(ភ្នំពេញ)៖ លោកអភិសន្តិបណ្ឌិត ស សុខា ឧបនាយករដ្ឋមន្រ្តី និង​រដ្ឋមន្រ្តីក្រសួងមហាផ្ទៃ ​បានព្រមានចាត់វិធានការ​ចំពោះអ្នកព័ន្ធពាក់​​ដែលនាំចូលផលិតផលឧបភោគបរិភោគខូចគុណភាព ជាពិសេសសាច់ជ្រូក ដែលមានប្រភពពីប្រទេសថៃ ហើយឆ្លងកាត់តាមព្រំដែនប្រទេសឡាវចូលមកកម្ពុជា។

ការព្រមាននេះ បន្ទាប់​ពីបែកធ្លាយព័ត៌មានកាលពីថ្ងៃទី៧ កញ្ញា ម្សិលមិញ ថា មានអ្នកនាំចូលសាច់ជ្រូកកកខូចគុណភាព ដែលផុតកំណត់ជិតមួយឆ្នាំហើយ ពីថៃ​មកកម្ពុជា ឆ្លងកាត់​តាមឡាវ ​​ដែលអាចនឹងប៉ះដល់សុខភាព​របស់ប្រជាពលរដ្ឋ។

លោកបានចាត់ទុកទង្វើនេះថា ដូចជាការនាំយកជំងឺ ឬមេរោគមកឲ្យប្រជាពលរដ្ឋខ្មែរយើងបរិភោគ​។ លោកបានណែនាំ​អាជ្ញាធរខេត្តជាប់ព្រំដែនទាំងអស់ ត្រូវ​យកចិត្តទុកដាក់ខ្ពស់ និងចាត់វិធានការតាមផ្លូវច្បាប់ជាដាច់ខាតចំពោះអ្នកពាក់ព័ន្ធនឹងបទល្មើសនេះ ដោយគ្មានការលើកលែងឡើយ។

លោកអភិសន្តិបណ្ឌិត ស សុខា ក៏បានអំពាវនាវឲ្យមានការផ្សព្វផ្សាយព័ត៌មាននេះឲ្យបានទូលំទូលាយ ដើម្បីឲ្យប្រជាពលរដ្ឋទាំងអស់បានដឹង និងចូលរួមទប់ស្កាត់បញ្ហាផ្សេងៗដែលកើតឡើងនៅ​កម្ពុជា។ ​

លោកអភិសន្តិបណ្ឌិត ស សុខា ណែនាំបែបនេះ ធ្វើឡើងក្នុងពិធីសន្និបាតបូកសរុបសមិទ្ធផលការងាររបស់ក្រុមប្រឹក្សាឃុំ សង្កាត់ អាណត្តិទី៥ ​នាថ្ងៃទី៨ ខែកញ្ញា ឆ្នាំ២០២៦ នៅសណ្ឋាគារ សុខាភ្នំពេញ។ ​​​​

​សូមស្តាប់ប្រសាសន៍បន្ថែមរបស់ ​ឧបនាយករដ្ឋមន្ត្រី ស សុខា​​៖