(ភ្នំពេញ)៖ ការដណ្តើមបាននិទ្ទេស A របស់យុវសិស្សកម្ពុជាគ្រប់រូប មិនមែនកើតឡើង​ដោយ​​ចៃដន្យឡើយ តែជាលទ្ធផលមួយ ដែលបានកើតចេញពីការកំណត់គោលដៅ ការ​តាំងចិត្ត ការប្រឹងប្រែងសិក្សារៀនសូត្រ ជាពិសេសពួកគេចង់ដណ្តើមយកកិត្តិយស និង​មោទ​នភាពសម្រាប់ខ្លួន ក៏ដូចជាក្រុមគ្រួសារ។

កញ្ញា ហង្ស ពនិតា ជាយុវសិស្សមួយរូប ដែលដណ្តើមបាននិទ្ទេស A ពីការប្រឡង​មធ្យម​សិក្សា​​ទុតិយភូមិឆ្នាំ២០២៦នេះ ក្នុងចំណោមសិស្សនិទ្ទេស A ជាង២ពាន់នាក់។ និទ្ទេស A បានធ្វើឱ្យកញ្ញា ពនិតា សប្បាយរីករាយក្រៃលែង ព្រោះជាផ្លែផ្កាកើតពីការប្រឹ​ងប្រែង​សិក្សា​​​រៀន​សូត្រយ៉ាងខ្លាំងក្លាចាប់តាំងពីថ្នាក់ទី៩មក។

និទ្ទេស A ត្រូវបានគេពិពណ៌នាថា មិនមែនជាការកំណត់ចុងក្រោយនៃជោគវាសនាជីវិត​នោះ​ទេ តែសម្រាប់កញ្ញា ពនិតា និទ្ទេស A ជាការវាស់ស្ទង់សតម្ថភាពនៃការសិក្សារៀន​សូត្រ​​ជាង​១០ឆ្នាំ ហើយក៏ជាច្រកទ្វារដ៏ធំសម្រាប់ឈានជើងទៅកាន់ថ្នាក់ឧត្តមសិក្សា។ និទ្ទេស A នេះទៀតសោត មិនត្រឹមផ្តល់អាទិភាព និងឱកាសសម្រាប់ថ្នាក់ឧត្តមសិក្សា​ប៉ុណ្ណោះទេ តែក៏បានផ្តល់កិត្តិយសសម្រាប់ខ្លួនឯង ក្រុមគ្រួសារ សាលា និងលោកគ្រូ អ្នក​គ្រូ។

ជាមួយការទទួលបាននិទ្ទេស A កញ្ញា ហង្ស ពនិតា ក៏បានចែករំលែកនូវបទពិសោធន៍ និង​គន្លឹះសិក្សាមួយចំនួនដែលនាំឱ្យទទួលបានលទ្ធផលដ៏គាប់ប្រសើរក្នុងនាមជាអ្នកសិក្សា​មួយរូប។ ហង្ស ពនិតា មិនមែនជាអ្នករៀនពូកែនោះទេ ប៉ុន្តែនៅពេលចូលថ្នាក់ទី៩ កញ្ញា ក៏​បានដាក់ចេញគោលដៅចង់បានលទ្ធផលល្អប្រសើរលើការសិក្សា។ ដូច្នេះកម្មវិធីសិក្សា​មួយច្បាស់លាស់ក៏ត្រូវរៀបចំឡើង។ ការដាក់ចេញកម្មវិធីសិក្សានេះ ក៏ធ្វើឱ្យកញ្ញាប្រឡង​មធ្យម​សិក្សា​បឋមភូមិដោយលទ្ធផលល្អប្រសើរ។

បន្ទាប់ពីចប់អនុវិទ្យាល័យ កញ្ញា ហង្ស ពនិតា នៅតែបន្តបោះពួយការតាំងចិត្តលើការ​សិក្សា​របស់ខ្លួន ជាពិសេសការឈានឆ្ពោះទៅកាន់ការប្រលងមធ្យមសិក្សាទុតិយភូមិ ដើម្បីបាននិទ្ទេសល្អ។ នៅពេលកំណត់ពីគោលដៅចង់បាននិទ្ទេសល្អប្រសើរនេះហើយ កញ្ញា ពនិតា បានដាក់ចេញការរៀបចំកម្មវិធីសិក្សា និងរបៀបរៀនមួយច្បាស់លាស់។ ទីបំផុតលទ្ធផលក៏ទទួលបានដូចអ្វីដែលបានប៉ងប្រាថ្នា។

ជាមួយលទ្ធផលល្អប្រសើរនៃការបញ្ចប់ការសិក្សាចំណេះដឹងទូទៅរយៈពេលជាង១០ឆ្នាំមកនេះ ក្រៅពីកត្តាខ្លួនឯងហើយនោះ ឪពុកម្តាយ​ និងលោកគ្រូ អ្នកគ្រូ សុទ្ធតែជាបង្អែក​ដ៏​សំខាន់សម្រាប់កញ្ញា ហង្ស ពនិតា។ កញ្ញា ពនិតា បានយកឱកាសនេះគោរពថ្លែងអំណរ​គុណ​ដល់លោកឪពុក អ្នកម្តាយ​ ដែលបានចិញ្ចឹមបីបាច់ឧបត្ថម្ភគាំទ្រគ្រប់បែបយ៉ាង​សម្រាប់​​ការសិក្សា។ ពនិតា ក៏បានគោរពថ្លែងអំណរគុណដល់លោកគ្រូ អ្នកគ្រូ គ្រប់រូប ដែលបានប្រឹងប្រែងផ្តល់ពុទ្ធិជូនកញ្ញាតាំងពីតូចក្រូចឆ្មារមក

និទ្ទេស A ពីការប្រឡងមធ្យមសិក្សាទុតិយភូមិមិនមែនជាទីបញ្ចប់នៃការសិក្សាសម្រាប់​កញ្ញា ពនិតា នោះឡើយ។ នៅពេលនេះ កញ្ញា បន្តបោះពួយទៅកាន់ថ្នាក់ឧត្តមសិក្សាចាប់​យកជំនាញគ្រប់គ្រងធនាគារ និងហិរញ្ញវត្ថុ ដែលជាមុខជំនាញដែលកញ្ញាស្រឡាញ់ និង​យល់ថាមានតម្រូវការខ្ពស់នៅក្នុងសង្គម៕