(ឧត្តរមានជ័យ)៖​ អភិបាលខេត្តឧត្តរមានជ័យ​ លោក​ មាន​ ចាន់យ៉ាដា​ នៅថ្ងៃទី៦​ ខែកញ្ញា​ ឆ្នាំ២០២៦​ បានបញ្ជាឲ្យប្រធានទីស្នាក់ការបរិស្ថាន​ ដែលដាក់គោលដៅនៅតំបន់ព្រៃសហគមន៍សង្ឃរុក្ខាវ័ន​ យកលុយចំនួន៥០ម៉ឺនរៀល​ ជូនពលរដ្ឋវិញ​ ក្រោយផ្ទុះការចែកចាយនៅតាមបណ្តាញសង្គម។​

ប្រជាពលរដ្ឋចំនួន២គោយន្ត​ បានចូលទៅកាប់ឈេីងាប់ៗ​ យកមកធ្វេីអុស​ ក្នុងតំបន់ព្រៃសហគមន៍ហាមឃាត់​ ហេីយពេលពលរដ្ឋដឹកអុសចេញមកវិញ​ ស្រាប់តែត្រូវបានក្រុមមន្រ្តីបរិស្ថានទារឲ្យបង់លុយ១លានរៀល​ ដោយមួយគោយន្ត៥០ម៉ឺនរៀល​ តែពលរដ្ឋដោយសារអត់លុយ​ ក៏សុំបង់ត្រឹមមួយគោយន្ត២៥ម៉ឺនរៀល​ ទេីបបានចេញមកផ្ទះ។

ក្រោយករណីនេះ​ ត្រូវបានចែកចាយតាមបណ្តាញសង្គម​ អភិបាលខេត្តឧត្តរមានជ័យ​ បានបញ្ជាឲ្យធ្វេីការស្រាវជ្រាវ​ ហេីយរកឃេីញការពិតបែបនេះមែន​ និងបានបញ្ជាឲ្យមន្រ្តីយកលុយជូនពលរដ្ឋវិញ។

ដោយឡែក​ប្រធានទីស្នាក់ការបរិស្ថានប្រចាំនៅទីស្នាក់ការសហគមន៍ព្រៃឈេីសង្ឃរុក្ខាវ័ន ត្រូវបានដកឲ្យមកបម្រេីការងារនៅមន្ទីរបរិស្ថានវិញ។

មន្រ្តីសាលាខេត្តឧត្តរមានជ័យ​ បានបញ្ជាក់ថា​ ដោយសារកន្លងទៅមានសកម្មភាពលួចចូលទៅកាប់ឈេីនៅតំបន់ព្រៃសហគមន៍ខាងលេី​ ស្ថិតនៅស្រុកចុងកាល់​ ទេីបនាំឲ្យមានការបង្កេីតទីស្នាក់ការបរិស្ថាននៅទីនោះ​ ដេីម្បីចូលរួមទប់ស្កាត់​ការកាប់ឈេីខុសច្បាប់។

ប្រជាពលរដ្ឋ​ បានថ្លែងអំណរគុណលោកអភិបាលខេត្ត​ ដែលបានជួយរកយុត្តិធម៌​ និងដោះស្រាយបញ្ចប់បញ្ហាជូនពួកគាត់វិញ។