ក្រុមការងារ CPP ចុះជួយមូលដ្ឋានឃុំហោងសំណុំ ស្រុកឱរ៉ាល់ ខេត្តកំពង់ស្ពឺ បាននាំយកទៀនព្រះវស្សា និងទេយ្យទាន ប្រគេនព្រះសង្ឃចំនួន ២វត្ត នៅឃុំហោងសំណុំ
07-09-2026 11:08
(កំពង់ស្ពឺ)៖ នាថ្ងៃទី០៦ ខែកញ្ញា ឆ្នាំ២០២៦ លោកបណ្ឌិត កែរ រដ្ឋា រដ្ឋលេខាធិការក្រសួងសុខាភិបាល អនុប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានស្រុកឱរ៉ាល់ និងជាប្រធានក្រុមការងារគណបក្សប្រជាជនកម្ពុជា ចុះជួយមូលដ្ឋានឃុំហោងសំណុំ ព្រមទាំងលោក លោកស្រី អនុប្រធាន និងសមាជិកក្រុមការងារចុះជួយឃុំ ក្រុមប្រឹក្សាឃុំ សាខាបក្សភូមិ បាននាំយកនូវទៀនព្រះវស្សា និងទេយ្យទានប្រគេនព្រះសង្ឃចំនួន ២វត្ត រួមមាន វត្តសុច័ន្ទគីរី ហៅវត្តភ្នំចាស់ នៅភូមិមនោរម្យ និងវត្តមណីឧត្តម ហៅវត្តតាំងរបង នៅភូមិតាំងរបង ឃុំហោងសំណុំ ស្រុកឱរ៉ាល់ ខេត្តកំពង់ស្ពឺ។
ដោយក្នុងមួយវត្តប្រគេននូវថវិកាចំនួន ៥០០.០០០រៀល ទៀនវស្សា១ដើម, អង្ករ១បេ (៥០គីឡូ), មី ២កេស, ទឹកបរិសុទ្ធ ២កេស, ទឹកត្រី ២យួរ, ទឹកស៊ីអ៊ីវ ២យួរ និងត្រីងៀត ២គីឡូ ។
បុណ្យចូលព្រះវស្សា គឺជាបុណ្យក្នុងព្រះពុទ្ធសាសនា ដែលសាវ័កផ្នែកបព្វជិត តែងចូលវស្សាតាមពុទ្ធានុញ្ញាតអស់រយៈពេល៣ខែ (មួយត្រីមាស) ក្នុងវស្សានរដូវ ដោយមិនដាច់វស្សា។ ចំណែកឯពុទ្ធបរិស័ទជាទាយកទាយិកា ឧបាសក ឧបាសិកា វិញក៏នាំគ្នាប្រារព្ធធ្វើបុណ្យចូលវស្សានោះដែរ ជាពិសេសគឺចាត់ចែងវស្សិកសាដក (សំពត់សម្រាប់ងូតទឹកភ្លៀង) ដែលនិយមហៅថា សំពត់សាដកចំណាំវស្សា ព្រមទាំងប្រេងកាត ទៀន ធូប និងភេសជ្ជៈមួយចំនួនទៀតតាមលទ្ធភាព។
ឆ្លៀតក្នុងឱកាសនោះដែរ ដោយទឹកចិត្តជ្រះថ្លាក្នុងព្រះពុទ្ធសាសនា លោកបណ្ឌិត កែរ រដ្ឋា បានជូនថវិកាដល់ លោកតាអាចារ្យ និងគណៈកម្មការវត្ត លោកតាជី យាយជី សរុបចំនួនថវិកា ៣៦០.០០០រៀល ។
បន្ទាប់មក លោកតា លោកយាយ ក៏បានជូនពរជ័យសិរីមង្គលដល់លោកបណ្ឌិត កែរ រដ្ឋា និងក្រុមការងារទាំងអស់ សូមឲ្យមានជន្មាយុយឺនយូរ ជួបប្រទះតែសេចក្តីសុខ សេចក្តីចម្រើន មានសុភមង្គលក្នុងក្រុមគ្រួសារ មានសុខភាពល្អបរិបូរណ៍ និងសូមប្រកបដោយពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
