(ភ្នំពេញ)៖ លោក អ៊ាត សីលា អនុប្រធានលេខាធិការដ្ឋាន និងជាប្រធានអនុគណៈកម្មការទី២៖ ពិធីការ និងបដិសណ្ឋារកិច្ច នៅព្រឹកថ្ងៃទី៩ ខែកញ្ញា ឆ្នាំ២០២៦ បានដឹកនាំកិច្ចប្រជុំដ៏សំខាន់មួយ នៅទីស្ដីការក្រសួងការបរទេស និងសហប្រតិបត្តិការអន្តរជាតិ ដើម្បីពិភាក្សាអំពីការរៀបចំការហាត់សមលើកទី១ សម្រាប់កិច្ចប្រជុំកំពូលហ្រ្វង់កូហ្វូនីលើកទី២០ ឆ្នាំ២០២៦។

កិច្ចប្រជុំនេះមានគោលបំណងរៀបចំផែនការលម្អិត និងត្រៀមលក្ខណៈសម្បត្តិឱ្យបានល្អិតល្អន់ សម្រាប់ការហាត់សមលើកទី១ ដែលគ្រោងនឹងប្រព្រឹត្តទៅនៅថ្ងៃទី២៦ ខែកញ្ញា ឆ្នាំ២០២៦ ខាងមុខ។ ការហាត់សមនេះមានសារៈសំខាន់ណាស់ ដើម្បីធានាថាការអនុវត្តជាក់ស្ដែងក្នុងឱកាសកិច្ចប្រជុំកំពូលហ្រ្វង់កូហ្វូនីលើកទី២០ នឹងប្រព្រឹត្តទៅដោយរលូន ប្រកបដោយប្រសិទ្ធភាព និងជោគជ័យ។

សមាសភាពចូលរួមកិច្ចពិភាក្សានេះ រួមមានតំណាងមកពីអនុគណៈកម្មការទី៤៖ សន្តិសុខ សណ្តាប់ធ្នាប់ និងសង្រ្គោះ តំណាងអនុគណៈកម្មការទី៣៖ សារព័ត៌មាន និងផ្សព្វផ្សាយ ព្រមទាំងប្រធានក្រុមការងារ និងមន្រ្តីពាក់ព័ន្ធទាំងអស់នៃអនុគណៈកម្មការទី២៖ ពិធីការ និងបដិសណ្ឋារកិច្ច។ កិច្ចសហការរវាងអនុគណៈកម្មការនានា គឺជាគន្លឹះដ៏សំខាន់ក្នុងការសម្របសម្រួលការងារឱ្យបានល្អប្រសើរ ដើម្បីលើកកម្ពស់កិត្យានុភាពជាតិក្នុងការរៀបចំព្រឹត្តិការណ៍អន្តរជាតិដ៏ធំនេះ។

ការត្រៀមរៀបចំយ៉ាងយកចិត្តទុកដាក់នេះ បង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការធ្វើជាម្ចាស់ផ្ទះដ៏ល្អ និងធានាបាននូវភាពជោគជ័យនៃកិច្ចប្រជុំកំពូលហ្រ្វង់កូហ្វូនីលើកទី២០ ឆ្នាំ២០២៦ ដែលនឹងនាំមកនូវផលប្រយោជន៍ជាច្រើនសម្រាប់កម្ពុជា និងសហគមន៍អន្តរជាតិ៕