(ភ្នំពេញ)៖ នៅថ្ងៃទី៣១ ខែសីហា ឆ្នាំ២០២៦នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានផ្ញើសារលិខិតរំលែកទុក្ខយ៉ាងក្រៀមក្រំជូនលោកជំទាវ អគ្គមហាឧបាសិកា សុខ កែវ និងក្រុមគ្រួសារ ចំពោះមរណភាព ឯកឧត្តមបណ្ឌិតសភាចារ្យ ច័ន្ទ សារុន តំណាងរាស្ត្រមណ្ឌលខេត្តតាកែវ និងជាអតីតរដ្ឋមន្រី្តក្រសួងកសិកម្ម រុក្ខាប្រមាញ់ និងនេសាទ ។

ក្នុងសារលិខិតនេះមានខ្លឹមសារថា៖ «ក្នុងនាមកាកបាទក្រហមកម្ពុជា ក្រោមម្លប់គង់ប្រថាប់ដ៏ឧត្តុង្គឧត្តម សម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយស និងក្នុងនាមខ្ញុំផ្ទាល់ ព្រមទាំងសមាជិក សមាជិកានៃគណៈកម្មាធិការកណ្តាល មន្ត្រី បុគ្គលិក អ្នកស្ម័គ្រចិត្ត និងយុវជនកាកបាទក្រហមកម្ពុជា សូមចូលរួមរំលែកទុក្ខដ៏ក្រៀមក្រំបំផុត ជាមួយ លោកជំទាវ អគ្គមហាឧបាសិកា និងក្រុមគ្រួសារទាំងអស់ ចំពោះមរណភាព ឯកឧត្តមបណ្ឌិតសភាចារ្យ ច័ន្ទ សារុន តំណាងរាស្ត្រមណ្ឌលខេត្តតាកែវ និងជាអតីតរដ្ឋមន្រី្តក្រសួងកសិកម្ម រុក្ខាប្រមាញ់ និងនេសាទ បានទទួលមរណភាព នៅថ្ងៃចន្ទ ៣រោច ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៣១ ខែសីហា ឆ្នាំ២០២៦ វេលាម៉ោង ០០:២៩នាទីរំលងអធ្រាត្រ ក្នុងជន្មាយុ ៨១ឆ្នាំ ដោយរោគាពាធ។

ក្នុងវេលាដ៏សែនក្តុកក្តួលនេះ ខ្ញុំ និងសហការី នៃកាកបាទក្រហមកម្ពុជា សូមសម្តែងនូវក្តីសោកស្តាយ ស្រណោះអាឡោះអាល័យជាពន់ពេកជាមួយ លោកជំទាវ អគ្គមហាឧបាសិកា និងក្រុមគ្រួសារទាំងអស់ ចំពោះការបាត់បង់ស្វាមី ឪពុក ឪពុកក្មេក ជីតា ជីតាទួត ប្រកបដោយព្រហ្មវិហារធម៌ គុណធម៌ដ៏ល្អប្រពៃនៅក្នុងគ្រួសារ និងសង្គមជាតិ។ ការលាចាកលោកនេះ របស់ ឯកឧត្តមបណ្ឌិតសភាចារ្យ ច័ន្ទ សារុន គឺជាការបាត់បង់ឥស្សរជនឆ្នើមមួយរូប ដែលកន្លងមកបានធ្វើពលីកម្មបូជាកម្លាំងកាយ ចិត្ត បញ្ញា ស្មារតី និងបានបំពេញភារកិច្ចប្រកបដោយស្មារតីស្នេហាជាតិ និងមានស្នាដៃជាច្រើនក្នុងការរួមចំណែកសហការ និងជួយដល់រាជរដ្ឋាភិបាលគ្រប់ៗអាណត្តិ ព្រមទាំងការជួយឧបត្ថម្ភគាំទ្រដល់សកម្មភាពមនុស្សធម៌កាកបាទក្រហមកម្ពុជាកន្លងមក។ ជាមួយគ្នានេះ ឯកឧត្តមបណ្ឌិតសភាចារ្យ បានចូលរួមយ៉ាងធំធេងក្នុងការកសាង អភិវឌ្ឍន៍ ពង្រឹងសុខសន្តិភាព ស្ថិរភាពនយោបាយ ជាពិសេស វិស័យកសិកម្ម រុក្ខាប្រមាញ់ និងនេសាទ ដើម្បីបម្រើបុព្វហេតុជាតិ មាតុភូមិកម្ពុជា។

ខ្ញុំ និងសហការីទាំងអស់ នៃកាកបាទក្រហមកម្ពុជា សូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តមបណ្ឌិតសភាចារ្យ ច័ន្ទ សារុន បានទៅកាន់សុគតិភព កុំបីឃ្លៀងឃ្លាតឡើយ»៕

ខាងក្រោមនេះជាខ្លឹមសារទាំងស្រុងនៃសារលិខិតរំលែកទុក្ខដ៏ក្រៀមក្រំបំផុត៖