លោក គីម វីរៈ ចុះពិនិត្យស្ថានភាពទឹកជំនន់ និងគ្រោះរាំងស្ងួត នៅខេត្តបាត់ដំបង ដើម្បីរៀបចំវិធានការអន្តរាគមន៍សង្គ្រោះទាន់ពេលវេលា

05-09-2026 20:28

(បាត់ដំបង)៖ នៅថ្ងៃទី៥ ខែកញ្ញា ឆ្នាំ២០២៦ លោក គីម វីរៈ អនុប្រធាន និងជាអគ្គលេខាធិការដ្ឋាន តំណាងដ៏ខ្ពង់ខ្ពស់លោកកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គ.ជ.គ.ម. បានដឹកនាំក្រុមការងារ សហការជាមួយថ្នាក់ដឹកនាំ និងមន្រ្តីពាក់ព័ន្ធ កងកម្លាំង និងអាជ្ញាធរមូលដ្ឋាន ចុះពិនិត្យស្ថានភាពគ្រោះទឹកជំនន់ នៅស្រុកឯកភ្នំ ខេត្តបាត់ដំបង។
ក្នុងដំណើរចុះពិនិត្យនោះ លោក គីម វីរៈ បានអញ្ជើញពិនិត្យពីដំណើរការស្តារឡើងវិញហេដ្ឋារចនាសម្ព័ន្ធផ្លូវថ្នល់ និងលូកាត់ផ្លូវ ដែលរងការខូចខាត និងផែនការបន្តរបស់រដ្ឋបាលខេត្ត-ស្រុក ស្តីពីការជួសជុល និងកសាងឡើងវិញ។
យោងតាមរបាយការណ៍ ក្នុងខែសីហា ឆ្នាំ២០២៦នេះ ទឹកជំនន់នៅខេត្តបាត់ដំបងបានកើតឡើងចំនួនពីរលើក ដោយលើកទី១ មានកម្រិតទឹកខ្ពស់ជាង តែការប៉ះពាល់តិចជាង និងលើកទី២ ទំហំទឹកតិចជាងលើកទី១ តែបណ្តាលឱ្យខូចខាតលំនៅដ្ឋាន និងហេដ្ឋារចនាសម្ព័ន្ធផ្លូវថ្នល់មួយចំនួន។
ក្នុងដំណាក់កាលនៃការជន់លិចលើកទី២ អាជ្ញាធរបានសម្រេចបិទទឹកមិនឱ្យហូរចូលតាមប្រឡាយតូចធំ ដើម្បីការពារដំណាំស្រូវរបស់ប្រជាពលរដ្ឋដែលជិតប្រមូលផល និងកំពុងប្រមូលផល។
បន្ទាប់ពីបញ្ចប់ការពិនិត្យស្ថានភាពទឹកជំនន់ លោក គីម វីរៈ បានបន្តអញ្ជើញចុះពិនិត្យស្ថានភាពគ្រោះរាំងស្ងួត នៅស្រុកម៉ោងឬស្សី ដែលប៉ះពាល់ប្រមាណជាង ១ម៉ឺនហិកតា។ ក្នុងនោះ បើតាមការបង្ហាញរបស់មន្រ្តីជំនាញកសិកម្ម ក្នុងករណីមានភ្លៀងធ្លាក់ក្នុងខែកញ្ញានេះ អាចស្តារឡើងវិញបានប្រមាណ ៣០ភាគរយ។
ក្នុងកំឡុងពេលចុះពិនិត្យជាមួយអាជ្ញាធរមូលដ្ឋាន លោក គីម វីរៈ បានទទួលព័ត៌មាន បន្ថែមថា ឃុំចំនួន ៤ នៅក្នុងស្រុកកំពុងជួបការលំបាកដោយសារខ្វះទឹកប្រើប្រាស់ប្រចាំថ្ងៃសម្រាប់គ្រួសារ ហើយមាននិន្នាការឈានទៅរកការចែកចាយទឹកជាបណ្តោះអាសន្នបន្តបន្ទាប់។ ជាកិច្ចឆ្លើយតប លោក គីម វីរៈ បានណែនាំឱ្យមន្រ្តីឃុំ និងស្រុក រៀបចំរបាយការណ៍ខូចខាត សំណើ និងតម្រូវការចាំបាច់សម្រាប់ការអន្តរាគមន៍ ដើម្បីឱ្យ អគ្គលេខាធិការដ្ឋានគ.ជ.គ.ម. រៀបចំការគ្រប់គ្រងធនធានជួយសង្រ្គោះ និងស្នើដល់ថ្នាក់ដឹកនាំពាក់ព័ន្ធក្នុងការត្រៀម និងអន្តរាគមន៍ឱ្យបានទាន់ពេលវេលា៕