(ភ្នំពេញ)៖ លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលកម្ចាត់មីនកម្ពុជា (CMAC) បានបញ្ជាក់ឱ្យដឹងថា CMAC កម្ពុជា បានជួយហ្វឹកហ្វឺនលើបច្ចេកទេសកម្ទេចសំណល់យុទ្ធភណ្ឌសង្គ្រាម​ និងជាពិសេសលើការប្រើប្រាស់ឧបករណ៍បច្ចេកទេស រុករកសំណល់យុទ្ធភណ្ឌសង្គ្រាម ជូនកងទ័ពអាកាសសហរដ្ឋអាមេរិក​។

លោក ហេង រតនា បានបញ្ជាក់ថា នៅចុងខែសីហា និងដើមខែកញ្ញា​ ឆ្នាំ២០២៦នេះ​ អង្គភាព CMAC បានសហការជាមួយអង្គការ Golden West បានផ្តល់ការហ្វឹកហ្វឺនដល់កងទ័ពសហរដ្ឋអាមេរិក លើបច្ចេកទេសសំណល់យុទ្ធភណ្ឌសង្គ្រាម​ និងជាពិសេសលើការប្រើប្រាស់ឧបករណ៍បច្ចេកទេស រុករកសំណល់យុទ្ធភណ្ឌសង្គ្រាម ជូនកងទ័ពអាកាសសហរដ្ឋអាមេរិក​ ផ្នែកជំនាញសំណល់យុទ្ធភណ្ឌសង្គ្រាម និងក្រុមបច្ចេកទេសយុទ្ធោបករណ៍នៃសារណរដ្ឋកាប៊ូវ័រដេ​ (Cabo Verde) ដែលការហ្វឹកហ្វឺន ស្ថិតក្រោមគម្រោងជំនួយបោសសម្អាតមីនមនុស្សធម៌ របស់សហរដ្ឋអាមេរិកគាំទ្រប្រទេសអាហ្វិក។

សូមបញ្ជាក់ថា​អង្គការ Golden West​ ជាដៃគូយ៉ាងសំខាន់ជាមួយអង្គភាព CMAC ក្នុងសកម្មភាពកម្ចាត់មីននៅកម្ពុជាជាង ២៥ឆ្នាំមកហើយ​ ពោលចាប់តាំងពីដើមឆ្នាំ២០០០ មកម្ល៉េះ៕