រូវបានឃាត់ខ្លួនរួមមាន៖

*ទី១៖ ឈ្មោះ សុក វិវត្ត អាយុ២៤ឆ្នាំ រស់នៅភូមិព្រែកធំ១ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ
*ទី២៖ ឈ្មោះ ម៉េង លាងហេង អាយុ២០ឆ្នាំ រស់នៅភូមិអូរ ឃុំពន្លៃ ស្រុកបរិបូរណ៍ ខេត្តកំពង់ឆ្នាំង។

ក្រោយឃាត់ខ្លួន សមត្ថកិច្ចបាននាំជនសង្ស័យទាំង២នាក់ រួមជាមួយវត្ថុតាង មកកាន់អធិការដ្ឋាននគរបាលស្រុកពារាំង ដើម្បីសាកសួរ និងចាត់ការតាមនីតិវិធី។ តាមការសាកសួរ សមត្ថកិច្ចបានឱ្យដឹងថា ជនសង្ស័យទាំង២នាក់បានសារភាពថា ពិតជាបានធ្វើសកម្មភាពឆក់ខ្សែកពីជនរងគ្រោះខាងលើប្រាកដមែន។

ជនសង្ស័យទាំង២នាក់ក៏បានសារភាពបន្ថែមថា ពួកគេធ្លាប់ធ្វើសកម្មភាពឆក់ខ្សែកនៅក្នុងស្រុកពារាំងចំនួន២លើកមកហើយ។ បច្ចុប្បន្ន សមត្ថកិច្ចជំនាញនគរបាលស្រុកពារាំង កំពុងបំពេញសំណុំរឿង និងអនុវត្តនីតិវិធីបន្ត ដើម្បីបញ្ជូនជនសង្ស័យចាត់ការតាមផ្លូវច្បាប់។

សមត្ថកិច្ចអំពាវនាវដល់ប្រជាពលរដ្ឋ បង្កើនការប្រុងប្រយ័ត្នចំពោះទ្រព្យសម្បត្តិផ្ទាល់ខ្លួន ពិសេសនៅពេលធ្វើដំណើរតាមទីសាធារណៈ និងប្រសិនបើជួបប្រទះហេតុការណ៍សង្ស័យ សូមរាយការណ៍ជូនសមត្ថកិច្ចដែលនៅក្បែរបំផុត ដើម្បីចូលរួមទប់ស្កាត់ និងបង្ក្រាបបទល្មើសក្នុងមូលដ្ឋាន៕