(ត្បូងឃ្មុំ)៖ សម្តេចវិបុលសេនាភក្តី សាយ ឈុំ ឧត្តមក្រុមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា, លោកនីតិកោសលបណ្ឌិត ស៊ឹម កា ឧត្តមក្រុមប្រឹក្សាផ្ទាល់ព្រះមហាក្សត្រ និងលោក វង សូត អនុប្រធានទី២ នៃរដ្ឋសភា នាថ្ងៃទី១១ ខែកញ្ញា ឆ្នាំ២០២៦ បានអញ្ជើញចូលរួមជាមួយអញ្ជើញចុះពិនិត្យទីតាំងសមរភូមិតស៊ូរំដោះប្រទេសជាតិ ជាមួយអតីតយុទ្ធមិត្តជាច្រើនផ្សេងទៀត។

គណៈប្រតិភូ បានអញ្ជើញទៅដល់ភូមិស្រះ​ ដែលជាទីបញ្ជាការដ៏សំខាន់មួយ​ដែល​ ប៉ុល​ ពត​ អនុវត្តផែនការបោសសម្អាតកម្មាភិបាលភូមិភាគបូពា៍ អំឡុងខែ​ឧសភា​ ឆ្នាំ១៩៧៨។ ផែនការបោសសម្អាតរបស់​ ប៉ុល​ ពត​ ត្រូវបានអនុវត្តដោយលោក​ កែ​ ពក​។

លោក វង​ សូត​ បានរៀបរាប់ថា​ «មេដឹកនាំ​កម្មាភិបាលសំខាន់ៗ​ ត្រូវបានកោះហៅឱ្យចូលរួមប្រជុំ​ ហើយត្រូវបានចាប់ខ្លួន និងបញ្ជូនចេញទៅទីកន្លែងផ្សេង​ ដោយគ្មានថ្ងៃត្រឡប់វិញឡើយ»។

ព្រឹត្តិការណ៍អំឡុងខែឧសភា​ ឆ្នាំ១៩៧៨​ គឺជារបត់ប្រវត្តិសាស្រ្តដ៏សំខាន់​ និងជាចំណុចចាប់ផ្តើម​ នៃការក្រោកឈរប្រយុទ្ធប្រឆាំងរបបប្រល័យពូជសាសន៍​ ប៉ុល​ ពត​ របស់ប្រជាជនក្នុងភូមិភាគបូពា៍នេះ។ ផែនការបោសសម្អាតតរបស់​ កែ​ ពក​ បានធ្វើឱ្យមេដឹកនាំ​ ក៏ដូចជាកម្មាភិបាលដែលនៅសេសសល់​ រួមទាំងយុទ្ធមិត្ត​ និងប្រជាពលរដ្ឋនៅក្នុងតំបន់​ ភាសន៍ខ្លួនចូលក្នុងព្រៃតាទក​នៅចុងខែឧសភា​ ឆ្នាំ១៩៧៨ បង្កើតបានជារចនាសម្ព័ន្ធកម្លាំងតស៊ូ​ ប្រឆាំងនឹងរបបដ៏ឃោឃៅនេះ។

ដំណើរចុះពិនិត្យទីតាំងប្រវត្តិសាស្ត្រ​ បានផ្តល់ឱកាសដល់គណៈប្រតិភូក្នុងការស្វែងយល់បន្ថែមអំពីទីតាំងជាក់ស្តែង និងព្រឹត្តិការណ៍ដែលបានកើតឡើងពីអតីតកាល ព្រមទាំងរំលឹកឡើងវិញនូវដំណើរតស៊ូ និងការលះបង់របស់អតីតយុទ្ធមិត្ត និងប្រជាពលរដ្ឋក្នុងតំបន់នេះ។

ជាមួយគ្នានេះ ការរំលឹក​ និងការចងក្រងប្រវត្តិសាស្រ្ត​ នឹងរួមចំណែក​ដល់ការអប់រំមនុស្សជំនាន់ក្រោយ​ និងការបណ្តុះស្មារតីស្រឡាញ់ជាតិ ឯកភាពជាតិ និងសាមគ្គីភាព ព្រមទាំងជំរុញឱ្យមនុស្សជំនាន់ក្រោយយល់កាន់តែច្បាស់ ពីតម្លៃនៃសន្តិភាព ដែលជាមូលដ្ឋានដ៏សំខាន់សម្រាប់ការកសាង និងអភិវឌ្ឍប្រទេសជាតិឱ្យមានការរីកចម្រើន និងវិបុលភាព៕