(កំពង់ធំ)៖ នៅព្រឹកថ្ងៃទី៦ ខែកញ្ញា ឆ្នាំ២០២៦នេះ សមាគមយុវជនតេជោសប្បុរស បាន​នាំ​យកអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន​សែន ជូនគ្រួសារអតីតយុទ្ធជន និវត្តន៍ជន និងគ្រួសារកងទ័ពជួរមុខ ដែលមានជីវភាព​ខ្វះ​ខាត​ចំនួន ៣៥គ្រួសារ នៅភូមិតាញ៉ុក ឃុំប្រាសាទ ស្រុកសន្ទុក ខេត្តកំពង់ធំ។

ពិធីចែកអំណោយខាងលើនេះ ដឹកនាំ​ដោយ​លោក យ៉ន ទាយាទ ទីប្រឹក្សាផ្ទាល់​សម្តេច​តេ​ជោ ហ៊ុន សែន រួមជាមួយ​សហការី និងក្រុ​ម​គ្រូ​ពេទ្យស្ម័គ្រចិត្ត ដោយមានការចូលរួម​ពី​លោក វណ្ណៈ សោភានិត អភិបាលស្រុក និងជាប្រធាន អ.ន.ក ស្រុកសន្ទុក ខេត្តកំពង់ធំ ព្រមទាំងមន្ត្រីរាជការស្រុក និងអាជ្ញាធរមូលដ្ឋាន។

​លោក យ៉ន ទាយាទ បានជម្រាបគ្រួសារអតីតយុទ្ធជន និវត្តន៍ជន និងគ្រួសារកងទ័ពជួរ​មុខ ពីការគិតគូរ និងយកចិត្តទុកដាក់ ក៏ដូចជាការនឹករលឹកជាប់ជាប្រចាំរបស់​សម្តេច​តេ​ជោ និងសម្តេចកិត្តិព្រឹទ្ធបណ្ឌិត ចំពោះគ្រួសារអតីតយុទ្ធជន និវត្តន៍ជន និងគ្រួសារកងទ័ព​ជួរមុខ។ ផ្តើមពីការគិតគូរនេះ សម្តេចតេជោ និងសម្តេចកិត្តិព្រឹទ្ធបណ្ឌិត តែងតែនាំដល់​ក្រុមការងារផ្នែកសប្បុរសធម៌ ក៏ដូចជាមន្ត្រីរាជការនៅមូលដ្ឋាន ឱ្យយកចិត្តទុកដាក់ និង​ដោះស្រាយរាល់ការលំបាករបស់គ្រួសារអតីតយុទ្ធជន និវត្តន៍ជន​ និងគ្រួសារកងទ័ព​ជួរ​មុខ។

អំណោយរួមមាន អង្ករ ទឹកស៊ីអ៊ីវ ទឹកត្រី ត្រីខ ថ្នាំពេទ្យ និងថវិកាមួយចំនួន។ ប្រជាពលរដ្ឋ​ដែលទទួលបានអំណោយខាងលើនេះ គោរពថ្លែងអំណរគុណយ៉ាងជ្រាលជ្រៅ​បំផុត​ជូន​ចំពោះសម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែល បាន​យកចិត្តទុកដាក់ខ្ពស់​ដល់សុខទុក្ខប្រជាពលរដ្ឋក្នុងមូលដ្ឋាន និងគោរពជូនពរ​សម្តេច​ទាំង​ទ្វេទទួលបានសុខភាពល្អបរិបូណ៌៕