(សៀមិន)៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅថ្ងៃទី៧ ខែកញ្ញា ឆ្នាំ២០២៦ បានអញ្ជើញដឹកនាំគណៈប្រតិភូជាន់ខ្ពស់កម្ពុជា ចូលជួបសម្តែងការគួរសម និងពិភាក្សាការងារទ្វេភាគីជាមួយប្រមុខដឹកនាំជាន់ខ្ពស់នៃ សាធារណរដ្ឋប្រជាមានិតចិន និងខេត្តហ្វូជៀន ដែលរួមមានលោក Han Zheng អនុប្រធានាធិបតី នៃសាធារណរដ្ឋប្រជាមានិតចិន និងលោក Zhou Zuyi លេខាធិការគណៈកម្មាធិការបក្សកុម្មុយនីស្តចិន ប្រចាំខេត្តហ្វូជៀន និងជាប្រធានគណៈកម្មាធិការអចិន្ត្រៃយ៍ នៃសភាប្រជាជនខេត្តហ្វូជៀន។

នៅក្នុងជំនួបជាមួយប្រមុខដឹកនាំជាន់ខ្ពស់ទាំងពីររូប លោកឧបនាយករដ្ឋមន្ត្រី បានគូសរំលេចអំពីទំនាក់ទំនងរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន មិនត្រឹមតែជាទំនាក់ទំនងទ្វេភាគីធម្មតានោះទេ ប៉ុន្តែគឺជាមិត្តភាពដែកថែបដ៏រឹងមាំ ដែលត្រូវបានពូនជ្រំយ៉ាងយកចិត្តទុកដាក់ដោយថ្នាក់ដឹកនាំគ្រប់ជំនាន់នៃប្រទេសទាំងពីរ។ ឈានមកដល់ឆ្នាំ២០២៦ ទំនាក់ទំនងជាប្រវត្តិសាស្ត្រនេះបានស្ដែងឱ្យឃើញកាន់តែច្បាស់តាមរយៈការផ្លាស់ប្តូរទស្សនកិច្ចកម្រិតខ្ពស់ និងកិច្ចសហប្រតិបត្តិការសេដ្ឋកិច្ច-ពាណិជ្ជកម្មយ៉ាងសកម្ម ដែលនាំមកនូវផលប្រយោជន៍ជាក់ស្តែងសម្រាប់ប្រជាជាតិទាំងពីរ។ ទំនាក់ទំនងទ្វេភាគីនេះបានឈានដល់កម្រិតកំពូលដែលមិនធ្លាប់មាន តាមរយៈ «កិច្ចសហប្រតិបត្តិការដៃគូយុទ្ធសាស្ត្រគ្រប់ជ្រុងជ្រោយ» និងការរួមគ្នាកសាងសហគមន៍វាសនារួម កម្ពុជា-ចិន ក្នុងយុគសម័យថ្មី គ្រប់រដូវកាល។

ជាមួយគ្នានោះលោកឧបនាយករដ្ឋមន្ត្រី ស៊ុន ចាន់ថុល បានសម្តែងនូវអំណរគុណយ៉ាងជ្រាលជ្រៅចំពោះការគាំទ្ររបស់ចិន លើការអភិវឌ្ឍសង្គម សេដ្ឋកិច្ចកម្ពុជា ជាពិសេសលើវិស័យហេដ្ឋារចនាសម្ព័ន្ធធំៗតាំងពីដើមរៀងមក។ លោកក៏បានធ្វើបច្បុប្បន្នភាពនៃវឌ្ឍនភាពការងារពាក់ព័ន្ធនឹង «គម្រោងគ្រប់គ្រងធនធានទឹកចម្រុះហ្វូណនតេជោ» និងបានថ្លែងអំណរគុណយ៉ាងជ្រាលជ្រៅសារជាថ្មីចំពោះលោកប្រធានាធិបតី Xi Jinping, លោកនាយករដ្ឋមន្ត្រី Li Qiang និងរដ្ឋាភិបាលចិន សម្រាប់កិច្ចគាំទ្រគម្រោងជាប្រវត្តិសាស្រ្តដ៏ធំធេងមួយនេះ របស់កម្ពុជា។

លោកឧបនាយករដ្ឋមន្ត្រី បានបញ្ជាក់ពីការប្តេជ្ញាចិត្តរបស់កម្ពុជា ក្នុងការលុបបំបាត់បទល្មើសឆបោកតាមប្រព័ន្ធបច្ចេកវិទ្យា(Online Scam) និងបានចាត់ទុកបញ្ហានេះជាអាទិភាពខ្ពស់បំផុត ដោយសារវាបានធ្វើឱ្យប៉ះពាល់ដល់កិត្តិយស និងសេដ្ឋកិច្ចជាតិ។ ក្នុងស្មារតីនេះកម្ពុជានឹងធ្វើជាម្ចាស់ផ្ទះរៀបចំ «សន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា» នាថ្ងៃទី២៣-២៤ ខែកញ្ញា ឆ្នាំ២០២៦ ខាងមុខនេះ នៅរាជធានីភ្នំពេញ ដែលជាសក្ខីភាពស្តែងឱ្យឃើញពីកិច្ចខិតខំប្រឹងប្រែងយ៉ាងសកម្ម និងការទទួលខុសត្រូវខ្ពស់របស់កម្ពុជាក្នុងក្របខ័ណ្ឌតំបន់ និងជាអន្តរជាតិ។

បន្ថែមពីនោះលោកឧបនាយករដ្ឋមន្ត្រី បានគូសរំលេចអំពីចំណុចសំខាន់ៗមួយចំនួនទៀតរួមមាន៖ (១)ការលើកកម្ពស់ទេសចរណ៍ ដោយកម្ពុជាបានដាក់ចេញនូវយុទ្ធនាការលើកលែងទិដ្ឋាការរយៈពេល៤ខែ សម្រាប់ទេសចរចិន, (២)ស្ថានភាពព្រំដែនកម្ពុជា-ថៃ, (៣)ការយកចិត្តទុកដាក់លើខ្ពស់លើការថែទាំគាំទ្រវិនិយោគ, និង (៤)កិច្ចសហប្រតិបត្តិការបន្តបន្ទាប់ដោយភាតរភាព ភាពស្មោះត្រង់ និងទំនុកចិត្តរវាងគ្នា។

ជាការឆ្លើយតប ប្រមុខដឹកនាំជាន់ខ្ពស់នៃសាធារណរដ្ឋប្រជាមានិតចិន និងខេត្តហ្វូជៀន បានសម្តែងនូវកិច្ចស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះវត្តមានរបស់លោកឧបនាយករដ្ឋមន្ត្រី ព្រមទាំងគណៈប្រតិភូជាន់ខ្ពស់កម្ពុជា នៅក្នុងព្រឹត្តិការណ៍ពិព័រណ៍ CIFIT លើកទី២៦ នេះ។ ភាគីចិនបានសម្តែងនូវការរំភើប និងកោតសរសើរយ៉ាងជ្រាលជ្រៅចំពោះជំហរការទូតដ៏រឹងមាំរបស់កម្ពុជា ក្នុងការប្រកាន់ខ្ជាប់នូវគោលនយោបាយចិនមួយ ក៏ដូចជាកិច្ចខិតខំប្រឹងប្រែងយ៉ាងសកម្មក្នុងការថែទាំវិនិយោគិនចិន និងការប្តេជ្ញាចិត្តខ្ពស់ក្នុងការលុបបំបាត់បទល្មើសឆបោកតាមប្រព័ន្ធបច្ចេកវិទ្យា (Online Scam) ដែលកាយវិការទាំងនេះបានស្តែងឱ្យឃើញយ៉ាងច្បាស់ពីស្មារតី «មិត្តភាពដែកថែប» ពិតៗរវាងប្រទេសទាំងពីរ។

បន្ថែមពីនេះ ភាគីចិនបានបង្ហាញឆន្ទៈជាថ្មី ក្នុងការបន្តគាំទ្រយ៉ាងពេញទំហឹងដល់ការអភិវឌ្ឍសង្គម-សេដ្ឋកិច្ចកម្ពុជា និងការអនុវត្តគម្រោងយុទ្ធសាស្ត្រសំខាន់ៗ ស្របតាមស្មារតីដែលបានព្រមព្រៀងដោយថ្នាក់ដឹកនាំកំពូលនៃប្រទេសទាំងពីរ។ ភាគីចិន ជាពិសេសអាជ្ញាធរខេត្តហ្វូជៀន បានប្តេជ្ញានឹងបន្តជំរុញលើកទឹកចិត្តឱ្យក្រុមហ៊ុន សហគ្រាស និងវិនិយោគិនពីខេត្តហ្វូជៀន ទៅបណ្តាក់ទុនវិនិយោគនៅកម្ពុជាឱ្យកាន់តែច្រើនឡើង ព្រមទាំងបង្កើនការផ្លាស់ប្តូរទស្សនកិច្ចផ្នែកទេសចរណ៍ និងប្រជាជន និងប្រជាជន ដើម្បីរួមចំណែកពង្រឹងសហគមន៍វាសនារួមកម្ពុជា-ចិន ឱ្យកាន់តែស៊ីជម្រៅ និងផ្តល់ផ្លែផ្កាជាក់ស្តែងជូនដល់ប្រជាជាតិនៃប្រទេសទាំងពីរនាពេលអនាគត។

ជំនួបពិភាក្សាការងារទ្វេភាគីនេះ បានបញ្ចប់ទៅដោយបរិយាកាសរីករាយ ស្និទ្ធស្នាល និងប្រកបដោយផ្លែផ្កាការទូតយ៉ាងជ្រាលជ្រៅ ដែលមិនត្រឹមតែជាសក្ខីភាពបញ្ជាក់ពីភាពរឹងមាំនៃមិត្តភាពដែកថែបប៉ុណ្ណោះទេ ប៉ុន្តែថែមទាំងបានពង្រឹងកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន ឱ្យកាន់តែស្អិតរមួត និងមានចីរភាពបន្ថែមទៀត។ ភាគីទាំងពីរបានសម្តែងនូវជំនឿជាក់យ៉ាងមុតមាំថា លទ្ធផលនៃការពិភាក្សានេះ នឹងក្លាយជាចលករយ៉ាងសំខាន់ក្នុងការជំរុញកំណើនសេដ្ឋកិច្ច ការទាក់ទាញទុនវិនិយោគបន្ថែម និងការលើកកម្ពស់ជីវភាពរស់នៅរបស់ប្រជាជននៃប្រទេសទាំងពីរឱ្យកាន់តែប្រសើរឡើងជាលំដាប់៕